බාදක මැදින් දෑවුරුද්දක්

ශ්‍රී බුද්ධ වර්ෂ 2558 ක් වූ ඇසළ පුර අටවක නම් තිථිය ලත් ශනිදින ෴

පළමු වසර සැමරුම් ලිපිය

දෙතිස් කතා අද සපුරන්නේ දෙවන වර්ෂයයි. මීට දෙවසරකට පෙර දෙතිස් කතා ඇරඹූ දා පටන් අද දක්වා පල වූ ලිපි ගණන අසූව ඉක්මවයි. එනම් දළ වශයෙන් සතියකට-හමාරකට එක බැගින් ලිපි පල වී තිබේ. මේ දෙවසරට දෙතිස් කතා කියැවීම් 21,000 පමණ වී ඇත. ඒ පසුගිය වසරට වඩා තරමක වර්ධනයකි. පළමු වසරේ දී ලේඛකයෙකු ලෙස සිතුවිළි දෙතිස් කතා වෙත බැඳුණු සේ ම මේ වසරේදී 'අවිද්‍යා' අප හා පෑහීම දෙතිස් කතා වෙත ලැබුණු මහත් ශක්තියෙකි. මේ අයගේ දැනුම ඉදිරියේදී වැඩි වැඩියෙන් දෙතිස් කතා පාඨක සමූහයා වෙනුවෙන් විවෘත වනු ඇත.

පළමු වසරේ වැඩිම කියැවීමක් ලද ලෝකය හට ගැනීම හා එහි නිරෝධය ලිපිය වැඩිම කියැවීමක් ලබමින් තවමත් පෙරමුණේ වෙයි. ඒ ලිපිය මේ වන විට දහස් වරකට වඩා කියවනු ලැබී ඇත. වැඩිම පාඨක ප්‍රතිචාර ලැබූ ලිපිය ලෙස සමනල පව්වේ සිරිපා පිහිටවූ වෙසක් පුර පසළොස්වක ලිපිය අභිබවා ඒ වසරේ පොසොන් හා ඇසළ පෝ දින ලිපි ඉදිරියට පැමිණ තිබේ. මේ ලිපි දෙකම පාඨක ප්‍රතිචාර සියය ඉක්මවා ලබා තිබේ. ඒ සාර්ථක සංවාදයක ලකුණකි. ඒ සියලු සුභ ලකුණු තිබියදීම සංවාද සඳහා සහභාගී වන පිරිසේ අඩුවක් පෙනෙන්නට තිබීම කනගාටුවට හේතුවකි. සිංහලයින්ට සිංහලයින් හා සිංහලෙන් කතා කිරීමට දෙයක් නැත්ද? ඇත්නම් ඒ දෙලොවට වැඩක් නැති ඕපාදූප පමණද?

දෙතිස් කතා ඉදිරි දැක්ම

දෙතිස් කතා වෙත වසරක් පිරෙන දා අප විසින් එහි දැක්ම සටහන් කළ'යුරු පහත දැක්වේ.

අපේ (එනම් 'සිංහල') සම්භාව්‍ය දැනුම ගැන අපේ යම් අවබෝධයක් වේ නම්, එය ඒ දැනුම ලබා ගැනීමට කැමති අය හා බෙදා හදා ගැනීමයි. එසේම, එවැනි දැනුම ඇති තව අය වෙත්නම් ඒ දැනුම අප වෙත ලබා ගැනීමට මණ්ඩපයක් තනා ගැනීමයි. බටහිර දාර්ශනිකයෙක් වරක් පැවසූයේ අප දෙදෙනා සතුව ඇපල් ගෙඩි දෙකක් වේ නම්, අප ඒවා හුවමාරු කර ගත් විට අපට ඇපල් ගෙඩිය බැගින් ලැබේ. එහෙත් අප සතුව දැනුම ඇත්නම්, අප ඒ දැනුම හුවමාරු කර ගත් විට අපේ දැනුම දෙගුණ වේ. යනුවෙනි. එහි සත්‍යයක් ඇත. දෙතිස් කතා ඒ දැනුම හුවමාරු කර ගැනීම පිණිස සැම විටම සැදී පැහැදී සිටී.

ඒ එසේමය. අපට නොමිලයේ පහසුවෙන් බෙදා හදා ගත හැකි යමක් වේද ඒ දැනුමයි. අපේ පැරැන්නන් ඒ ගැන මෙසේ කියා ඇත.

	තිබූ තැනක සොර සතුරන්	ගත නොහෙනා
	එසැඩ මනාවත් වතුරෙන්	වල නොහෙනා
	කෝප වුවත් රජ මැතිඳුන්	ගත නොහෙනා
	උගතමනා ශිල්පයමයි	මතු රැකෙනා

එසේම දැනුම දීම වනාහි ධර්ම දානයකි. 'ධර්ම' යනු බහු අර්ථ පදයක් බව සැළකූ කළ මෙහි අරුත වඩා පැහැදිළිය. දැනුම බෙදා හදා ගන්නා විට ඒ ධර්ම දානයේ ආනිශංස දිට්ඨ ධම්ම වේදනීය වශයෙන් ලැබේ.

දැනුම දීම

දැනුම දීම ගැන කතා කරන විට අප පසුගිය වර්ෂයේ කළ පොත් දන් දීම ගැනද වචනයක් සඳහන් කළ මනාය.

පිදුණු පොත් පොත් වලින් කොටසක් හා ඒවා පිරික්සා බලන ස්වාමින් වහන්සේලා

දහම් අමා පැන් දන්සැල ලෙස අප විසින් නම් කළ මේ කටයුත්ත නම් කොළඹින් ඉතා දුර බැහැර දුෂ්කර පළාතක පිහිටි විහාරස්ථානයකට අප විසින් මිලදී ගත් පොත් පත් ගෙන ගොස් පරිත්‍යාග කිරීමයි. මේ කටයුත්තට බරපැන දැරීම දෙතිස් කතා පාඨකයින් වෙත නොපැවරුවත් සිතුවිළි ඇතුළු සහෘදයින් විසින් සුදුසු පොත් පත් වල නම් යෝජනා කරමින් ඊට දැක්වූ සහයෝගය සිහි කළ මනාය. එසේම අපගේ පළමු පාඨකයාගේ සාදර අනුග්‍රහයෙන් පොරොන්දු වූ පරිදි බුදුසරණ පුවත්පත ඒ විහාරස්ථානය වෙත ලැබෙන්නට සැලැස්වූ බවත් එය තවමත් අඛණ්ඩව ලැබෙන බවත් මෙහි සටහන් කොට තබන්නේ කෘතවේදිත්වයෙනි. ඒ ගැමියන් සහ විහාරස්ථානයේ ස්වාමින් වහන්සේලා මේ පොත්-පත් කියවන වාරයක් වාරයක් පාසා ඔබලාට සිදු වන පින අප්‍රමාණ වේ.

එසේනම් පසුගිය සියවසේ පහල වූ මහා ප්‍රාඥයා වන කුමරතුඟු මුනිදස් පඬි තුමන් විසින් දැනුම ගැනැ ලියැවුණු කවියෙකින් මේ හෑල්ල අවසන් කරමු.

	පොරණ පඬින් කළ පත	පොත්
	නුවණ ලැබෙයි කියැවුව	හොත්
	නො දැනැ අකුරු කියවනු	නැත්
	අකුරු තමා නුවණ	දෙතොත්
	උදය මැ නින්දෙන්	නැගෙන් නැ
	පිරිසුදු වී තැනෙකැ	ඉන් නැ
	අකුරට බුහුමන්	කරන් නැ
	නුවණ වඩින දොර	හරින් නැ

පසු සටහන: මේ වසරේ පොත් ලබා දීමේ අදහසක් නැත. ඒ වෙනුවට වෙනත් ප්‍රදේශයක පැවැත්වෙන කඨින පිංකමකට දායක වීමේ සැළසුමක් පවතී.

• කඨින පූජා ගැන සටහනක්