Monday, June 10, 2013

සිහිල් අමා පැන් දන්සැල ෴

මේ කතාව වෙසක් දින වල පුවත් පතකින් කියවූ දෙයක්, පාඨක ලිපියක්. සියලු දේ එලෙසම මතක නැති උනත්, කතාවේ හරය වෙන්නේ, මේ වෙසක් සමයේ සිය මුළු පවුලම රථයේ නංවාගෙන අගනුවර වෙසක් සිරි නැරඹීමට ගිය කෙනෙක් තමන් තරුණ වයසේ අත්දුටු සිදු වීමක් විස්තර කිරීමයි.

ඒ මහතා තරුණ කාලයේ මිතුරු කැල සමග වෙසක් බලන්නට ගොස් තිබේ ලු. දන්සල් වලින් සංග්‍රහ විඳිමින් ගියත් අද තරම් එකල දන්සැල් තිබී නෑ. නන් විසිතුරු වෙසක් පහන් කූඩු බලමින්,තොරන් බලන සෙනග අතර තෙරපෙමින් බොහෝ වෙලා ගමන් කළ මේ පිරිසට ඇති වූයේ දැඩි පිපාසයක්‌. පහසුම ප්‍රතිකර්මය මග අයිනේ සිටින සරුවත් හෝ වෙනත් පැණිබිම වෙළෙන්දෙකුට ගානක් සපයා දී පිපාසය සංසිඳවා ගැනීම වුවත්, මේ තරුණ පිරිස ඊට එකඟ වී නෑ. මෙච්චර දන්සැල් තියෙද්දී සල්ලි දීල බීම බොන්න පිස්සුද... එකෙක් කීවම අනිත් උනුත් හිස සලා අනුමත කරන්නට ඇති. එසේ නැතිනම් ඇත්තම හේතුව ප්‍රමාණවත් මුදලක් අතේ නොතිබීම වන්නටත් හැක.

කෙසේ හෝ, මේ පිරිස එකඟ වන්නේ බීම දන්සැලක් සොයා ගැනීමටයි. මතකය නිවැරදිනම්, ස්ථානය කොළඹ නවම් මාවත. ඔන්න ගහල තියෙනවා ලොකු බැනර් එකක්.

මේ අයට හරි සතුටුයි. වැඩි පොලිමකුත් නෑ. හැබැයි පාරට ගෙනත් දෙන කෙනෙකුත් නෑ, ඇතුලට ගිහිං තමයි ගන්න ඕනේ.

ඕන එකක්, ප්‍රීති වෙසක් කියල මේ කට්ටිය බයිසිකල් හෙම අයිනෙන් නවත්තල (එයාල ගියේ පයින්ම නම් ඉතිං නවත්තන්න බයිසිකල් නෑ ඕං) පඩිපෙළ නැගල යන ගමන් කෝකටත් කියල මග හිටි තලත්තෑනි කෙනෙකුගෙන් අහන්න හිතලා මාමේ, මේ දන්සැල... කියනකොටම ඒ උන්දැත් කියපි හරි පුතාලා, ඔය කෙලින්ම ඇතුලට යන්න. ඇතුලේ ඉඩ තියෙනවා.. කියල.

ඔන්න අපේ සෙට් එක දිව විකාගෙන කෙල පෙරාගෙන ගියාලු "අමාපැන්" බොන්න. ලොකු හෝල් එකක් පුරවලා පෙළට පුටු තියලා ලොකු මේස දිගට පොත් ගොඩ ගහල තියෙනවලු, කැමති කෙනෙකුට කැමති පොතක් අරන් කියවන්න. ඒ තමයි "අමාපැන් දන්සැල".

මේ කතාව පත්තරේ කියවලා මට මතක් උනේ "ගෝනි එළුවා" ගේ කතාව. ඒකත් ඇත්තටම උන දෙයක් ලු. අනිත් එකා තමයි "පැදුරු එළුවා".

අමා පැන් ගැන මේ කතාව ලියවුණේ වෙනත් කාර්‍යයක් නිසා. දෙතිස් කතා කියවන අපේ මිතුරන්ට පුළුවන් නේද මේකට උදව් කරන්න.

මේකයි, කර්තව්‍යය.

අපිට පොත් ලැයිස්තුවක් හදා ගන්න ඕනේ අර වගේ අමා පැන් දන්සැලකට. වෙනත් වචනයකින් කියනවනම්, පොත් ගුලකට. දැනට දෙන්න වැඩි විස්තරයක් නම් නෑ. සාමාන්‍ය ගැමි ජනතාව එක් රොක් වන කොළඹින් ඉතා දුර බැහැර (250 km පමණ) විහාරස්ථානයකට තමයි මේ පොත් යන්නේ.

සියලුම පොත් පෞද්ගලිකව කියවා ගුණ දොස් බැලිය නොහැකි නිසා ඔබලා කියවූ පොත් වලින් සුදුසු ඒවා නිර්දේශ කළ හැකිනම් අපට පහසුවක්. එසේම, ඒ පොත් මිලදී ගත හැකි ස්ථාන සහ දළ වශයෙන් ඒවායේ මිල ගණන් ද ඉදිරිපත් කළ හැකිනම් තවත් අපූරුයි. කට්ටල වශයෙන් මිලදී ගත හැකි පොත් (උදා. රේරුකානේ හිමිගේ පොත්) එසේ කට්ටල වශයෙන්ම මිලදී ගන්නා විට වට්ටම් ලැබෙන තැන් ගැන දැන ගැනීමට ලැබේනම් එය අමතර වාසියක්.

මේ ඔබලාගේ අවස්තාව.
...

38 comments:

  1. 1. මහාවංශය
    2. පන්සිය පනස් ජාතකය
    3. උම්මග්ග ජාතකය

    ඕනෑම කෙනෙකුට ඔය තුන ඇති, සිංහලයෙක් වෙන්න.
    කැමතිනම් මමත් දායක වෙන්නම්.

    ReplyDelete
    Replies
    1. "මහරහතුන් වැඩි මග ඔස්සේ" මම හිතනවා මෙහි පොත් පෙළක්ම ඇති නිසාත් සරලව ධර්ම කරුණු විග්‍රහ කරන නිසාත්, ඕනෑම කෙනෙකුට තේරුම් ගැනීමට පහසුයි කියලා.ඒ නිසා අමා පැන් දන්සැලට මේ පොතත් සුදුසුයි කියා මම යෝජනා කරනවා.

      තෙරුවන් සරණයි !!

      Delete
    2. ඔව් "මහරහතුන් වැඩි මග ඔස්සේ" පොත් දෙකක් නිකුත් වී ඇති බව දන්නවා. ඒ දෙක ඉතා හොදයි.

      Delete
  2. සිතුවිළිJune 10, 2013 at 12:26 PM

    සුළු වශයෙන් හෝ දායක විය හැකිනම් අගෙයි.
    ඉතාමත් අගනා කාර්‍යයක්.

    ජයසේන ජයකොඩි ශූරීන්ගේ පිච්ච මල පොත් පෙල හොඳයැයි මා සිතනවා පොත් 7 කින් සමන්විත ඒ නව කථා මාලාව කෙනෙකුට දහම් පොතක් නොවනා පොතක් තුලින් ධර්මය කියැවීමට අවස්ථාවක් දෙනවා. එසේම ඒ තුලින් ධර්මය කියැවීමට පෙළැඹවීමක් ලබනවා.

    ඖශධයේ අනිසි ඵල:
    උවමනාවට වඩා කියවන්නාගේ මනස උපේක්ශාවට පත්වීම මගින් කියවන්නා තුළ යම් උකටලී බවක් ඇති වෙනවා.


    තව යෝජනා ඉදිරියට

    ReplyDelete
  3. මිතුරනි,

    කරුණු එකිනෙක පටලා නොගන්න. පළමු දේ පළමුව. අප ඉල්ලූ උදව්ව පොත් ලැයිස්තුවක් සාදා ගැනීමටයි. මට තවත් දෙයක් සිහියට නැගුනා. සැප්තැම්බර් මාසයේ පොත් ප්‍රදර්ශන පැවැත්වෙන බැවින් අඩු මිලට පොත් ලබා ගැනීමේ හැකියාවක් පවතින බව අද සිහි වුනා. ඒත් දැනට අවශ්‍ය වන්නේ පොත් ලැයිස්තුවක් සකසා ගැනීම පමණයි. මේ පෞද්ගලික පරිත්‍යාගයක් වන බැවින් පොත් දහස් ගණනක් නම් ගෙන යාමේ හැකියාවක් නෑ. ඒ නිසයි වඩාත්ම වැදගත් පොත් පමණක් මිලදී ගත යුතු වන්නේ. ඒ සඳහායි අපට ලැයිස්තුවක් අවශ්‍ය.

    ජොසෙෆ් නම් කළ පොත් නම් ප්‍රසිද්ධ පොත් හල් වල නැතිනම් නැඳිමාලේ බෞද්ධ මන්දිරයේ තිබිය යුතුයි. බිංදු නම් කළ 'මහරහතුන් වැඩි මග ඔස්සේ' යන පොත් දෙක දිවයින කාර්යාල වලින් සහ තව කිහිප තැනකින් මිලදී ගත හැකි බව මතකයි.

    ඔබලා පොත් නම් කරන විට මිලත්, එසේම මිලදී ගත හැකි තැනත් සඳහන් කළ හැකිනම් අගෙයි. මෙතෙක් දැක්වූ සහයෝගයට පින්.

    ReplyDelete
    Replies
    1. ...සිතුවිළි නම් කරන පොත් කට්ටලය ගැනත් සොයා බලන්නම්.

      Delete
    2. සිතුවිළිJune 14, 2013 at 1:07 PM

      කේ,
      මා නම් කළ පොත් ප්‍රකාශකයා වන දයාවංශ ජයකොඩි සමාගමින් ගන්නා විට වට්ටම් ලබා ගත හැකියි.
      මා සිතනා හැටියට දහම් පොත් කියැවීම හුරු නොවූ උන්හට දහම් පොත් කියවීම දුශ්කරයි. එම නිසා දහම් පසුබිමක් සහිතව ලියැවුනු නව කථා ආරේ පොත් සහ ජාතක කථා වුවත් සරළ භාවිත සිංහලින් ලියැවුනු ඒවානම් වඩා ඵලදායක බවයි මා සිතන්නේ.

      එසේම බිංදුගේ අදහසත් ඉතා හොඳයි, පැරනි පොත පතින් ලද හැකි ආභාශය ඉතා හරවත්. උදාහරනයක් හැටියට ගතහොත්, "සිරිත් මල්දම" වැනි කෘති කියැවීමට ළමා පරපුර යොමුකළ හැකිනම් එම අවස්ථාව ප්‍රයෝජනයට ගත යුතුයි.

      Delete
  4. තවත් යෝජනාවක් කරන්න කැමතියි. ධර්ම කරුණු ඇතුලත් පොත පත මෙන්ම හරවත් ජීවිතයකට මහොපකාරී වන , අපගේ භවිතයෙන් ඉවත් වන්න අර අදින අපගේ කතන්දර ඉතිහාසයේ ඇති වටිනා කථා පොත් ටිකක් පොඩි ළමයින් වෙනුවෙන් අරගත්තොත් නරකද? මොකද දැන් අලුතින් එන පත පොත ළමා මනස විකෘති කරන කතන්දර මිසක් කිසිම හරයක් ඇති දෙයක් නැත.මේ ගැනත් ඔබ සියළු දෙනාම සිතා බැලුවොත් අපුරුයි නේද?

    ReplyDelete
  5. සිතුවිළිJune 17, 2013 at 8:26 AM

    ඇයි මේ සියල්ල එක තැන නැවතිලා?

    සතියකට වරක් වත් අළුත් ලිපියක් පල කරමු එතකොට යම්කිසි ක්‍රියා කාරිත්වයක් පවතීවි.
    මෙසේ දීර්ග ලෙස නිහඬ වූවොත් පැමිණි පාටකයින් ක්‍රමයෙන් හැරදා යාවි.
    බොදු ලිපි වලට අමතරව වෙනත් ආකාරයේ ලිපි මාලාවක් පටන් ගතහොත් කෙසේද? බොදු ලිපිය පොහොයටත් අතරින් වැදගත් අන් යම් බොදු ලිපියකුත් පල වුනොත් එය හොඳින් සාකච්චාවට බඳුන් වේවි.
    හිතා බලමු

    ReplyDelete
  6. හික් හික් ...

    ඔව් සිතුවිළි කියන කතාව ඇත්ත. මමත් ටිකක් කාර්ය බහුල උනා තමයි. ඒත් දැන් අලුත් ලිපියකට කාලේ හරි. අඩු ගානේ විනෝද සමයමක් වත් බස්සන්න. කිසිම දෙයක් නැතිනම් මමවත් මොනවා හරි ලියල එවන්නද (විහිළුවක් කළේ .. ;) සීරියස් ගන්න එපා !)

    ReplyDelete
    Replies
    1. ඒක නෙමෙයි, පොත් වැඩේ නැගල යනවද?

      ඒක ඉවරද, කොයි කාලෙද කරන්න හදන්නේ?

      මෙහෙම දෙයක් තියෙනවා... ඉවසන් ඉන්න පුළුවන්නම් සැප්තැම්බර් වලදී මෙයාල නියම ගානට පොත් විකුණනවා. හදිසි උනොත් වැඩියෙන් ගෙවන්න වෙනවා. ඒ ගැන පොඩ්ඩක් හිතන්න.

      Delete
  7. මිතූ
    සාහිත්‍ය මාසය උදා වනතුරු අපිත් ඉවසගෙන ඉමු පොත් පරිත්‍යාගය සදහා. ලාබෙට හොද පිනක් කරගන්න පුළුවන් එතකොට,

    ReplyDelete
  8. http://199.91.154.109/1uty5a7vst4g/498gh7bjv778s85/rathu+edda.pdf
    හීන් සැරේ

    ReplyDelete
  9. @ කේ: පළමුව මෙවන් සද් කාර්යක් ඉටු කිරීම වෙනුවෙන් කේ ට පින් සිදු වේවා යැයි පතමු. දෙවනුව, ජාලයේ වෙස් මුහුණු සහිතව මේ ගැන කොමෙන්ටු ලියනවාට වඩා යමක් කිරීමට හැකියාවක් නැතිකම ගැන කණගාටු වෙමු. මේ කාරිය තවම නොනිමි නම් (කේ සදහන් කර ඇති) රේරුකානේ හිමියන්ගේ පොත් සහ ධම්මපදය අපි යෝජනා කරමු.

    @ Joseph: 1. මහාවංශය, 2. පන්සිය පනස් ජාතකය, 3. උම්මග්ග ජාතකය ------ මේ දුටු මට පළමුව සිනා පහල විය. 1. මේ පොත් තුනම ඔබ මුළුමනින්ම කියවා තිබේද? ඔව් නම් ඔබ ඇදහිය යුතු 'පොරකි'. නැත නම් ඔබ කේ ගේ උපදෙස් පිළිපැද නැත. (මේ ලැයිස්තුවට මිලින්ද ප්‍රශ්නය හා විසුද්ධි මග්ගයත් එක් වී නම් අගනේය.) 2. මේවා පොත්ගුලෙක තිබිය යුතු පොත් බව නම් සැබෑය. එහෙත් කී දෙනෙක් මේවා කියවයි දැයි නම් සැක සහිතය. (FYI, අපද මේවා අතරින් පතර මිස සම්පුර්ණයෙන් කියවා නැත.) බිංදු විසින් නිර්දේශිත 'මහරහතුන් වැඩි මග ඔස්සේ' යනු ඉතා පරිස්සමෙන් කියවිය යුතු පොත් (ලිපි) පෙළකි. අපගේ වැටහීමේ පමණට එම බොහෝ ලිපි බවුන් වඩන යෝගාවචරයන් හෝ ගිහි ගෙයින් නික්මුණු උදවිය උදෙසා වෙයි. එහි ඇති දේ සරල ලෙස පෙනුනද ඒ, බෙහෙවින් ගැඹුරු දහම් කරුණුය. මේ කියනුයේ ඒ වැරදි නිර්දේශයක්ය යන්න නොවේ. වෙසෙසින්, පන්සලක පොත් ගුලකට බැවින් ඒ නිර්දේශය අපිදු අනුමත කරමු. ------- සිතුවිළි විසින් නිර්දේශිත ආධුනික පාඨකයාට කියවීමට ලෙහෙසි හා කියවීමේ රුචිය වඩවන ජයසේන ජයකොඩිගේ පොත් අපිදු අනුමත කරමු. අප වැඩිය කියවා නැතිමුත් කිරිබත්ගොඩ හිමියන්ගේ පොත්ද සුදුසු යයි සිතමු.

    ReplyDelete
    Replies
    1. සිතුවිළිJune 27, 2013 at 10:14 AM

      කිරිබත්ගොඩ හිමිගේ පොත් හැර, සිත්ගේ අදහස් හා ගැටීමට කරුනක් නැත. ජෝසප්ට කියා ඇති දේ ගැන මා අදහස් පල නොකරමි.
      කිරිබත් ගොඩ හිමිගේ පොත් මා කියවීමට උත්සහ කොට ඇතත් ඉන් ලද යන්මක් නම් නැත, හේතුව ඒ බොහෝ සේ සරළ කළ බුදු දහමකි. ඒ සරළ කිරීම මා පිළි නොගනිමි මන්ද ඒ සරළ කළ හැකිනම් බුදු රදුන් එය කරනු ඇත. අනුනට පාන්ඩිත්ත්‍යය පෙන්වීමට තරම බුදු හිමියන් උන්මත්තකයෙකු නොවෙයි. උන් වහන්සේ සියළු කෙළෙසුන් නැසූ උතුමෙකි. එම නිසා එහි සංශෝදනයක් කිරීමට ඉඩක් ඇතැයි මා පිළි නොගනිමි.

      Delete
    2. 1. මහාවංශය - මේසය මත දැනුත් ඇත.
      2. පන්සිය පනස් ජාතකය - වෙසක් මාසය තෙක් වසර ගණනක් අප සතුව පැවතිණි. මුළුමනින්ම කියවා ඇත.
      3. උම්මග්ග ජාතකය - සම්පුර්ණ පොත නොව කොටස් අඩු ඉතා පැරණි පොතක් අප සතුව වෙයි. එහෙත් සම්පුර්ණ පොත පුස්තකාලයෙන් කියවා ඇත.
      මිලින්ද ප්‍රශ්නය - පුස්තකාලයෙන් ලබාගෙන තැන් තැන් වලින් කියවා ඇත.
      විසුද්ධි මග්ගය - කියවා නැත.

      SiTh,

      කී දෙනෙක් මේවා කියවයිද යනු ඇත්ත වශයෙන්ම සැක සහිතය. ඒ බව පන්සියපනස් ජාතක පොත තුලින් අත්දැකීමෙන් දිටිමි. මේ පොත අප විසින් මිලදී ගන්නා ලද්දේම ධර්ම දානය පිණිසමයි. එහෙත් එය අප සතුව පැවති වසර ගණනට සම්පුර්ණයෙන් කියෙවුවේ අපම පමණයි. දැන් එය සාංඝික කර දුන් පසු කවුරු කියවත්දැයි නොදනිමි. එයයි තත්වය. බොහෝ දෙනෙක් කන් දෙකෙන් වැඩ ගෙන පුරුදු ය. එක කණකින් අසා අනෙක් කණින් පිට කරයි. කන් සිදුරු දෙක අතර පිහිටි මොළය වැඩ නොකරයි. අද බොහෝ අය බලාපොරොත්තු වන්නේ එවැනි පොත්ය. කියවා සිතීමට පෙළඹෙන්නේ ඒ සම්බන්ධ විභාගයක් ඇත්නම් පමණි.

      මේ තත්වය යටතේ මේ පරිත්‍යාගය ගැන අපගේත් සැකයක් ඇති නිසාමයි ඔබලාගේ අදහස් විමසන්නේ. මෙතෙක් දුන් අදහස් වලට පින්.

      බොහෝ විට මෙය අගෝස්තු 31 සිට සැප්තැම්බර් 30 අතර දිනයක සිදු වේවි. වැඩි විස්තර වරින් වර ඉදිරිපත් කරන්නම්.

      Delete
    3. SiTh,

      එසේනම් ඔබ මා බාගෙට ඇදහිය යුතු බව මතක් කරමි. පන්සිය පනස් ජාතකය කලකට ඉහත බුදුසරණ පත්‍රයේ කොටස් වශයෙන් පල විය. මගේ මිත්තණිය (මවගේ මව් - ඈ බෞද්ධ බව මතක් කරමි) බුදුසරණ සිරිතක් ලෙස ගත් අතර මා ඒවා එකතු කරගෙන (සියල්ල නොවූවත්) පන්සිය පනස් ජාතකය බොහෝ දුරට කියවීමි. මහාවංශය හා උම්මග්ග ජාතකය මිතුරන්ගෙන් ලබාගෙන කියවා ඇත. එහෙත් ඒවායේ වැදගත් කම දැන ගත්තේ නම් පසු කාලීනව බව පිළි ගත යුතුය. ඒ නිසායි මා දෙසිතක් නැතිවම ඒවා යෝජනා කළේ.

      මා මීට තව පොත් දෙකක් එකතු කරමි. ඒවා සම්පුර්ණයෙන් කියවා නැතත්, කොටස් කියවා ඇත.

      1. අමාවතුර
      2. බුත්සරණ

      මීට අමතරව, සද්ධර්ම රත්නාවලී නම් පොතේත් ඇත්තේම බණ කතා නේද? අද අවශ්‍ය වන්නේ මෙවැනි පොත් කියවන, ඒවායේ චරිත තම පරමාදර්ශ කර ගන්නා පරපුරකි.

      Delete
    4. @ Joseph:

      ඔබේ ප්‍රතිචාරයට තුති. අපගේ පෙර කොමෙන්ටුවේ අමතක වූ යමක් නම් (සංක්ෂිප්ත හා නිදාන සහිත දෙවිදිහේම) ධම්මපදයයි. මෙහිදී ඔබත් මාත් කර ඇත්තේ අපේ පැරණි ගද්‍ය සාහිත්‍යයේ සම්භාව්‍ය කෘති කිහිපෙක නම් කේ වෙත ඉදිරිපත් කිරීමයි. පූජාවලිය, ලෝවැඩ සඟරාව, බුදුගුණඅලංකාරය වැනි එවන් බොහෝ පොත් මේ ලැයිස්තුවට එකතු කළ හැක. මේ පොත් ගැන (අවැසිනම් කේ ට මතක් කරනවා විනා) අමුතුවෙන් කියා දිය යුතු නොවේ. අද කල විවිධ කතුවරුන් අතින් අළුතෙන් පිටවූ නවකතා, දහම් පොත් ආදිය වේ. එවැනි පොත් කේ කියවා තිබීමට ඉඩ අඩුය. එබැවින් පුස්තකාලයකට මිලදී ගැනීමේදී එවන් පොතක් ගැන තීරණය කිරීම අපහසුය. මා සිතනුයේ කේ ට සැබවින්ම දැන ගැනීමට අවැසි අප කියවා සෑහීමට පත් එවැනි පොත් කවරේද යන්නය. එලෙස බලද්දී කේ ට ප්‍රයෝජනවත් ප්‍රතිචාරයක් ලැබී ඇත්තේ සිතුවිළි හා හීන්සැරේ ගෙන් පමණි. එවැනි පොත් පුස්තකාල වලින් මා කියවා දැන් බොහෝ කල් බැවින් නම් අමතකය: මතකයේ ඇති එකම පොත අවාන් චා හිමියන්ගේ නිසල විල ය.

      Delete
    5. @ කේ:

      Joseph හා අප දැක්වූ පොත් පුස්තකාලයක තිබිය යුතු පොත්ය. විභාග වලට අවැසිනම් හැර එවන් පොත් අප වැනි මොඩ් නොවූ පොෂ් නොවූ කවුරුන් හෝ දක්නා තෙක් දුහුවිලි පහස විඳිමින් රාක්කයේ හුදෙකලාව සිටිනු ඇත. වැදගත් වනුයේ සමාජයේ බහුතරය කියවීමට රුචි පොත් ද එහි තිබීමයි. එසේ නොවන විට එවන් පුස්තකාලයකට එන කෙනෙක් නොවනු ඇත. සාමාන්‍ය පාඨකයා පළමුව ඇදෙන්නේ ලස්සන පිටකවරයටයි. පොත හුරුබුහුටි නැවුම් සොබාවයෙන්ද තිබීම ද ඔහුට වැදගත්ය. කතුවරයාගේ නම ප්‍රසිද්ධ එකක් වීම ද වටී. 'උගත්' පාඨකයා කතුවරයාගේ නම අගට ඇති අකුරු හෝ මුලට ඇති උපාධි නාම වලට ද ඇදේ. දහම (මෙන්ම වෙනත් දේද) වැටහෙන්නේ තම තම නැණ පමණට බැවින් විවිධ 'මට්ටමේ' පොත් පුස්තකාලයක තිබිය යුතුය. සරසවි, ගුණසේන, ගොඩගේ හෝ දයාවංශ වැනි පොත් හලෙක බෞද්ධ පොත් අංශයේ තරමක වෙලාවක් ගත කරන්නේ නම් එවන් පොත් කිහිපයක් තෝරා ගැනීමට ඔබට හැකිවනු ඇත.

      Delete
    6. @ සිතුවිළි:

      කිරිබත්ගොඩ හිමියන්ගේ පොත් එකක් දෙකක් මිස වැඩි යමක් මා කියවා නැත. එහෙත් මා දන්නා තරමින් උන්වහන්සේගේ (පුද්ගලික දේශනා නොව) පරිවර්තන වල බසෙහි ඇති වෙනස හෙවත් 'සරල බව' මිස කරුණුමය වශයෙන් දොසක් නැත. ඒ, මම දන්නා තරමින් බව යලිත් කියමි. 'සරල' බව යන්නට උදහරණයක් දක්වමු; බු.ජ. පොත්හි, "මාලුංක්‍යපුත්‍රයෙනි, කිම තට මම මෙසේ කීයෙම් ද? එව මාලුංක්‍ය තෙපි මා කෙරෙහි බඹසර වෙසෙව, මම තොපට .... ප්‍රකාශ කෙරෙමි. තවද තෙපි හෝ මට මෙසේ කීවහුද? වහන්ස, මම බුදුන් කෙරෙහි බඹසර වසමි, බුදුහු මට .... ප්‍රකාශ කරන්නේය." ලෙස සිංහල පරිවර්තනය වේ. මෙය කිරිබත්ගොඩ හිමියන්ගේ පරිවර්තන වල 'පින්වත් මාලුංක්‍ය පුත්‍රයෙනි, මම පින්වත් ඔබට මෙවැනි දෙයක් කීවාද?...' ආදී ලෙස තිබිය හැක. (අනුමානයකි.) බොහෝ දෙනෙක් 'සරල' බව ලෙස වටහා ගන්නේ මෙම නාගරික පොෂ් සමාජය ප්‍රිය කරන බසේ සුමට සුකොමල බවයි. කිරිබත්ගොඩ හිමියන්ගෙන් හා අසපු වලින් කෙරෙන දේ ගැන දීර්ඝව කතා කල යුතු දෙයක් බැවින් ඒ ගැන කතාව දැනට නවතමි.

      Delete
  10. කේ. මට දැනෙන විදිහට නම් තවමත් බලාපොරොත්තු වුන තරම් පොත් ලයිස්තුවක් ලැබී නැහැ නේද? සද්ධර්ම රතනාවලිය, උම්මග්ග ජාතකය හොඳ යෝජනා. සමහර වෙලාව‍ට අර කිව්වත් වගේ මහා ගැඹුරු පොත් දෙනවට වඩා කෙනෙක් පරිහරණය කරන බව දන්න හොඳ,සුදුසු පොත් දෙන එක ප්‍රායෝගිකයි. ඒ ගැන පස්සෙ කතා කරමු.(හැමදාම බැනුම් අහන නිසා කමෙන්ට් එකක් දැම්මට බ්ලොග් එක, කමෙන්ට් කියවන හැම වෙලාවෙම හිතෙනවා තෝරු මෝරු අස්සෙ හාල් මැස්සන්ට ඇති රාජකාරිය මොකක්ද කියලා :) )

    ReplyDelete
    Replies
    1. කවුද බොලේ මේ? අසෝකමාලගේ මහත්තයද?

      Delete
    2. සාලිය,
      තෝරු මෝරු අහු වෙන මහා භයානක දැල් වලින් හාල් මැස්සෝ සුටුස් ගාල ලිස්සල යනවා මල්ලි. මෙතන බබා වෙන්නැතුව වහෙන් ඔරෝ නැතිව කියන දෙයක් කියනවා. අනිත් එක, මහ ලොකු යාලුවෙක්ලු නේද ? ලැජ්ජයි හලෝ !
      ~~~~~~

      Anonymous,
      හාල් මැස්සෝ අස්සේ නිල මැස්සන්ට ඇති රාජකාරිය මොකක්ද බොල !
      (විහිළුවක් - සීරියස් ගන්න එපා.)
      ~~~~~~

      ඔය දෙන්නත් මේ කතා වලට සම්බන්ද වෙන්න. මේක දැන් තුන් දෙනෙක් ගේ 'වන් මෑන් ෂෝ' එකක් වෙලා තියෙන්නේ. අදහස් විවිධත්වය වැඩි වෙන තරමට හොඳයි.

      Delete
    3. සිතුවිළිJuly 10, 2013 at 11:50 AM

      හරියට හරි ජෝසප්,
      සාළිය නම් බොරුව දාන්නේ, හැබැයි මේක තුන් දෙනෙකුගේ වන් මෑන් ශෝඑකක් වෙලා තමයි. අපේ හීන් සැරේ, පොඩිළමයා වගේ කට්ටියට මොකද උනේ.
      ආතර උන්නැහේ නම් ආගිය අතක් නැතුවම ගියා.
      තව කට්ටිය අපිත් එක්ක මෙහෙ ආවා නේද? මොකද ඒ අයට උනේ?

      Delete
    4. ප්‍රිය සාලිය,

      මචං ඇත්ත කියපන්, උඹේ සම්පුර්ණ නම සාලිය කුමාර දුට්ඨගාමිණීද ?

      නෑ මම නිකමට මේ අහන්නේ. මේ වගේ ඓතිහාසික නමක් තියෙන එකේ උඹ ඉතිහාසේ ගැන කිසි දෙයක් නොදන්නවා වෙන්න බෑ. අනිත් එක අපේ කතු තුමාගේ යාලුවෙක් නම් මෙහෙම කටයි *කයි පියාගෙන ඉන්න එක අසාධාරණයක්.

      උඹ හිතන විදියට, ලංකාවට නොලැබුණු හොඳම රජතුමා (කුමාරයා) කවුද ?

      Delete
    5. ජෝසප්, සිතිවිලි,

      දිරි ගැන්වීමට ස්තූතියි. කාරණා එකින් එක ගත්තොත්, මම ඇත්ත නමින් කමෙන්ට් කලේ. මම මේ බ්ලොග් එක කියවීමෙන් ඔයාලගෙ කමෙන්ට් කියවීමෙන් ඇත්තටම සතුටක් වගේම දැනුමක් ලබනවා. නමුත් නිතර කමෙන්ට් කරන්න තරම් කාලයක් මගෙ රැකියාවත් එක්ක මට ලැබෙන්නෙ නෑ.
      මම ‍හැමදෙයක්ම කියන එක ගැලපෙන්නෙ නෑ, මම කේ ගෙ යාලුවෙක් උනත් කේ තරම් තර්ක කරන්න හැකියාවක් නැහැ. ඒත් මම හිතනවා ‍මම කේ ට ලියන්න පුළුවන් කියන එක කේ ට කලින් දැක්කා කියලා. ඒ නිසා මේ බ්ලොග් එක දිහා බලනකොට මට සතුටක් දැනෙනවා.
      ~~~~~~
      @කේ, කණිෂ්ක කියලා බොරු නමක් දාගත්ත එකනම් තේරුමක් නෑ. අනික මගෙ පාඩුවෙ ඉඳපු මට බැනලා බැනලා ‍මාව මේ වගේ ‍භයානක මෝර රැලක් මැද්දට දැම්මනම් දැන් උත්තර දෙන එකත් කරපන්. :D

      Delete
  11. සිතුවිළිJuly 2, 2013 at 9:57 PM

    කේ ඔබගේ අවශ්‍ය තාවය පන්සලට එක් රොක් වන ගැමි ජනතාවට දහම් කරුනු කියැවීමේහි රුචිය වැඩවීමට නම් මා සිතන්නේ ගැඹුරු දහම් කරුනු හා පැරණි හෙල වහර රැගත් පොත් (සද්ධර්ම රත්නාවලිය, පන්සිය පනස් ජාතකය ආදී )වලට අමතරව සැබෑ දහම් පසුබිමක් සහිතව ලියැවුනු සරළ හරවත් නවකථා යොදා ගැනීම හොඳ බවමයි.
    ඒ අනුව මාගේ යෝජනාව මෙලෙස ඉදිරිපත් කරමි.

    පිච්ච මල කථා මාලාව. - ජයසේන ජයකොඩි ශූරීන්
    පිච්ච මල රු. 250.00
    අරලියමල් ආරාමය රු. 240.00
    උපේඛා රු. 200.00
    මහමෙර රු. 220.00
    සිල් සුවඳ රු. 280.00
    සුදු නෙළුම රු. 240.00
    තෙර තරණය රු. 220.00
    සුදු වලාකුළු රු. 240.00

    ජයසේන ජයකොඩි ශූරීන්ගේ මා කියවා ඇති දහම් වටිනාකමක් ඇති අනෙක් පොත්

    මහ මිහිඳු හිමි - රු. 280.00
    මහ අනඳ හිමි - රු. 220.00
    යශෝදාව - රු. 200.00
    සත් සයුර - රු. 220.00
    ගෝතම ගීතය - රු. 260.00
    අමා වැස්ස (මගේ පොත අතුරුදන්ව ඇති නිසා මිල දැනගත නොහැක )

    ජයසේන ජයකොඩි ශූරීන්ගේ මේ සියළු පොත් දයාවංශ ජයකොඩි ප්‍රකාශනයන්ය.

    ඊට අමතරව සුනේත්‍රා රාජකරුනානායක විසින් රචිත සරසවි ප්‍රකාශනයන් වන.
    බුද්ධ දාසී - රු 750.00
    හිමගිර භික්ෂුනිය - රු 240.00

    වැනි පොත්ද මෙවන් එකතුවකට සුදුසුයැයි මා සිතමි.

    ඍජුවම දහම් පුස්තක මා යෝජන කොට නැත්තේ ඒවා යෝජනා වී ඇති බැවිනි.

    තවද ගරුතර සෝම හිමියන්ගේ දේශනා අලලා සකස් කළ පොත්පෙලක්ද දයාවංශ ජයකොඩි සමාගමින් එලි දක්වා ඇත. ඒවාද කෙනෙකුට කියැවීමට දීමට සුදුසු පොත් ලෙස මා සිතමි.
    ඒ අතුරින් සෝම හිමියන් විසින්ම රචිත
    ධම්මපද අර්ථ ව්‍යාඛ්‍යානය - රු 285.00
    (මෙය කියැවීමෙන් පාලි බස ගැනද හොඳ වැටහීමක් ගොඩ නැගෙන පොතකි )
    බුද්ධ ස්ථූප - බුද්ධානුස්සති භාවනාවට අත් වැලක් - රු. 285.00
    සෝම හිමියන් විසින් රචිත අවසන් කෘතිය
    යන පොත් ඉතා වැදගත් බව සිතමි.


    ReplyDelete
    Replies
    1. ඔබේ පිළිතුර පරිපූර්ණයි. මේ ගැන අනිවාර්යයෙන්ම සොයා බලන්නම්.

      Delete
  12. අපේ සිතුවිළි තුමා ඉදිරිපත් කළ පොත් ලැයිස්තුව ඉතාම ඉහලයි. මේ එකක්වත් කියවා නැති නිසා එය හරියටම කිව හැකියි. දැන් ළමයි, මොකද කරන්නේ? මේ පොත් ටික විතරක් උනත් රුපියක් 10,000 වඩා වැඩියි නේද?

    සැප්තැම්බර් මාසෙට තව වැඩි කාලයකුත් නැති නිසා සම්මාදමක් දානවනම් එහෙමයි. නැත්නම්, පොඩි බැනර් එකක් හදල ඉන්ටනෙට් එකේ පොඩි මාකටිං පාරක් දාල ඊමේල් මාකටිං පාරක් දාල පොත් දෙන්න කැමති අයගෙන් එකතු කර ගන්නවානම් එහෙමයි.

    ඒත්, මොනවා කරන්නත් හරියට සැලැස්මක් ඕනේ නේද? මේ කවුද / මොනවද කරන්නේ / කොහෙද තියෙන්නේ කියලත් හරියට කියන්නේ නැතුව මේ වැඩේ කරන්න බෑ. එකතු කරනවානම්, ඒකට හැමෝටම පුළුවන් තැනක් තියෙන්න ඕනේ. ඔය වගේ ගැටළු ගොඩයි. මොකද්ද සැලස්ම?

    ReplyDelete
    Replies
    1. සම්මාදමක් කිරීමේ අදහසක් නම් තිබුනේ නෑ ජොසෙෆ්. මිතුරන් අතරේ පණිවිඩ යැවීමෙන් පොත් යම්කිසි ප්‍රමාණයක් එකතු වේනම් එයත් එකතු කරගෙන අපේ දායකත්වයත් දමා පොත් මිලදීගෙන පරිත්‍යාග කිරීමයි අභිප්‍රාය වූයේ.

      ආරම්භය ලබා දුන් පසු එහි ප්‍රතිලාභ ලබන අය විසින් එහි පැවැත්ම සහතික කර ගැනීමයි වැදගත්. ඔබලාට එසේ පරිත්‍යාග කිරීමේ අභිප්‍රායක් වෙතොත් ඊට අවස්ථාව සැළසිය හැකි බව සිතමි. මදක් ඉවසා සිටින්න.

      Delete
    2. සිතුවිළිJuly 13, 2013 at 8:25 PM

      මිතුරනි මා යෝජනා කලේ පොත් කිහිපයක් පමණයි, මෙවන් කටයුත්තකට යොදා ගත හැකි බොහෝ පොත් තිබෙනවා, එහෙත් ඇතැම් බෞද්ධ පොත් නමින් එලි දක්වෙන පොත් අපටවත් කියැවීමට රුචියක් හෝ වැටහීමක් දීමට අසමත් දීර්ඝ රචනා. ඒ අනුව අප කියවා ඇති හා අප නිර්දේශ කරන පොත් මොනවාදැයි විමසා බැලීමට කණිෂ්ක පෙළඹීම හොඳ දෙයක්.

      ජෝසප්, ඔබත් හැකිනම් ඔබ කියවා ඇති යම්කිසි පොත් වෙසෙසින් සඳහන් කරන්න.එය කේගේ කාර්‍යයට පහසුවක් වේවි.
      මා මෙහිදී මූලිකවම සැලකිල්ලට ගනු ලැබූයේ, බොහෝ දෙනා එක එල්ලේ දහම් පොත පත කියැවීමට යොමු නොවනා බවයි. ඒ සඳහා පෙළැඹවීමක් කිරීම ඉතා සුදුසුයි. එම පෙළඹවීම ලබා දීමට සුදුසු පොත් පමණයි මා යෝජනා කළේ. පෙළඹවීම ලද කෙනෙකු ඉන් එහාට යාමට පහසුකම් සැපයීමත් එකලෙස වැදගත්.

      ජෝසප්කියනා ලෙස සැප්තැම්බර් මාසය ලංවන බැවින් අන් අයටත් මේ සත් කාර්‍යයට සම්මාදම් වීමට ඉඩ සැලසීමට කේ කැමතිනම් දැන් එය ඇරඹීමට සුදුසු කාලයයි. යම් වැඩ පිළිවෙලක් සකසනවානම් දැන්ම එය කළ යුතුයැයි සිතමි.

      ජෝසප් කියන ආකාරයේ බැනර් එකක් හදලා ඉන්ටෙර්නෙට් මාර්කටිං පාරක් දැමීම එවන් දෙයකට අප කොතෙක් සමත් දැයි මැන බැලීමටත් හොඳ ක්‍රමයක්. එමෙන්ම විශ්වාසය තහවුරු වන ආකාරයේ වැඩපිළිවෙලක් වීමත් වැදගත්. එසේම ලාබියා කවුදැයි හෙලි කිරීමත් ඉතා වැදගත්.
      එහෙම බැලුවහම වැඩේ එතරම් ලේසි නැහැ වගේ නේද? කණිෂ්ක කියන්නේ අපිට ඉවසා සිටින්න කියානම් අප්ගේ යෝජනා දී ඇති බැවින් දැන් නිහඬ වෙමු. කණිෂ්කගෙන් නැවත අවධි කිරීමක් ලැබෙන තුරු!

      Delete
  13. "Samma Sambudun Samaga Sanwada" - Wijayasiri Wettamuni (Katru)
    Gunasena Book Shop eken Ganna puluwan wewi - Rs. 1500/=

    pdf copy ekak damanna e-mail eka denna.

    ReplyDelete
    Replies
    1. Nishantha,

      ඔබට අපට හොරෙන් K හා ගනුදෙනු කළ යුතුනම්, පහත පිටුව භාවිතා කරන්න.
      > http://katha32.blogspot.com/p/form.html

      ඔහුගේ email ලිපිනය සැපයිය හැකි මුත් එය ඔහු විසින්ම සැපයීමයි වඩා සුදුසු.
      (එය මේ වන විටත් ඔබ සතුනම් මේ පණිවිඩය නොසළකා හරින්න.)

      Delete
    2. Nishantha,

      ඔබ දෙතිස් කතා වෙත සාදරයෙන් පිළිගනිමු. katha32@live.com යන ලිපිනයෙන් ඔබට අප ඇමතිය හැක. එහෙත් වඩා සුදුසු ක්‍රමය වන්නේ ජොසෙෆ් යෝජනා කළ ක්‍රමය බව සිහි කරමි.

      Delete
    3. Joseph
      Oba waradawa watahagena atha. sathya nam mata obalata men website wala weda kida dameemata bari weemai. adu tharamin sinhalen kotanntawath nohaka.
      ese uwath mama "Dethis katha" baleemata nithara paminemi. mama mema pituwata pivisuneda oba LCN wala dama thibu comment ekakin denuwath weemenui. emenma obage adahas dekweema ma sith ganie.

      - Theruwan Saranai -

      Delete
    4. Nishantha,

      ඔබ අප මිතුරු ජොසෙෆ් ගැන පැහැදීමකින් සිටින බව පෙනෙයි. හොඳයි. ඔහු ඔබේ මේ දිරිගන්වනසුළු ප්‍රතිචාරය දුටුවොත් තවත් හොඳයි. ඔබ සිංහල ලිවීමට නොහැකි කමකින් සිටින බව කියා ඇති නිසා, ඔබ භාවිතා කරන මෙහෙයුම් පද්ධතිය වින්ඩෝස්නම්, ගූගල් මුදලාලිගේ (අප දන්නා) ක්‍රම දෙකින් එකක් තෝරා ගත හැක.
      1. Google Sinhalese Input Tool (http://www.google.com/inputtools/windows/)
      2. Google Input Tools online (http://www.google.com/inputtools/cloud/try/)

      මින් පළමුවැන්න ඔබේ පරිගණකය මත පිහිටුවා ගත යුතුයි. දෙවැන්න වෙබ් පරිශීලකය (web browser) තුලින් කෙළින්ම භාවිතා කළ හැකි බැවින් GNU/Linux වැනි පරිගණකයකින් වුවත් භාවිතා කළ හැකියි. ඔබ කළ යුතු වන්නේ සිංහල වචන ඉංගිරිසි අකුරින් කෙටීම වන අතර ඒ tool විසින් ඒවා සිංහල අකුරට පෙරලනු ඇත.

      උදා: ingrisi -> ඉංග්‍රීසි | ingirisi -> ඉංගිරිසි.

      වරක් උත්සාහ කළොත් ඔබ ඊට හුරු වෙයි. උත්සාහ කර බලන්න. ඔබ මිතුරු ජොසෙෆ්ගේ අදහස් වලට කැමතිනම් ඔහු හා සංවාද කරන්න. සිංහල අදහස් සිංහලෙන්ම කීම සියලු දෙනාටම පහසුවක්.

      ඔබට සෙත් !

      Delete
  14. මිතුරු කනිෂ්ක ඔබ ලබා දුන් ලින්ක් එකට ස්තුති වෙමි.
    මගේ උත්සාහය සාර්ථකයි. මින් පසු සිංහලෙන් ලියන්නට උත්සහ කරමි. මම විජේසේකර කි බෝර්ඩ් එකට හුරු වී සිටින නිසා මේ ක්‍රමය ටිකක් දුෂ්කර උනත් උන්න හැටියට මලා මදැයි නේද?

    ReplyDelete
    Replies
    1. ඔබේ තෝරා ගැනීම 'Input Tool' ද නැතිනම් 'ඔන්ලයින් Input Tool' ද?
      දෙවන ක්‍රමයේ නම් යතුරු පුවරුවක් ලැබෙයි. එහෙත් යතුරු සැකසුම නම් විජේසේකරගේදැයි නොදනිමි.

      කෙසේ වුවත්, ඔබ සිංහලෙන් ලිවීමට ඇරඹීම අපටත් සතුටක්.

      Delete