සිරකරුවා අභාවප්‍රාප්ත විය

ශ්‍රී බුද්ධ වර්ෂ 2557 ක් වූ උඳුවප් පුර නවවක නම් තිථිය ලත් බුධ දින.

දකුණු අප්‍රිකාවේ ප්‍රථම කළු ජාතික ජනපති ලෙස තේරී පත් වූ නෙල්සන් මැන්ඩෙලා මහතා වසර අනූපහක් ආයු වළඳා පසුගිය පස් වැනිදා පරලෝ සැපත් විය. දේහය පිලිබඳ අවසන් කටයුතු එළඹෙන පහළොස් වැනිදා ඔහුගේ වාස භූමිය වන 'කුනු' ගම්මානයේදී සිදු කෙරේ.

මළගෙදර ගිය ඇත්තෝ - සාදර අනුග්‍රහය සී.ඇන්.ඇන්.

ඔහු පිලිබඳ අන්තර්ජාලයේ බොහෝ ලිපි පල වූ මුත් අප මිතුරු ජොසෙෆ් විසින් රචනය කරන්නට යෙදුණු ලිපියක් අපගේ සිත් ගති. මේ ලිපිය සංස්කරණය කළ යුතුද නොයුතුද යනු බොහෝ කොටම කල්පනා කර අවසානයේ සංස්කරණය නොකරන්නට තීරණය කළෙමි. පහත දැක්වෙන්නේ ඔහුගේ එම ලිපියයි. එය දුලංජන් විජේසිංහ නම් ලේඛකයෙකු විසින් "මැන්ඩෙලාලාගේ සුසමාදර්ශය ...." නමින් යුතුකම සංවාද කවය නම් වෙබ් අඩවියේ පල කළ ලිපියකට කළ විවරණයකි. දුලංජන්ගේ ලිපිය වෙත ඉහත බැඳිය මතින් ගමන් කළ හැක.

මැන්ඩෙලා පුනරුත්ථාපනය කිරීම

හිටපු ත්‍රස්තවාදියෙකු වන අභාවප්‍රාප්ත නෙල්සන් මැන්ඩෙලා, දකුණු අප්‍රිකාවේ හිටපු ජනපති තුමා ගැන දුලන්ජන් විජේසිංහ මහතා කියන මේ කතාවේ ඇත්තක් පවතී. මේ කරුණ ඔහු අභාවප්‍රාප්ත වූ දින වලම ලිවීමට සිතුනු මුත් නොලියා සිටියේ මලගිය ප්‍රාණකාරයාට අපහාස කලැයි සමහරු චෝදනා කළ හැකි නිසාය.

ඇත්ත කතාවනම් සුද්දන් විසින් හිර ගෙට දැමුවේ ත්‍රස්තවාදියෙකි. ඔහු හිරගෙට දමා සුද්දන් නිකං කන්න දෙමින් හිටියේ නැත. ඔහු පුනරුත්ථාපනය කළේය. ඒ පුනරුත්තාපනයට වසර 27 ගත වීම සුද්දන්ගේ දුර්වලතාවයක් හෝ මැන්ඩෙලාගේ හිතේ ශක්තිමත්භාවයක් හෝ නොවේ. එක් පසෙකින් ආප්ප බානවා සේ ත්‍රස්තවාදීන් පුනරුත්තාපනය කළ නොහැක. ලංකාවේ අත්අඩංගුවේ සිටින ත්‍රස්තවාදීන් වහා නිදහස් කරන්නැයි අපට බල කරන සුදු කරපටි ත්‍රස්තවාදීන්ගේ උපක්‍රම අප තේරුම් ගත යුත්තේ මේ සන්ධර්භය තුලය.

දෙවනුව පුනරුත්තාපනය කළ ත්‍රස්තවාදීන් පිළිගැනීමට බලා සිටින පරිසරය පුනරුත්තාපනය කළ යුතුය. දකුණු අප්‍රිකාවේ සුදු ආණ්ඩුව ඒ කටයුත්ත හොඳින් කළේය. පුනරුත්තාපනය කෙරුණු නෙල්සන් මැන්ඩෙලා සමාජයට මුදා හරින මොහොත වන විට ඔහු නැවත ත්‍රස්තවාදය කරා යා නොහැකි ලෙස රූපාන්තරණය වී සිටියා පමණක් නොව ඔහු ත්‍රස්තවාදය කරා ගෙන යා හැකි මට්ටමේ කළු ජාතික ක්‍රියාකාරීන් දෙවියන් වහන්සේගේ තුරුලට යැවීමට සුදු ආණ්ඩුව කටයුතු කර තිබිණි. කළු ජාතික නිදහස් ව්‍යාපාරය ඩෙස්මන් 22 වැනි පල්ලි ඒජන්තයින්ගේ අත් අඩංගුවට පත්ව තිබිණි. මතුපිටින් සුදු ආණ්ඩුවට සම්බාධක පනවා අනෙක් පසින් හිරේ සිටින මැන්ඩෙලා සුද්දන්ගේ වීරයෙක් කළ බටහිර රටවල් ඉන් කළේ මැන්ඩෙලා අත්අඩංගුවට ගැනීමයි. නිදහස් වූ මැන්ඩෙලා හිරේ සිටි මැන්ඩෙලාට වඩා හිරකරුවෙක් බව මගේ අදහසයි. ඔහු හිරකරුවෙක් වූයේ ඉනියා ලෝක ප්‍රජාව ලෙස හැඳින්වෙන පල්ලිය, බටහිර රටවල ආණ්ඩු හා නොරාජ්‍ය සංවිධාන වලටයි.

ඒ හිරගෙයි ඔහු හා එක්ව ලැගීමට නොකැමැති වූ විනී මැන්ඩෙලා දික්කසාද කිරීම අහඹුවක් නොවේ.

පුනරුත්තාපනය කෙරුණු මැන්ඩෙලා සුද්දන්ගේ ජනපති විය. ඔහු කල්ලන්ගේ ජනපති වූයේ සුද්දන් විසින් පුනරුත්තාපනය කෙරුණු බව ඒ කල්ලන් නොදැන සිටි නිසාද නැතහොත් කල්ලන්ද ඒ වන විට පුනරුත්තාපනය වී සිටි නිසාදැයි කීමට අප නොදන්නා මුත් මැන්ඩෙලා ජනපති වීමෙන් කල්ලන්ට කල්ලන් වශයෙන් ලැබුණු දෙයක් නැති බව අප තේරුම් ගත යුතුය. කල්ලන් කළු සුද්දන් කිරීමේ ඩෙස්මන් 22 ගේ ව්‍යාපාරය ජයටම කෙරීගෙන යයි. නෙල්සන් මැන්ඩෙලා ඉත්තෙක් පමණි. මැන්ඩෙලා නිදහස් කළ බව අපට කීවත් ඇත්ත වශයෙන් සිදු වී ඇත්තේ සුද්දන් නෙල්සන් මැන්ඩෙලාගෙන් නිදහස් වීමයි. දකුණු අප්‍රිකාවේ සුදු ආණ්ඩුව නෙල්සන් මැන්ඩෙලාගෙන් නිදහස් විය. ඊනියා ජාත්‍යන්තර ප්‍රජාව ඔහු අත්අඩංගුවට ගත්තේය. 1964 දී දකුණු අප්‍රිකානු ආණ්ඩුව විසින් ජීවිතාන්තය දක්වා සිරගත කෙරුණු නෙල්සන් මැන්ඩෙලා පසුගියදා විලංගු සහිතවම හිරකරුවෙකු ලෙස අභාවප්‍රාප්ත විය. ‘මුගේ මල කුණත් විකුණන් කමු’ කියා සිතූ ඔහුගේ අයිතිකරුවෝ සුපුරුදු ලෙසම මාධ්‍ය සංදර්ශන පවත්වමින් සැණකෙළිය පටන් ගත්හ. ඒ සැණකෙළියේදී කළු ජාතිකයින්ට විමුක්තිය උදා කර දුන් වීරයෙකු ලෙස මැන්ඩෙලා ඇගයෙනු ඇත. එහෙත් මැන්ඩෙලාගේ හාම්පුතුන්ට මිස මැන්ඩෙලා ඇතුළු කළු ජාතිකයින්ට ඒ උළෙලේ වැදගත් කමක් හිමි නොවනු ඇත. මැරුණු මිනිහට වැදගත් කමක් අත් නොවන මළ ගෙයක යෑමෙන් අප රට වැනි ඊනියා ජාත්‍යන්තර ප්‍රජාවට අයත් නොවන රටක රාජ්‍ය නායකයෙකුට ලැබෙන දෙයක් නැත.

මැන්ඩෙලාගෙන් රටක් වශයෙන් අප ඉගෙන ගත යුතු පාඩම එයයි. ලංකාවේ ත්‍රස්තවාදීන් සම්බන්ධයෙන් ක්‍රියා කිරීමේදී පුනරුත්තාපනය වැදගත්ය. එළියේ ඉන්න සුදුකරපටි ත්‍රස්තවාදීන් අල්ලා ඇතුලට දමා පුනරුත්තාපනය කළ යුතුය; උන් කුරුසය එල්ලන් යන කළු පටි කාරයින් වුවත්, නළලේ අළු ගාන සුදු වේට්ටි කාරයින් වුවත් එය අදාළ නැත.

අප මිතුරු ජොසෙෆ් ඉහත දක්වන අදහසේ අතිශය වැදගත් කමක් ඇත. සිපිරි ගෙය නෙල්සන් මැන්ඩෙලා වෙනස් මිනිසෙක් කළ බව සියළු දෙනා පිළිගනී. සත්විසි වසරක් යකඩ කූරු පසුපස ගත කළ ඔහුගේ කළු කෙස් සුදු වූයේ ඒ බිත්ති හතර ඇතුළතය. මැන්ඩෙලාගේ යෞවනය උදුරා ගත් පාළු සිර කුටිය ඔහු පරිණත මිනිසෙක් කළ බව ජනප්‍රිය මතයයි. එහෙත් මිතුරු ජොසෙෆ් මේ දෙස වෙනස් ආකාරයක දෘෂ්ටියක් හෙළයි.

අපට වඩාත් වැදගත් වන්නේ ඔහු ඒ දෘෂ්ටිය තුලින් පැමිණෙන නිගමනයයි. දකුණු අප්‍රිකාවේ 'සුදු' වර්ගවාදී ආණ්ඩුව ලෝකයෙන් පැමිණි ඉතාම දැඩි බාධක හමුවේත් මැන්ඩෙලා වැනි කීර්තිමත් නිදහස් සටන්කාමියෙක් හීලෑ කර ගැනීමට සමත් විණි නම් ලංකාවේ සිටින තුට්ටු දෙකේ කොටි හිතවාදීන් හීලෑ කර ගැනීමට ලංකාණ්ඩුවට නොහැකි ඇයි? මිතුරු ජොසෙෆ් පිළිතුරු නොදෙන ප්‍රශ්නය එයයි. පිළිතුර පැහැදිළිය. දකුණු අප්‍රිකාවේ සුදු ආණ්ඩුවට ජාතික අභිලාශයක් තිබිණි. ඒ දකුණු අප්‍රිකාවේ ජීවත් වන සුදු ජාතිකයින්ගේ ප්‍රගතිය ශාක්ෂාත් කර දීමයි. ලංකාවේ ආණ්ඩුවට එවැනි අභිලාශයක් තිබේද?