Thursday, December 27, 2012

ජයශ්‍රී මහාබෝධිය වැඩමෙව් උඳුවප් පුර පසළොස්වක


මහබෝ වැඩමවීම - සෝලියස් මෙන්දිස්, කැළණි විහාරය
ඉංගිරිසි වර්ෂ ක්‍රමයට අනුව වසරේ අවසන් පුන් පෝදිනය උඳුවප් පුර පසළොස්වක පෝයයි. වස් සමයේ නිමාව සිදු වී උදෑසන සිසිල දනවන හා දහවල සෞම්‍ය කාලගුණයක් මේ කාලයේ පවතී. එසේ වුවත් රජ රට හා දිවයිනේ උතුරුදිගට, පෙරදිග හා ගිනිකොණදිග පෙදෙස් වලට තවදුරටත් වැසි වැටේ. මේ කාලයේ ගොවීහු හේන් ආදී ගොඩ ගොවිතැන් ද අරඹති. මේ මාසයට උඳුවප් යන නම ලැබුනේ මේ කාලය උඳු වැපිරීමට සුදුසු කාලය නිසා බව කියැවේ.

උඳුවප් මාසය බොහෝ ස්වභාවික ව්‍යසන සිදු වන කාලයකි. වප්-ඉල් මාස වලදී වැපිරූ ගොයම ගංවතුර වැනි ව්‍යසනයකින් හානි වී ගියහොත් ඒවා නැවත වගා කිරීමද මේ කාලයේදී කර ගැනීමට ගොවීහු යුහුසුළු වෙති. බාල වී (අඩු මාසෙන් පැසෙන වී වර්ග) සිටවන අද කාලයේ බොහෝ පෙදෙස් වල කුඹුරු වැඩ ඇරඹෙන්නේ උඳුවප් මාසයේය.

උඳුවප් මසින් පසුව එන දුරුතු මාසයේද දෙය්යන්නේ ලෙඩ ලෙස හැඳින්වන වසංගත පැතිරීමද වැඩිය. වෛරස් නම් ක්‍ෂුද්‍රජීවී විශේෂ වලින් සෑදෙන බව මේ වන විට නූතන වෛද්‍ය විද්‍යාවෙන් තහවුරු කර ඇති මෙකී රෝග උඳුවප්-දුරුතු මාස වල වැඩි වීමට හේතුව ඉන්දියාව පිස හමා එන ඊසානදිග මෝසම ලෙස හැඳින්වෙන සුළං ප්‍රවාහ විය යුතුයි.

උඳුවප් පෝ දිනයේ සිදු වූ ශාසනික කටයුතු ගැන බෞද්ධ සාහිත්‍යයේ සඳහන් වේ.

මිහිඳු මාහිමියන්ගෙන් දහම් අසා සෝවාන් වූ අනුලා බිසව ඇතුළු ස්ත්‍රී පිරිස තමන් ද පැවිදි වීමට කැමති බව දේවානම්පිය තිස්ස රජුට දැන්වූහ. රජ්ජුරුවෝ ඒ බව මිහිඳු හිමියන්ට සැල කළහ. තමන්ට ස්ත්‍රීන් පැවිදි කිරීමට බුදු රජුන් විසින් අනුදැන වදාරා නොමැති බව උන් වහන්සේගේ පිළිතුර විය. ඒ හේතුවෙන් ලක්දිව භික්ෂුණි සාසනය පිහිටුවීම පිණිස මිහිඳු මාහිමියන්ගේ නැගණිය, සුමන සාමණේරයන්ගේ මව් තුමිය, වන සංඝමිත්තා රහත් මෙහෙණින් වහන්සේ ලක්දිවට වැඩම කරවන ලෙස ඉල්ලා දඹදිවට හසුන් පත් යැවිණි.

මිහිඳු මහරහතන් වහන්සේගේ උපදෙස් පරිදි බුද්ධගයාවේ අපරාජිත භූමියේ වැඩ වසන ශ්‍රී මහා බෝධි රාජයාගේ දක්ෂිණ ශාඛාවද ඒ සමගම සිරිලක වැඩමෙවිණි. දේවානම්පියතිස්ස රජු විසින් කරවටක් දියට බැස මහත් ගෞරවයෙන් පිළිගත් එම දක්ෂිණ ශාඛාව මහ පෙරහරින් අනුරාධපුර වැඩමවා මහමෙවුනා උයනේ රෝපිතව අද දක්වාත් දෙව් මිනිස් බුහුමන් ලබමින් වැඩ වෙසෙයි.

සිංහලයෝ රාජ්‍යයට අහිමිව වනගතව සිටි වකවානු වල පවා, මහත් දුර්භික්ෂ පැවති වකවානු වල පවා, ස්වකිය ජිවිත පරිත්‍යාගයෙන් මහබෝධීන් වහන්සේ රැක ගත්හ. වාර්ෂිකව දරමිටි පෝය පැවැත්වෙන්නේ මේ දුෂ්කර ක්‍රියාව සිහි කරමිණි.

සමන්ත කූඨය, ගඟුලතැන්න ප්‍රදේශයට පෙනෙන ආකාරය

මහා කාරුණික සම්මා සම්බුදු රජාණන් වහන්සේ සුමන සමන් දෙවි රජුගේ ආරාධනයෙන් තෙවන වර ලක්දිව වැඩම කර පන්දහසක් කල් බුදු සසුන පවත්නා ලංකාද්වීපයේ වාසය කරන පින්වත් දෙව්මිනිසුන්ගේ පුද පූජා ලැබීම පිණිස සවකිය වාම ශ්‍රී පාද ලාංඡනය සමන්ත කූඨය මත තබා වදාළහ. වසරේ සය මසක් වනයෙන් වැසී පවත්නා සමන්ත කූඨය වෙත යන දුෂ්කර මාර්ගය එළිපෙහෙළි කර සැදැහැවත් කුල පුත්‍රයන්ගේ වන්දනාව පිණිස සකස් කෙරෙන්නේ ද උඳුවප් මාසය තුලදීය. උඳුවප් පුර පසළොස්වක පෝ දිනෙන් ශ්‍රී පාද වන්දනා සමය ඇරඹේ.

මේ වන්දනා සමයේ සිරිපා කරුණා කරන මනුෂ්‍යයෝ තෙරුවණ කෙරෙහි ශ්‍රද්ධාවෙන් හා සුමන සමන් දේව රාජයා කෙරෙහි ගෞරවයෙන් යුක්තව, මහත් කුසලයක් කර ගන්නා සිතුවිලි ඇතිව, සියළු සතුන් කෙරෙහි මෛත්‍රියෙන් යුක්තව, නොඉඳුල් වනඅරණක් වන සමනල අඩවිය නොයෙක් ආකාරයේ 'නූතන' කුණු කන්දල් වලින් අපවිත්‍ර නොකර, සන්සුන්ව සංවරව වන්දනා කරගෙන සුරක්ෂිතව තම ගම් රටවල් කරා පෙරළා ඒමට සිතට ගත යුතු.

Tuesday, December 25, 2012

සුභ උපන් දිනක් !

ජේසු බිළිඳා සිය මව් තුමිය හා ...

ලෝ පුරා කෝටි සංඛ්‍යාත ජනකායක් උත්සවාකාරයෙන් සමරන ජේසු බිළිඳාගේ උපන් දිනය අදයි. වසර 2011 කට පෙර අද වැනි දිනක බෙත්ලෙහෙම් පුරයේ දිළිඳු ගව ලෙනක උපන් ඒ අසිරිමත් කුමරුට, ජේසු බිළිඳුට, අපිත් සුභ උපන් දිනක් පතමු.

Thursday, December 13, 2012

2013 දින දසුන

2013 Calender placeholder image

දෙතිස් කතා කියවන මිතුරන් සැම දෙනාට වසර පුරා තබා ගත හැකි ත්‍යාගයක්.
බා ගැනීමට මෙතැන කොටන්න.


[13 Pages | PDF | 1.05MB] 

Tuesday, December 11, 2012

නීලදන්ත පාෂාණ මූසිකය

පුංචි රටක් වුවත් ශ්‍රී ලංකාව වසර තුන් දහසකට ආසන්න ලිඛිත ඉතිහාසයකට උරුමකම් කියයි. මෙවන් දීර්ඝ ලිඛිත ඉතිහාසයක් ඇති වෙනත් ජාතියක් මේ මිහිමත නැත.

ජනප්‍රවාද මුලාශ්‍ර අනුව මේ ඉතිහාසය වසර දස දහසකටත් එහා දිවෙයි. බලි තරු රාවණ ඈ හෙළ රජ වරුන් ගැන කියැවෙන කතා මෙන්ම ඒ කතා හා ඇඳුනු ස්ථාන, ශාක හා සත්ත්ව නාම ආදිය අදද භාවිතයේ පවතී. කිසියම් හෝ සත්ත්‍යයක් නැතොත් ඒවා මෙපමණ කාලයක් අප ඇසුරේ එසේ රැඳී තිබීමට හැකියාවක් නැත.

රාවණා රජ සමයේ හෙළයෝ ගුවන් විමන් වලින් ආකාශයෙන් ගමන් ගිය බවටත්, න්‍යෂ්ටික ආයුධ වලින් සතුරාට එරෙහිව සටන් කළ බවටත් රාමායනය දෙස් දෙයි. එතෙකුදු වුවත් එකී හෙළයින් පරිගණක තාක්ෂනය භාවිත කළ බවට මෙතක් සාක්ෂි ලැබී තිබුනේ නැත. දුම්බර කඳු වැටිය ආශ්‍රිතව රාවණ විද්‍යාත්මක පරීක්ෂණ වල යෙදුනු දේශීය පර්යේෂකයින් පිරිසක් විසින් එවැනි හෝඩුවාවක් සොයා ගැනීම පිලිබඳ ලොමු දැහැගැන්වෙන පුවත අප අද, එනම් 2012 දෙසැම්බර් මස 11 වන දින, ලොව කැළඹු මෙක්සිකානු මායාකාරයින් විසින් පුරෝකථනය කළ ලෝක විනාශයට හරියටම දින දහයකට පෙර, ඔබ වෙත මෙසේ හෙළි කර සිටිමු.

නීලදන්ත පාෂාණ මූසිකය
ඒ අපූර්ව සොයා ගැනීම වූ කලී තනි කළුගලින් නිමැවූ පරිගණක මවුසයකි (රූපය බලන්න - උපුටා ගැනීම: ලක්දසුන් වෙබ් අඩවිය). මේ ප්‍රදේශ වල ගැමියන් කියන්නේ මේ පාෂාණ මූසිකය රාවණ රජ සමයට අයත් බවයි. මූසිකය සම්බන්ද සම්බන්දිත තතක් (wire) මෙතෙක් කළ කැනීම් වලදී හමු වී නැති නිසා මෙය අතත්‍ය (wireless) තාක්ෂනය සහිත මූසිකයක් බව පර්යේෂකයෝ අනුමාන කරති. එවැනි අතත්‍ය තාක්ෂණයක් පුලස්ති සෘෂි වරයා විසින් සොයාගෙන තිබුණු බවත් ඒ තාක්ෂනය නීලදන්ත අඳුන ලෙස හැඳින්වූ බවත් අඳුන්පොත (මේ වැදි ජනයා විසින් භාවිතා කරන හඳුන්පොත නොවේ) නම් පැරණි පුස්කොල පොතේ දැක්වේ.

පාෂාණ මූසිකය ගැන වැඩිදුර පරීක්ෂණ ක්‍රියාත්මකයි. මේ පිළිබඳව සොයා බැලීමට දුම්බර අඩවියට විද්වත් කණ්ඩායමක් යැවීමට දෙතිස්කතා වෙබ් අඩවිය කටයුතු යොදාගෙන යයි. වැඩිදුර විස්තර ලැබුණු වහාම ඔබ වෙත ඉදිරිපත් කිරීමට දෙතිස්කතා සුදානම්.

Saturday, December 8, 2012

කඨින පූජා ගැන සටහනක්

මේ ලිපිය සිතුවිළි නමැති මා මිතුරා ඇසූ ප්‍රශ්න කිහිපයකට පිළිතුරකි. ඔහුගේ ප්‍රශ්න පහත පරිදි වේ.
  • කඨින චීවර පූජාව දහම හා බැඳෙන්නේ කෙසේදැයි ඔබට මා වෙත පහදා දිය හැකිද, එය සාමාන්‍ය චීවර පූජාවකට වඩා වෙනස් වන්නේ කුමන අයුරකින්ද?

  • "මා දකිනා හැටියට කඨින චීවර පූජාව යනු ධනවතුන් විසින්ම කරනු ලබන ලෞකික අපේක්ශා මුදුන් කොට කරන පින්කමකි, මෙ පින්කමෙහි ඇතුලාන්තය ගැන මා නොදනී." එමෙන්ම භික්ෂුවක් උදෙසා කරන අන් චීවර පූජාවකට වඩා මෙවැන්නක් උසස් වන්නේ කෙසේද? එය දහම හා ගැලපෙන්නේ කෙසේද? යන වගත් දැන ගැන්මට කැමැත්තෙමි.
මෙතැන් සිට සංගෘහිත වන්නේ ඔහුගේ ප්‍රශ්න වලට පිළිතුරුයි. රචනාව කෙටි කර ගැනීම පිණිසම කෙටි මාතෘකා බෙදා කරුණු වලට ගොනු කළෙමි. වැඩිදුර විග්‍රහ වලට නොයමි.

වස් විසීම, වස් පවාරණය හා චීවර මාසය

  • සියලු උපසපන් භික්ෂූහු වස් විසිය යුත්තාහ. වස් විසීමේ ක්‍රම දෙකකි. පෙරවස් විසීම හා පසු වස් විසීම වශයෙනි.
  • සාමාන්‍යයෙන් පෙරවස් සමාදන් වන්නේ ඇසල පෝ දිනයි, වප් පෝ දින පවාරණය කරයි. සාමාන්‍ය පසුවස් විසීම නිකිණි පෝ දින කර ඉල් පෝ දින පවාරණය කරයි.
  • වප් සහ ඉල් පෝ දින දෙක අතර කාලය චීවර මාසය වේ. කඨින පින්කම් පැවැත්විය හැක්කේ මේ මාසය තුලදී පමණි.
  • වස් නොකඩා රැක ගෙන පවාරණය කළ භික්ෂුවකට පමණි කඨින චීවරයක් පිලි ගත හැක්කේ. මේ හේතුවෙන් පසුවස් විසූ භික්ෂුවකට කඨින චීවරයක් පිළිගත නොහැක.

කඨින පිංකම සහ එහි දුර්ලභ බව

  • කඨින චීවරයක් පිළිගත හැක්කේ උපසම්පදා භික්ෂුවකට පමණි. එසේම මේ පිංකමට උපසම්පදා හිමි වරු පස්නමක් වත් සිටිය යුතුය. ලක්දිව උපසම්පදාව අතුරුදහන් වී තිබූ අඳුරු කාල වල වාසය කල පිංවතුන්ට මේ පිංකම කර ගත හැකි නොවීය.
  • එසේම කිසියම් ආරන්‍යයක, පන්සලක, විහාරයක වස් විසූ භික්ෂුන් නැතිනම් කඨින පූජාවක් කළ නොහැක. වස් විසූ භික්ෂුන් සිටියත් ඒ අය වස් බිඳගෙන සිටීනම් ඒත් මේ පූජාව කළ නොහැක.
  • වස් විසූ භික්ෂූන් කොතෙක් සිටියත් විනයානුකුලව ඇතිරිය හැක්කේ එක් කඨිනයක් පමණි, එනම් පූජා කළ හැක්කේ එක කඨින චීවරයක් පමණි.
  • එසේම, පූජා කරන වස්ත්‍රය කපා මසා පඬුපොවා සිවුරක් ලෙස සකස් කිරීමද වරුවක් තුල සිදු කළ යුතුය. මෙය වෙහෙස නොබලා කළ යුතු සියුම් කාර්යයකි.
  • කඨින චීවරය තෙවරක් පූජා කෙරේ. පළමු වර දායකයන් විසින් අරුණ නැගීමට පළමු මහසඟරුවනට වස්ත්‍රය පිළිගැන්වේ. දෙවනුව ඒ වස්ත්‍රය චීවරයක් ලෙස සකස් කර මහසඟරුවනට පිළිගැන්වේ. තෙවනුව මහසඟරුවන විසින් එහි සිටින භික්ෂූන් වහන්සේලා අතරින් ඒ විහාරයේ පෙරවස් වසා එය නොකඩා රැකගෙන මහා පවාරණයෙන් පවාරණය කළ සුදුසු නමක් තෝරා කඨින චීවරය පිළිගැන්වේ.
  • එසේ පිළිගැන්වීම විනය කර්මයකි. වෙනත් චීවර දානය හා ප්‍රතිග්‍රහණය විනය කර්මයක් ලෙස නොගැනේ. (මේ පිංකමට උපසම්පදා භික්ෂුන් පස් නමක් අවැසි වෙන්නේ එය විනය කර්මයක් වන බැවිණි.)
  • පළමු වර මහසඟ සතු කොට පිදුණු වස්ත්‍රය නැවත චීවර සම්පාදනය පිණිස දායකයන්ට පැවරීමත්, එසේ සකස් කෙරුණු චීවරය මහසඟ පිරිස විසින් එක් නමකට පූජා කිරීම නිසාත් මේ පිංකමට රැස්ව සිටින සියළු දෙනා එක වරම දායකයින් හා ප්‍රතිග්රාහකයින් බවට පත්වේ. මෙය සිදු වන වෙනත් අවස්තාවක් මට සිහි නොවේ.

කඨින චීවර පූජාවේ ආනිසංශ

දායකයාට මෙන්ම ප්‍රතිග්‍රහකයාට ද කඨින චීවර පූජාවෙන් ලැබෙන ආනිසංශ දහමේ විස්තර කෙරේ.

කඨින චීවරය පිළිගත් සංඝයා වහන්සේට ලැබෙන ප්‍රතිලාභ

කඨින චීවර පූජාව පිළිගත් මහාසංඝයා විසින් තෝරාගත් එක් නමකට එම චීවරය පවරනු ලැබේ. එය පිළිගන්නා නමට විශේෂ වරප්‍රසාද කිහිපයකට හිමිකම් ලැබේ.
  1. අනාමන්‍තචාරො : භික්‍ෂූන් වහන්සේ නමක් තමන්වහන්සේ වැඩ සිටින ආවාසයෙන් පිටත වඩින විට කිසිවෙකුට හෝ කියා වැඩිය යුතු ය. කඨින චීවරයක් පිළිගත් භික්‍ෂූන් වහන්සේ නමකට කිසිවෙකුට නොදන්වා ආවාසයෙන් පිටවිමෙවන් කිසිදු ඇවැතක් සිදු නොවේ.
  2. අසමාධානචාරො : සෑම දිනක ම අරුණු නැගෙන විට භික්‍ෂුව සමීපයෙහි තුන් සිවුර තිබිය යුතු ය. එසේ නොවුණහොත් ඇවැතක් සිදු වේ. එහෙත් කඨින චීවරයක් පිළිගත් භික්‍ෂූන් වහන්සේ නමකට තුන් සිවුර සමීපයෙහි නොතිබුණාට ඇවැතක් සිදු නොවේ.
  3. ගණභොජනං : සැදැහැවත් දායකයින් භික්‍ෂූන් වහන්සේලාට සිය නිවසේ දානයකට පොදුවේ ආරාධනා කළ යුතුය. පෞද්ගලිකව ආරාධනයක් පිළිගතහොත් ඇවැතක් සිදු වේ. එහෙත් කඨින චීවරයක් පිළිගත් භික්‍ෂූන් වහන්සේ නමකට දායකයාට අනුග‍්‍රහ පිණිස පෞද්ගලික ව හෝ නිවසකට වැඩම කොට දානය වැළදීමෙන් ඇවැතක් සිදු නොවේ.
  4. යාවදත්‍ත චීවරං : උපසම්පදා භික්‍ෂූන් වහන්සේ නමකට තුන් සිවුරක් අධිෂ්ඨාන කරගෙන පරිහරණය කරන්නේ නම්, ඊට අමතර ව සිවුරු පරිහරණය කළ නොහැක. එහෙත් කඨින චීවරයක් පිළිගත් භික්‍ෂූන් වහන්සේ නමකට සිවුරු ඕනෑම ප‍්‍රමාණයක් පරිහරණය කළ හැක.
  5. යො ච තත්‍ථ චීවරුප්පාදො සො නෙසං භවිස්සති : අන්‍ය අවස්ථාවන්හිදී සඟ සතුකොට පූජා කළ පූජාවන් තනි ව පරිහරණය කිරීම වරදකි. එහෙත් කඨින චීවරයක් පිළිගත් භික්‍ෂූන් වහන්සේ නමකට පූජා කරන ලද සියලූ ම දේවල අයිතිය හිමිවන අතර, සියල්ල පෞද්ගලික ව වුවද පරිහරණය කළ හැක.
මේවා සාමාන්‍ය භික්ෂු විනය ඉක්මවා යාම් වේ.

කඨින චීවර පූජා කිරීමේ ආනිසංශ

කඨින චීවරයක් පූජා කිරීමෙන් ලැබෙන අනුසස් බුද්ධ දේශනාවේ මෙසේ සඳහන් වෙයි.
"ගිරිරාජ සමංරාසිං - සංඝෙ දේති තිවිවරං
ඒකස්ස කඨින දානස්ස - කලං නාග්ඝති සෝළිසිං
මහාමේරු පර්වතය දක්වා උසට තුන්සිවුරු (තනිපට සිවුර, දෙපට සිවුර හා අඳනය) පූජා කළත්, කඨින චීවරයක් පිදීමෙන් ලැබෙන අනුසස්වලින් දහසයෙන් පංගුවක් හෝ නොලැබේය යනු එහි දළ අදහසයි.

පිරිසිදු දඹ රනින් අකනිටා බඹ ලොව දක්වා උසට සෑයක් සාදවා පූජා කිරීමෙන් ලැබෙන ආනිසංස කඨින චීවරයක් පූජා කිරීමේ කුසලයේ දහසයෙන් පංගුවක් වත් නොවන බව තව තැනක දැක්වේ.

කඨින චීවරය මැසීමට ගසන එක් ඉඳීකටු පහරකට තිසිහතර වාරයක් බැගින් සක්විති රජව ඉපදීමට තරම් හේතු සම්පත් ඇති බව
"ආරපථෙ ආරපෙථ - චක්කවත්ති සිරිං ලභෙ
අසිතිං ච චතුක්ඛත්තුං - චක්කවත්ති අහොසහං"
යන ගාථා පාඨය පැහැදිලි කරයි.
"පඨවිරිව න ජාතු කම්පතෙ - නචලති මේරු රිවාති වායුනා
වජිරමිව න භිජ්ජතෙ ඝනං - තමිද මතො කඨිනන්ති චුච්චති"
මහ පොළව මෙන් කම්පා නොවන මහමෙරමෙන් සුළඟින් නොසෙල්වෙන ඒකඝන වූ වජ්‍ර පර්වතයක් මෙන් නොබිඳෙන හෙයින් කඨිනය යන වචනය ව්‍යවහාර කෙරේ යනු ඉහත ගාථාවේ අදහසයි.

මෙසේ කඨිනානිසනිශංස ගැන කියැවෙන ගාථා බොහෝ ගණනක් ඇත. මේවායේ දැක්වෙන උපමා ඉවත් කර ඉතා සරලව කීවොත්
"මානුසිකාච සම්පත්ති - දේවලෝකේච යා රතී
යාච නිබ්බාණසම්පත්ති - සබ්බමේතේන ලබ්භති"
යන ගාථාවෙන් දැක්වෙන ලෙස මිනිස් ලොව, දෙව් ලෝ වල උතුම් සැප විඳීමටත් නිවන් දක්නා තුරා කල්ප ගණනක් සැපම ලබා දීමටත් මේ පිංකමට බලයක් පවතී. මෙය අට මහා කුසල් වල මුලටම කියවෙන්නේ නිර්වාණාවබෝධයටද මේ පින උපස්තම්භක වන නිසයි.

ටිකක් විස්තර කළොත්,
  • උපනුපන් සියලූ භවයන්හිදී දිව්‍ය සම්පත්, මනුෂ්‍ය සම්පත්, පරිවාර සම්පත්, ආහාරපාන, ඉඳුම්හිටුම්, වස්ත‍්‍රාභරණ මෙන් ම සියලූදෙනාගේ ගරුබුහුමන්, වැඳුම්පිදුම්, පූජාසත්කාර ආදිය හිමි වේ.
  • සියලූ දෙසින් පැමිණෙන සියලූ උපද්‍රවයන්ගෙන් ආරක්‍ෂාව ලැබේ.
  • සියලූ පූර්ව අකුසල කර්මයන්ගේ විපාකවල බලපෑම අඩු වේ.
  • මනුලොව උසස් කුල වලම උපදී.
  • චක‍්‍රවර්ති රාජ්‍ය සම්පත්තිය මෙන් ම ශක‍්‍ර සම්පත්තිය ද ලැබීමට හැකි වේ.
  • කොතැනක ඉපදුණත් ආයුෂයෙන්, වර්ණයෙන්, සැපයෙන්, බලයෙන් හා ප‍්‍රඥාවෙන් ආඪ්‍ය වූ ජීවිතම ලබයි.
  • සියලූ ක්ලේශ බන්‍ධනයන්ගෙන් මිදී නිවන් අවබෝධ කරගැනීමටත් හේතු වාසනාව ලැබේ

කඨින චීවර පූජාවේ පරිවාර දාන

මේ පිංකම කෙරෙන විට කඨින චීවරයට අමතරව තව චීවර හා වෙනත් කැප භාණ්ඩ ඕනෑ පමණක් සංඝික කර පූජා කළ හැක. ඒවාද කඨින පිංකමේ කොටස් බවට පත් වන හෙයින් අනෙක් දාන වලට වඩා මහත්ඵල මහානිසංශ වේ. කඨින පිංකමේදී පූජා කරන ඉඳි කටුව පවා බොහෝ සැප සාදා දීමේ සමත් වේ.

පෙර කළ රජ වරු පවා ඉතා උනන්දුවෙන් මේ පිංකම පැවැත්වූහ. බොහෝ රජවරු මේ පිංකම රාජ්‍ය අනුග්‍රහ සහිතව බොහෝ පිරිවර සමග එක් වී එදිනම කපු කැට නූල් අඹරා ඒවායින් රෙදි වියා ඒ වස්ත්‍ර වලින් කඩ කපා මසා චීවර නිපදවා කඨින චීවර ලෙස සකසා බොහෝ අවශේෂ පරිෂ්කාර සහිතව දන් දී පිරිවර සමග දෙව්ලෝ ගියහ.

ඒ නිසා කියන ලදී, පිං කැමැත්තෝ කඨින චීවර දානය කෙරේ සැදෑ ඇති කර ගනිත්වා !



ඉහත විස්තර කළ කඨිනානිශංස පිලිබඳ විශ්වාසය හේතුවෙන් ඕනෑම විහාරස්ථානයක වාර්ෂික කඨින චීවර පූජා පිංකම ඉතා සාර-භාර පිංකමක් වී තිබේ. පෙර මෙන් ජනයාගේ හිත සුව පිණිස චාරිකාවේ හැසිරෙන භික්ෂූන් දුර්ලභ මෙකල වසර පුරා පන්සලට වී සිටින භික්ෂූන් වහන්සේට අමුතුවෙන් ආරාධනා කර වස් වස්වති.

වස් කාලය පුරා නොයෙක් විසූක-දස්සන සහිත පුද පූජා පවත්වනු ලැබේ. වස් කාලය අවසානයේ හේවිසි හොරණෑ ගසමින් - භක්ති ගී කියමින් - නැටුම් නටමින් - මල් බයිසිකල් - කොඩි, සේසත් සහ සමහර විට අලි ඇතුන්ද සහිත පෙරහැරකින් කඨින චීවරය වීථි සංචාරය කර පන්සලට වඩම්මති. මග දිගට ජනයා හිමිදිරිය පින්න නොබලා ඊට පුද පූජා කෙරෙති. සමහර විට කඨිනය සමගම කප්රුක් පූජාද පවත්වති.

විශේෂයෙන් අගනුවර ආශ්‍රිත හා නාගරික ප්‍රදේශ වල විහාරස්ථාන වල කඨින චීවරය බාර ගැනීමම තරඟයක් වී තිබේ, කඨින චීවර පූජාව පැවැත්වීම තත්ත්වය ප්‍රදර්ශනයක් වී තිබේ. මේ සියල්ලට හේතුව ඉහත දැක්වූ කඨිනානිශංස මිස වෙනත් දෙයක් නොවේ.

සිතුවිළි මා මිතුර, "මා දකිනා හැටියට කඨින චීවර පූජාව යනු ධනවතුන් විසින්ම කරනු ලබන ලෞකික අපේක්ශා මුදුන් කොට කරන පින්කමකි" යන ඔබේ අදහස මින් තහවුරු වූ බව සිතෙන්නේද?

Tuesday, November 27, 2012

ඉල් පුර පසළොස්වක

අනුරාධපුර ථුපාරාම වෙහෙර වහන්සේ
මේ චීවර මාසයයි. චීවර මාසය යනු වප් අව පෑලවිය සිට ඉල් පුර පසළොස්වක දක්වා වන දින තිහයි. පෙර වස් වසා මහා පවාරණයෙන් වස් පවාරණය කළ භික්ෂූහු කඨින චීවර පිළි ගැනීමට සුදුසුකම් ඇත්තෝය. ඒ පින්වත් හිමිවරු ප්‍රමුඛ කොට ගෙන සැදැහැවත් උපාසක උපාසිකාවෝ මේ මාසය තුල කඨින පින්කම් පවත්වති. චීවර මාසය අවසන් වන ඉල් පුන් පෝ දින වස් පවාරණය කරන්නෝ පසුවස් සමාදන් වූ භික්ෂුන් වහන්සේලාය. උන් වහන්සේලාට කඨින චීවර පිළිගැනීමට අවස්ථාවක් ලැබෙන්නේ නැත.

ලක්දිව ප්‍රථම වස් වාසය මිහින්තලයේ විය. වස් පවාරණය කළ මිහිඳු මහ තෙරහු වන්දනීය වස්තුන්ගේ අවශ්‍යතාව දේවානම්පියතිස්ස රජුට දැන්වුහ. ථුපාරාමය ප්‍රමුඛ ලක්දිව වන්දනීය ගොඩනැගිලි වල ආරම්භය මෙයයි.


පස්වග මහණුන්ට දම්සක් දෙසා වදාළ තිලෝගුරු බුදු රජාණන් වහන්සේ ප්‍රථම වස් කාලය බරණැස ඉසිපතනාරාමයේම ගත කළහ. යස කුලපුතු, ඒ කුමරුගේ මිතුරු විමල, සුබාහු, පුන්නජි හා ගවම්පති යන කුමරුවන් හා තවත් පනසක් පිරිවර මහණ වී උතුම් අරහත් බව ලබා ගැනීම මේ වස් සමය තුල සිදු විය. ඒ හේතුවෙන් එම වස් සමය නිමා වන විට ලොව (සර්වඥයන් වහන්සේ සමග) රහතුන් එක් සැට නමකගෙන් පරිපුර්ණ විය. ඉල් මස පුර පසළොස්වක දා උදෑසන මේ රහතුන් සැට නම තමන් වහන්සේ ඉදිරියට කැඳවූ මහා කාරුණිකයන් වහන්සේ 'චරත භික්කවේ චාරිකං බහුජන හිතාය බහුජන සුඛාය ...' යනාදී වශයෙන් උන් වහන්සේලාට අනුශාසනා කොට උන් වහන්සේලා සැට නම සැට මගෙක යවා බරණැසින් නික්ම උරුවෙල් දනව්වට යන මගට පිළිපන්හ.

එසේ පිළිපන් උන් වහන්සේ අතරමග කපු වන ලැහැබක් දැක එහි වූ එක්තරා ගසක් මුල වැඩ හුන් සේක.

එකළ කොසොල් රට රජ කුමරුවෝ තිස් දෙනෙක් කප්පාසික නම් වනයක් ඉතා රම්‍ය යැයි අසා කෙළි පිණිස එහි ගියහ. ඒ කුමරුවෝ ඉතා උතුම් වූ රුව ගුණ දරන බැවින් භද්‍ර වර්ගීය නමින් ප්‍රකටයහ. උන් තිස් දෙන අතරින් එකෙක් තම අඟනක් නැති හෙයින් වෙසඟනක කැඳවාගෙන ගියේය. ඒ වෙසඟන කුමරුන්ගේ ප්‍රමාදයක් දැක උන්ගේ අබරණ රැගෙන පලා ගියාය. ඒ කුමරුවෝද අබරණ හා ඈ සොයන්නෝ ගස මුල හුන් බුදු රජුන් දැක ස්ත්‍රියක් දුටුවෝද, නුදුටුවෝදැයි උන් වහන්සේගෙන් විමසුහ. උන් වහන්සේ "කුමරුවනි, අනුන් සෙවීම වඩා උතුම්ද, නොහොත් තමන් සෙවීම වඩා උතුම්දැයි" පැනයෙකින්ම ඒ කුමරුන්ට පිළිවදන් දුන්හ.

තමන් සෙවීමම උතුම් බව ඒ කුමාර වරු කීහ. එසේ විනම් මෙහි හිඳුවයි වදාරා බුදු රදුහු උන්ගේ චරිතානුරූපී බණ දෙසුහ. ඒ කුමරුවෝ එබණ අසා සව් කෙළෙසුන් නසා රහත් වූහ. රහත්ව ඒහි භික්ෂු භාවයෙන් පැවිද්ද ලැබූ ඒ තෙරවරු තිස් මගක ධර්ම ප්‍රචාරය පිණිස වැඩම කළහ. බුදු රජුන්ද උරුවෙල් කසුබ් ආදී කොට ඇති තුන් බෑ ජටිලයන් දමනය කිරීම පිණිස හුදෙකලාවම උරුවෙල් දනව්ව බලා වැඩියහ.


බුද්ධත්වයෙන් සත් වන වසරේ වප් පුන් පෝ දින සංකස්ස පුරයේ පැවති දේවාරෝහණ උත්සවය දැක අතිශයින් පැහැදී බුදු සස්නේ පැවිදි වූ මෛත්‍රී බෝසතුන් අවසන් නියත විවරණය ශාක්‍යසිංහ ගෞතම බුදුරජානන් වෙතින් ලබන්නේ අද වන් ඉල් පුන් පෝ දිනයකය.


දේවාරෝහණ උත්සව අවස්ථාවේ බුදු රදුන් හා විචිත්‍ර ධර්ම සාකච්චාවක් පවත්වා ප්‍රඥාවන්තයින් කෙරෙන් අග්‍රස්ථානය ලැබූ, ධර්ම සේනාපති වූ, අග්‍ර ශ්‍රාවක වූ සාරිපුත්ත මහා රහතන් වහන්සේගේ පරිනිර්වාණය සිදු වූයේ ද ඉල් පුර පසළොස්වක පෝ දිනකයි. එකළ බුදු රජුන්ද අසූ වයස් වූහ. බුදු රජුන්ට පෙර අග සව්වන් පිරිනිවන් පානා බව උන් වහන්සේ දිවැසින් දුටහ. උන් වහන්සේගේ සොයුරු සොයුරියන් සියළු දෙනාම පැවිදිව රහත් බවට පත් වී සිටියත් මව් බැමිණිය පමණක් මිසදිටු ගෙන වෙසෙයි. ස්වකිය ආයු ගෙවුණු බැව් දැන ගත් සාරිපුත්තයන් වහන්සේ තිලෝගුරු බුදුරජාණන් වහන්සේ දැක පිරිනිවනට අවසර ලබාගෙන ස්වකිය මෑණියන් වසන නාලක ගමට වැඩම කළහ.

උන් වහන්සේට කලක සිට පවතින උදරාබාධයක් ඒ රාත්‍රියේ උත්සන්න විය. උන්වහන්සේ එදාම පිරිනිවන් පා වදාරණ බව දුටු සතර වරම් දෙව් රජවරු, ශක්‍ර දේවේන්ද්‍රයා හා මහා බ්‍රහ්මයා ආදීහු තුන්යම් රැය මුළුල්ලේ උන් වහන්සේට උපස්ථාන කළහ. ජිවිත කාලයක් මුළුල්ලේ තමන්ගෙන් පුද පූජා ලැබූවත් එක දිනක්වත් තමන් දැකීමට නොපැමිණි තමන්ගේ දෙවිවරු ඒ දෙවි වරුන්ට කිසි දින පුජාවක් නොපැවැත්වූ තම පුත්‍රයාට කරන උපස්ථාන දැක විස්මපත් වූ උපතිස්ස මාතාව අළුයම උන් වහන්සේගෙන් බණ අසා උතුම් සෝවාන් ඵලයට පත්ව තෙරුවන් සරණ ගියාය.

ස්වකිය මෙහෙවර අවසන් කළ, එබැවින් කිසිවෙකුට ණයක් නැති, කිසිවක් කෙරෙහි ඇල්මක් නැති සාරිපුත්තයන් වහන්සේ මහ පොළොවට ඉසිලිය නොහෙන සිය ගුණ කඳ දරා සිටිමින් රැස්ව සිටි ජනතාවට නොයෙක් සිය දහස් ගණන් ප්‍රාතිහාර්ය දක්වා දහම් දේශනා කොට නොයෙක් දෙනාට ස්වර්ග මෝක්ෂ සැප සාදා දී දකුණැලයෙන් සැතපී අනුපිළිවෙලින් ධ්‍යානයන්ට සම වැදී ඉන් නැගිට පරිනිර්වාණ සම්පත්තියට පැමිණ වදාළහ.


එසේ හෙයින්, සියළු සත්ත්වයෝ නොපමා වෙත්වා !

Saturday, November 10, 2012

දෙවියනි ඔබ කොහිද

මේ සිද්ධිය උනේ ටිකක් ඉස්සර කාලෙක. හැමෝම දන්නවනේ සුදු මහත්තුරු අපේ රටවල් ශිෂ්ඨාචාර කොරන්න ඒ කාලේ ආපු හැටි. එක අතක තුවක්කුව, ඒ එයාලගේ ආරක්ෂාවට; අනිත් අතේ බයිබලේ, ඒ අපේ ආරක්ෂාවට. ඉස්සර හිටි රතු ඉන්දියන් නායකයෙක් කියලා තිබුණා "සුදු මිනිහා එන විට බයිබලය උගේ අතේය, ඉඩම් අපේ අතේය. දැන් බයිබලය අපේ අතේය, ඉඩම් උගේ අතේය" කියලා. ඔන්‍න‍ ඕක තමයි හැම තැනම උනේ.

මේ සිද්දිය සිද්ධ උනේ දකුණු ඇමරිකාවේ ඇමසන් වනන්තරේ.

ඔන්න අපේ කතාවේ වීරයා තමන්ගේ කට්ටියත් එක්ක ඇමරිකාවට ගොඩ බැහැලා කණ්ඩායම් බෙදිලා ඇවිදගෙන ඇවිදගෙන යනවලු. යනවා යනවා ඒත් ඉවරයක්‌ නැහැල්ලු. මෙහෙම යනකොට කට්ටියට කෑම බීම හිඟ වෙලා, වැස්සට අහු වෙලා කරදරේ වැටිලා ඉන්නකොට කොරේ පිටට මරේ කියලා මේ යකා කණ්ඩායමෙන් මග හැරුනලු. මොනවා කරන්නද ඉතිං, අයියනායක දෙයියන්නේ පිහිටයි කියලා කොළ අත්තක් හෙම ගැට ගහලා මිනිහා ආපහු නැවට එන්න හැරුනලු.



ටික දුරක් එනකොට එක පාරටම මිනී මස් කන වැද්දෝ රංචුවක් මේ මිනිහව වට කර ගත්තා. වට කරං මුන් රංචුව නටනවා ... "හුංග බුංග හුංග බුංග හුංග බුංග" කිය කියා පිස්සෝ වගේ නටනවා. අපේ කතානායකයට දෙවියන් සිහි උනා.

"අනේ දෙවියනේ මම අදනම් ඉවරයි" කියලා මූට එක පාරටම කියවුනා. ඔන්න එතකොටම තමයි කැලේ ගස් අඹරවාගෙන හමන සුළඟක් එක්ක එක පාරටම ඉහලින් එළියක්‌ වැටුනේ. අපේ වීරයාට ඇහෙනවා ගැඹුරු කට හඬක්... "නෑ නෑ... දරුවා ... තමුසේ බය වෙන්න එපා... අහුල ගන්නවා ඔය ලොකු ගලක්... කෙලලා අරිනවා අර ලොකු පිහාටු තොප්පිය දාගෙන ඉන්න මහා එකාගේ ඔලුවටම" ඒ කට හඬ කිව්වා.

අපේ විරයත් ඉතිං මොනවා හිතන්නද, දෙවියෝනේ කියන්නේ, පැනපු ගමන් ගත්තා ලොකු ගලක්, දුන්නා නටන්නේ නැතුව බලං උන්න ලොක්කගේ ඔලුවටම. එක පාරයි, ඌ තපලා බිම. අපේ එකත් ඇරියේ නෑ, වැටිච්ච එකා පෙරලගෙන තව දෙක තුනක් දුන්නා අරූට. වැද්දෝ ටික නැටිල්ල නවත්තලා බලං ඉන්නවා වට වෙලා.

ඒ අස්සේ අර ගැඹුරු කට හඬ ආයේ ඇහෙනවා... "ඔන්න දරුවා දැන්නම් උඹ ඉවරෙටම ඉවරයි" !!!

Thursday, November 1, 2012

මුලු රටටම එක සංඛ්‍යාතයක්

නෙළුම් පොකුණ රඟහල විවෘත කළ පසු මේ රජයේ අවධානය දිනා ගත් ඊළඟ යෝධ ඉදිකිරිම නෙළුම් කුළුන ව්‍යාපෘතියයි. කොළඹ අහස ගැබ දර්ශනය වෙනස් කරන ඉතා උසැති (මීටර් 350) ඉදි කිරීමක් වන මෙය මෙතෙක් ලංකාවේ ඉදි කෙරුණ උසම කුළුන වනු ඇත. මේ වසරේ මුල් භාගයේදී මෙහි ඉදි කිරීම් ඇරඹිණි. බහු කාර්ය සම්ප්‍රේෂණ කුළුණක් වන මෙය ඊට අමතරව සංචාරක ආකර්ශනයක් ලෙසද ක්‍රියා කරයි.

නෙළුම් කුළුන ආදර්ශයක්
මේ කුළුන අරඹමින් විදුලි සංදේශ නියාමන කොමිෂන් සභාව ඉඟි කළේ ඉදිරියේදී රට පුරා, විශේෂයෙන් කොළඹ නගරය පුරා, අවිධිමත් ලෙස ඉදි කර ඇති ගුවන් විදුලි හා රුපවාහිනී කුළුණු ඉවත් කර ඒ සියළු සම්ප්‍රේෂණ කටයුතු මේ කුළුණට ගෙන ඒමට සැලැස්මක් ඇති බවයි. ඒ සැලැස්ම ක්රියාත්ම කිරීමේ ප්‍රථම පියවර ඒ කොමිසම විසින් අද (නොවැම්බර් 1 දින) ගනු ලැබිණි. ඒ අනුව මෙතෙක් විවිධ සංඛ්‍යාත ඔස්සේ රට පුරා සම්ප්‍රේෂණය කෙරුණු බොහෝ FM ගුවන් විදුලි නාලිකා රට පුරා ශ්‍රාවකයින්ට එක සංඛ්‍යාතයක් සුසර කිරීමෙන් පමණක් ශ්‍රවණය කිරීමට හැකි වනු ඇත. ගුවන් විදුලි නාලිකා සංඛ්‍යාත එක මත එක වැටීම හා එකිනෙක කැපී යාම මේ පියවර සමගම වලකින අතර මෙතෙක් භාවිතයට ගත් සංඛ්‍යාත පරාස යම් ප්‍රමාණයක් නිදහස් වීමත් මේ අනුව සිදු වනු ඇත.

එක සංඛ්‍යාතයකින් එක ගුවන් විදුලි නාලිකාවක් පමණක් මුළු රට පුරාම ඇසිය හැකි වීම ගුවන් විදුලියට සවන් දෙමින් දුර ගමන් යන මගීන්ට පහසුවකි.

පහත දැක්වෙන්නේ ශ්‍රී ලංකා විදුලි සංදේශ නියාමන කොමිසම විසින් ප්‍රසිද්ධ කළ FM ගුවන් විදුලි නාලිකා වල සංඛ්‍යාත පිළිවෙලයි. මෙම වගුව උපුටා ගැනීම ලංකාදීප අන්තර්ජාල පුවත්පතිනි.

  • ලයිට් එෆ්.එම්: 87.6, 87.8
  • රන් එෆ්.එම්: 88.1
  • ඊ එෆ්.එම්: 88.3
  • සිංහ එෆ්.එම්: 88.6, 88.8
  • ඉසිර එෆ්.එම්: 89.1, 89.3
  • සිටි එෆ්.එම්: 89.6
  • සිටි එෆ්.එම් | ගැමි දිරිය: 89.8
  • පිරෙයි එෆ්.එම් | වයඹ | යාපනය ප්‍රාදේශීය සේවා: 90.1
  • වෙට්රි එෆ්.එම්: 90.4, 90.6
  • ෂා එෆ්.එම්: 90.9, 91.1
  • අලෙයි එෆ්.එම්: 91.4
  • ස්වදේශීය සේවය (සිංහල): 91.7, 91.9
  • දෙරණ එෆ්.එම්: 92.2, 92.4
  • වයි එෆ්.එම්: 92.7
  • ගෝල්ඩ් එෆ්.එම්: 93.0, 93.2
  • ලක්හඬ: 93.5, 93.7
  • වී.අයි.පී. රේඩියෝ: 94.0
  • වෙළඳ සේවය: 94.3, 94.5
  • නෙත් එෆ්.එම්: 94.8, 95
  • මැක්ස් රේඩියෝ: 95.3
  • රිදම් එෆ්.එම්: 95.6, 95.8
  • හිරු එෆ්.එම්: 96.1, 96.3
  • කිරුළ එෆ්.එම්: 96.6
  • කිස් එෆ්.එම්: 96.9
  • රියල් එෆ්.එම්: 97.1
  • ඉංග්‍රීසි සේවය: 97.4
  • ඉංග්‍රීසි | දඹාන | කොත්මලේ ප්‍රජා ගුවන් විදුලි සේවය: 97.16
  • සී.අයි.ආර්. (චීන ගුවන්විදුලිය): 97.9
  • සියත එෆ්.එම්: 98.2, 98.4
  • සන් එෆ්.එම්: 98.7, 98.9
  • ටී එන් එල් රේඩියෝ: 99.2
  • රෙඩ් එෆ්.එම්: 99.5, 99.7
  • ශ්‍රී එෆ්.එම්: 100.0, 100.2
  • රන් එෆ්.එම්: 100.5
  • යර්ස් එෆ්.එම්: 100.8, 101
  • බෞද්ධයා ගුවන් විදුලිය: 101.3, 101.5
  • සෙත් එෆ්.එම් (මීගමුව | ටීඑන්එල් රේඩියෝ): 101.8
  • දෙමළ ස්වදේශීය සේවය: 102.1, 102.3
  • වසන්තම් එෆ්.එම්: 102.6, 102.8
  • ග්ලෝබල් රේඩියෝ: 103.1
  • සූරියන් එෆ්.එම්: 103.4, 103.6
  • ශක්ති එෆ්.එම්: 103.9, 104.1
  • රන්ගිරි ශ්‍රී ලංකා: 104.4
  • ටෙන්ඩරල්: 104.7, 104.9
  • ලක්විරු එෆ්.එම්: 105.2, 105.4
  • රන්ගිරි ශ්‍රී ලංකා: 105.7
  • ලක් එෆ්.එම්: 106, 106.2
  • සිරස එෆ්.එම්: 106.5, 106.7
  • වී එෆ්.එම්: 107
  • රුහුණු | රජරට | කඳුරට | ඌව | විදුල | ක්‍රීඩා සේවය: 107.3
  • රහුණු සේවය | විදුල. ක්‍රීඩා සේවය 107.5
  • දෙමළ සේවය 107.8

Sunday, October 28, 2012

වප් පුර පසළොස්වක පෝය

මේ පෙර වස් සමාදන් වූ සියළු භික්ෂුන් චාරිකාවෙන් වෙන්ව පන්සල් ආරණ්‍ය වල වාසය කරන කාලයේ අවසානයි. සියලු වෙහෙර විහාරස්ථාන වල වස් අවසාන කථින පිංකම් මේ පෝ දිනයත් සමග ඇරඹේ.

වස්සාන සමයේ වට වැස්සෙන් පොළොව තෙමුණු පසු ගොවින් කුඹුරු සී සෑම් කරමින් ඊළඟ කන්නයට සැරසෙන්නේ මේ කාලයේදීය. එකල දඹදිව මේ කටයුත්ත රාජ්‍ය අනුග්‍රහය සහිතව කෙරුණු බව සුද්ධෝදන රජුගේ වප් මගුල ගැන පැරණි කතාවෙන් කියැවේ.

වප් මගුල් උත්සවය

සුද්ධෝදන රජුගේ වප් මගුල
බෝසතුන් ඉපිද පස් මසක් ගිය තැන කපිලවස්තු නුවර වප් මගුල් උත්සවය වීය. රජ ගෙයි සියල්ලෝම ඊට සහභාගී විය යුතු බැවින් කුඩා කුමරුද සරසවාගෙන කිරි මව් වරුද රජ ගෙයි සෙසු පිරිවර සමග කෙතට වන්හ. කෙත කෙළවර මහ දඹ ගසෙක් මුල සුදු වැලි අතුරා යහන් පනවා වට තිර අද්දා වියන් බඳවා රැකවල් ලවා සුදොවුන් රජ තෙමේ සෙනග පිරිවරාගෙන ගොස් වප් මගුල පටන් ගත්හ.

රජ තෙමේ සුදු ගවයින් යෙදු රන් නගුලකින් සී සායි, රජ පිරිවර රිදී නගුල් ගෙන ඒ අනුව සාති. අඩහැර නැගේ, කවි සීපද ගැයේ, සුදුවත් හැඳි සුදු මල් ගත් වැසියෝ තුටුව මේ මංගල්‍යය නරඹති. කුමරු රැකවලට සිටි කිරි මව් වරුද මෑත් වී ඒ අසිරි විඳිති.

පස් මස් වයස් මහ බෝසතුන් අවදිව රැකවලේ සිටින කිසිවෙකු නොදැක යහනින් නැගී පලක් බැඳ ආනාපානසතිය වඩා ප්‍රථම ධ්‍යානය උපදවා ගත්හ. හිරු අවරට හැරිණ. එහෙත් මහ දඹ ගසේ සෙවන ගස මුලින් ඈත්ව නොගියේය. දඹ ගස වටා පිහිටි සෙසු ගස වල සෙවනැළි ද ඒ ගස දෙසටම නැමී ගත්හ. මේ අසිරි දුටු කිරි මව් වරු බියපත්ව වහ වහා දිව ගොස් සුදොවුන් රජුට ඒ පවත් දැන්වුහ.

සුදොවුන් රජු එබස් අසා වප් මගුල් හැර දිවගෙන අවුත් සෙවනැළි දැක විස්මිතව තිරය ඇතුලට වැද පතුල් පිට පතුල් තබා අතුල් පිට අතුල් තබා ඇසිපිය නොසලා වටපිට නොබලා සියක් වයස් තවුසෙක් මෙන් සමවත් සුවයෙන් වැඩ හිඳින පස් මස් වියැති පුතුන් දිට. ඒ රජ තෙමේ ළය උපන් ප්‍රීති වේගය දරා ගත නොහෙනුයේ "මේ කවර නම් පෙළහරක්ද, පුතණුවෙනි තෝ දැන්ම බුදු වී ද, තොපගේ මෑණියෝ අද මේ දුටු නම් ප්‍රීතිය දරා ගත නොහි ස්වකිය ජීවිතය පුජා නොකෙරෙද්ද, පුත, මාගේ මේ දෙවෙනි වැඳීමයි" කියා ලපටි සිරි පා යුග්ම මත රාජ සිරස තබා වැන්දේය.



මහ බෝසතුන් සිය පියාගෙන් දෙවන වැඳුම ලත් වප් මගුල් උළෙල පැවතියේ වප් මස කවර දිනයකදීද යන්න සඳහන් නොවෙතත් වප් පෝදා ලක්දිව හා සාශනික ඉතිහාසයේ ඉතා වැදගත් සිදු වීම කිහිපයක් ගැන සඳහන් වේ.

ගණ්ඩබ්බ නම් අඹ රුක් මූලයේදී යමා මහ පෙළහර පා තව්තිසා දෙව් ලොවට වැඩි තථාගතයන් වහන්සේ එහිදී වස් වසා පවාරණය කර දෙව් බඹුන්ගේ පුජෝපහාර ලබමින් මහ පෙළහරින් සංකස්ස පුරයට වැඩම කළේ මෙවන් වප් පුන් පෝ දිනකයි.

මේ මහා භද්‍රකල්පයේ මෛත්‍රිය නමින් මතු බුදු වන බෝසතාණන් වහන්සේ එකල සංකස්ස පුර සිරිවඩ්ඪ කෙළෙඹියාට පුත්ව ඉපදී සිටි සේක. දේවාවරෝහණ උත්සවය දුටු හෙතෙම අතිශයින් පැහැද බුදු සස්නේ පැවිදි විය.

ලක්දිව දේවානම්පියතිස්ස රජ විසින් ශ්‍රී මහා බෝධියේ ශාඛාවක් ඉල්ලා මගධයේ අශෝක රජු වෙත දූතයෙක් ලෙස අරිට්ඨ කුමරු පිටත් කරන්නේ ද මෙවන් පෝ දිනයකයි. අප අදද වැඳුම් පිදුම් කරන ජය ශ්‍රී මහා බෝධින් වහන්සේ සහ මෙහෙණි සස්නත් සමග සංඝමිත්තා මහ රහත් මෙහෙණින් වහන්සේ මෙරටට වැඩම කෙරෙන්නේ ඒ සාර්ථක දූතගමන නිසාය. අද ක්‍රියාත්මක නොවන නමුත් භික්ෂුණි උපසම්පදාව පැවති සමය තුල බොහෝ කුල කාන්තාවෝ පිළිවෙත් පුරා අමා මහ නිවන් සාධා ගත්හ. අප ද ඒ බව සිහියට ගනිමින් මේ පුන් පෝ දින බැතියෙන් පින් කම් වල නියැලෙමු.

Tuesday, October 16, 2012

අධික වේගය අනතුරුදායකයි


මාරාවේසෙන් වගේ එන වාහනේ දැක්ක රාළහාමිට පුදුම සන්තෝෂයක් දැනුනා. ඉක්මනට පාරට පැනල වාහනේ නවත්තා ගත්තේ හරිම අමාරුවෙන්. අළුත්ම අළුත් කාරෙකෙන් බොහොම හදිස්සියෙන් බැස්සේ ජැන්ඩියට ඇඳ පැළඳ ගත් තරුණයෙක්. මිනිහා හරි කලබලයක් පෙන්නුවත් අපේ රාළහාමි නෙමේ බුරුලක් පෙන්නුවේ.

"මොකද හදිස්සිය, අවසන් ගමනද යන්නේ, ඒවා හරි යන්නේ නෑ මේ ටවුමේ." රාළහාමි සැර උනා. "කෝ ලයිසන්?"

"රාළහාමි පොඩ්ඩක් ඉන්නකෝ, මම කියන දේ අහන්නකෝ." තරුණයා රියැදුරු බලපත දෙන පාටක් නෑ.

"නෑ නෑ නෑ, වැඩි කතා ඕනන්නෑ, කෝ ගන්න ආදායම් බලපත්‍රය" රාළහාමි තව ටිකක් තදින් කිව්වා. බලෙන්ම තරුණයාගෙන් ආදායම් බලපත්‍රය ගත් රාළහාමි රියැදුරු බලපත්‍රයත් ඉල්ලන් දඩ කොලේ ලියන්න ගත්තා. නොඉවසිල්ලෙන් සිටි තරුණයා "රාළහාමි, මේ ... මම කියන දේ පොඩ්ඩක් අහන්නකෝ ..." කියලා යමක් කියන්න හැදුවත් රාළහාමිගෙන් බුරුලක් නෑ. "පොඩ්ඩක් ඉන්නවා මේක ලියනකම්" රාළහාමි සැර උනා. "වැඩි කතා වලට ආවොත් කෙලින්ම කූඩුවේ".

"නෑ නෑ රාළාමි... OIC මහත්තයා..." තරුණයා ට කතාව ඉවර කරන්න ලැබුනේ නෑ. "හා තමුසේ ලොකු අත්තක්ද, හරි එහෙනං ඒ මහත්තයත් එක්ක බේරා ගන්නවා, යමු පොලිසියට" කියලා අර තරුණයාව ජීප් එකේ දා ගත්තා.

දැන් තරුණයා කූඩුවේ. රාළහාමි එළියේ. දෙන්නට දෙන්නා කතා නැතුව ඔහොම පැයක් විතර හිටියා. දැන් නම් රාළහාමිගේ තරහව නිවිලා වගේ. එයා කියනවා "තමුසෙට බේරුමක් තියෙනවා... සමහර විට OIC මහත්තයා ආවාම තමුසෙව අවවාද කරලා විතරක් එළියට දායි. අද එයාගේ එකම දුවගේ මගුල් ගේ, ඒකයි තාම නැත්තේ"

"ම්හු ! ඒක කෙරෙන්නෑ" තරුණයා නොමනාපෙන් ඔලුව වැනුවා.

"මමයි මනමාලයා !!!"

Saturday, September 29, 2012

බිනර පුර පසළොස්වක පෝය

බිනර පුර පෝ දා සඳ
බිනර පුර පසළොස්වක දින සිදු වූ ඉතා වැදගත් පුවතක් ශාසන ඉතිහාසයෙන් ඇසේ. ඒ භික්ෂුණි ශාසනය පිහිටුවීමයි. ගෞතම බුද්ධ ශාසනයේ පැවිදි වූ ප්‍රථම භික්ෂුණින් වහන්සේ වන්නේ සිද්ධාර්ථ ගෞතමයන්ගේ මව් තනතුරේ සිටි ප්‍රජාපතී ගෞතමියයි.

සම්මා සම්බුදු රජාණන් වහන්සේ ප්‍රථම වරට කිඹුල්වතට පැමිණි ගමනේදී සිය මුනුපුරු රාහුල කුමරුද දෙවනුව සිය පුත් නන්ද කුමරුද පැවිදි කළ පසු එතුමියට පැවිදි වීමේ අදහස පහල විය. සුද්ධෝදන ශාක්‍ය රජු සිය අවසන් සයනයේ සැතපී සිටම රහත්ව පිරිනිවන් පෑ පසු එතුමිය සිය අභිප්‍රාය බුදු රදුන්ට දැන්වූ නමුත් ඒ ඇරයුම ප්‍රතික්ෂේප කෙරිණි.

මහා කාරුණිකයන් වහන්සේ ශාක්‍ය කෝලිය යුද්ධය වලකා ලන්නට රෝහිණි නදී තෙරට වැඩි ගමනේදී පැවිදි වූ කුමාර වරුන්ගේ බිරින්දෑ වරුද බුද්ධ මාතා නම් දැරූ මහා ප්‍රජාපති ගෞතමිය වෙත පැමිණ පැවිදි වීමේ අදහස පළ කළෝහ. ප්‍රජාපති ගෞතමිය ඒ දේවීන් ගේ ආයාචනය පිළිගෙන උන් සමගම න්යග්රෝධාරාමයට පැමිණ කාන්තාවන් උදෙසා පැවිදි බව ඉල්ලු නමුත් ඒ ආයාචනය ද නො අනුදැන වදාළ බුදු හිමියෝ කිඹුල්වතින් නික්ම විසාලා මහා නුවරට සැපත් වුහ.

එකල මහා ප්‍රජාපති ගෞතමින් ඒ දේවී වරු පන්සියය සමගම මන්ත්‍රණය කොට තුමූම කෙස් බා අබරණ ඉවත් කොට ගිහි වෙස් හැර මහණ වෙස් ගෙන මහානාම ශාක්‍ය රජ විසින් සැපයූ රථ ප්‍රතික්ෂේප කර පා ගමනින්ම යොදුන් පනසක් දුර ගෙවාගෙන විශාලා මහනුවර කූටාගාර ශාලාවට වෙත පැමිණ විහාරය තුලට නොගොස් දොරටුව අසල කඳුලින් පිරි නෙතින් යුතුව, බුබුළු නැගී පතුලින්, ලේ ගලන පයින් හා කිළිටි වැරහැලි වූ සිවුරෙන් යුතුව උන්හ. අනද මහ තෙරුන් ඒ බව දැනගෙන කම්පා වී උන් පැමිණි අදහස ඉෂ්ඨ කර දීම පිණිස දැඩි අදිටනින් යුතුව බුදු රජාණන් වහන්සේට නොයෙක් අයුරින් කරුණු කියා සිව් වරක් ආයාචනා කර අෂ්ට ගරු ධර්ම සහිත ප්‍රනීත භික්ෂුණි පැවිද්ද ලබා දීමට පුරෝගාමී වූහ. මහා ප්‍රජාපති ගෞතමිය බුද්ධ උපස්ථායක අනද මහ තෙරුන් අතින් අෂ්ඨ ගරු ධර්ම අසා අනුමෝදන් වීම සමගම මෙහෙණ පැවිද්ද හා උපසම්පදාව ඇති විය.

එහි ප්‍රතිපලයක් බුද්ධ ශාසනය භික්ෂු, භික්ෂුණී, උපාසක, උපාසිකා යන සිව් වනක් පිරිසෙන් සමලංකෘත විය. ඛේමා, උප්පලවන්නා, භද්දකාත්‍යානා, නන්දා, ධම්මදින්නා ඈ ක්ෂිනාශ්‍රාව ශ්‍රාවිකාවන් ලොවුතුරා විමුක්තිය උදා කර ගනිමින් ලෝ වැඩ සලසන්නේ ඉන් අනතුරුවය. එසේ අප්‍රමාන පරිශ්‍රමයෙන් ඇති කර ගත් භික්ෂුණී උපසම්පදාව මේ වන විට අතුරුදහන් වී ඇති නිසා අද ලංකාවේ කාන්තාවෝ පැවිදි වෙස් දරා දස සිල් මාතාවන් ලෙස හැසිරෙමින් ස්වකිය විමුක්තිය පිණිස අප්‍රමාදව කටයුතු කරති.

සියළු සත්ත්වයෝ නොපමා වෙත්වා !

Sunday, September 23, 2012

ඉවරයි කීවට ඉවරම නෑ - මාමයි බෑනයි 2

ඉවරයි කීවට ඉවරම නෑ. මේ බෑනා එසේ මෙසේ එකෙක් නෙවෙයි වගේ. බුදු අම්මෝ, මූට තියෙන ප්‍රශ්න. මේ ඒ බෑනාගේ ප්‍රශ්න සහ ජොසෙෆ් මාමගේ ඉතිරි උත්තර ටික.

බෑනා: බුදු වෙන්නට කල්ප ලක්ෂයක් පුරුම් පුරා මෙලොවට වැඩි සිද්ධාර්ථ කුමරුන් ගිහි ජීවිතයට පිවිසීම (කසාද බැදීම) මට තේරුම් ගන්න අමාරුයි. මොකද මම අහල තියෙනවා 550 ජාතකය ගැන. එච්චර පෙරුම් පුරපු කෙනෙක් බුදු වෙන්න ඉපදුන ආත්මයේ ඇයි කසාද බැන්දේ? දරුවෙක් හැදුවේ? හරියටම ඒ දරුවා ඉපදුන දවසේ ගිහි ගෙය හැර ගියේ? තමන්ගේ දරුවා ඉපදුන දවසේදී තාත්ත කෙනෙකුට දාල යන්න පුලුවන්ද මම අහල තියෙනවා යනකොට එතුමා කිවුවලු “රාහුලයෙක් ඉපදුනා බැදීමක් ඇති වුනා” කියලලු ගියේ.

මාමා: සිදුහත් කුමරු යශෝදරා ආවාහ කර ගැනීම සහ රාහුල උපත ගැන කියනවනම්...
පළමු දේ තමයි ඔහු රජ කුමරෙක් වීම, ඔහු කුලයට හා සිරිත් විරිත් වලට බැඳි සිටීම, සහ ඔහු තවම බුද්ධත්වය ලබා නෑ යන කරුණු තේරුම් ගැනීම. ඔහුගේ වයස අවුරුදු 16 යි. සිදුහත් කුමරු යශෝදරාව ආවාහ කර ගැනීමේදී බල පාන්නේ ඒ කරුණු මිස පෙර භවයන්හි පිරූ පෙරුම් දම් හෝ 550 ජාතක හෝ නොවේ. ඔහුට පෙර භවයන් දැන ගැනීමේ නුවණක් තවම නැත. ඔහු යශෝදරාව ආවාහ කරගෙන සාමාන්‍ය පවුල් ජිවිතයක් ගෙනියනවා. මෙහි විශේෂත්වයක් නෑ.

සිදුහත් කුමරු වසර 13 ක සාමාන්‍ය පවුල් ජිවිතයක් ගෙනියනවා. එහි හැල හැප්පීම් හෝ නොහොඳ නෝක්කාඩු හෝ තිබුණු බවක් සඳහන් වන්නේ නෑ. මේ අතර තමයි ඔහු සතර පෙර නිමිති දකින්නේ. සතර පෙර නිමිති ඔහුගේ සිත සසල කර අලුතින් සිතීමකට පොළඹවනවා. ඔහු තමන් ගෙවන ජීවිතය මායාවක් බව තේරුම් ගන්නවා. නමුත් ඒ තමන්ගේ පියා විසින් තමාට මවා දුන් මායාවෙන් ඔබ්බට විනිවිද දකිමින් සියලු සත්ත්වයාගේ ජිවිත මායාවක් බව තේරුම් ගැනීම තමයි ඔහුගේ දැක්මේ විශේෂත්වය. ඔහු කලකිරෙන්නේ සිය සුව පහසු ජීවිතය, ආදරණිය බිරිඳ ඉපදීමට සිටින දරුවා හෝ හිමි වීමට නියමිත රාජධානිය වැනි පෞද්ගලික දේ ගැන නොවේ. ඔහු කලකිරෙන්නේ සත්ත්වයාගේ යථා ස්වභාවය ගැනයි. සංසාරය ගැන දැනීමක් තිබු සමාජයක ජිවත් වූ බැවින් සංසාර ගමන ගැන කලකිරීම දක්වා මේ කම්පනය විස්තීරණය කර ගැනීමට ඔහු සමත් වුනා.

මෙන්න මේ අවස්ථාවේ තමයි දරුවා ඉපදුන බවට පණිවිඩය ඔහුට ලැබෙන්නේ. තමන් විඳින ජිවිත/ සංසාර මායාව තුලට ඇතුලත් වන අලුත් සත්ත්වයා ගැන වන අනුකම්පාව මුසු හැඟීම සහ එසේම ඔහුට මේ ඉරණම අත් කර දුන්නේ තමා බවට වන වරදකාරී හැඟීම තමා ඔහු රාහුලෝ ජාතන් බන්ධනං ජාතන් ලෙස පිට කළේ.


බෑනා: යශෝදරා දේවිය සිද්ධාර්ථ කුමාරයාගේ හැම අත්මයකදීම බිරිද කියල මම අහල තියෙනවා ඒ ගැන ලෝකයා දන ගත්තෙත් බුදුන්ගෙන් නේද? තමන්ගේ දරුවා ඉපදුන දවසේදී තාත්ත කෙනෙක් එහෙම දාලා ගියාම එවිට සාමාන්‍ය කාන්තාවක් වුනු යශෝදරා දේවියට එතුමා ගැන තරහක් හිතුනේ නැහැ කියල අපිට හිතන්න බැහැ නේද? ඊට පස්සේ තමන්ගේ ස්වාමියා අතහැර ගිය ගැහැනියක් විදිහට යශෝදරා මොන විදිහට ජීවත් වුනාද අපි දන්නේ නැහැ නේද? සමහර විට රාහුල කුමාරයව බුදුන් ලගට දායාදය ඉල්ලන්න යැවුවේ ඇය තුල තිබුන තරහ නිසා වෙන්න බැරිද?

ඔය ප්‍රශ්න සලකල බලනකොට සිද්ධාර්ථ කුමාරය තමන්ගේ බිරිඳට සහ දරුවට වරදක් කරලා නැහැ කියල කාටවත් කියන්න පුලුවන්ද? ඒ අපවාදයෙන් මිදෙන්න ඔහු බුදු වුනාට පසුව යශෝදරා දේවිය හැම ආත්මයකම භාර්යාව කියල කිවුව වෙන්න බැරිද?

මාමා: සියලු සත්ත්වයා ගේ ජිවිත හා සංසාරය ගැන කලකිරීමෙන් යුත් සිද්ධාර්ථයන් තීරණය කරන්නේ මේ සියල්ලෙන් තමනුත් ගැලවී තම බිරිඳ, අලුත උපන් දරුවා, දෙමාපියන් හා සියලු සත්ත්වයන් ගලවා ගැනීම පිණිසයි. ඒ හැඟීම තමයි අභිනිෂ්ක්රමනයට මග පෙන්වන්නේ. අභිනිෂ්ක්‍රමණය යනු කාලකන්නි මිනිසෙක් සිය දරු පවුල නඩත්තු කිරීමේ වගකීමෙන් මිදීම පිණිස හෝ සල්ලාල කම නිසා දරු පවුල අතර යන කාමතුරයෙකුගේ හෝ සමු ගැනීමක් හෝ නොවේ. සිය දරු පවුලට යහපත් අනාගතයක් උදා කර දීම පිණිස දිවි පරදුවට තබා ඔස්ට්‍රේලියාවට යන බෝට්ටුවකට නගින මිනිසෙකුගේ ක්‍රියාවට නම් මෙය යම් තරමකට සමාන කරන්න පුළුවන්.


බෑනා: ඔය ප්‍රශ්න සලකල බලනකොට සිද්ධාර්ථ කුමාරය තමන්ගේ බිරිඳට සහ දරුවට වරදක් කරලා නැහැ කියල කාටවත් කියන්න පුලුවන්ද? ඒ අපවාදයෙන් මිදෙන්න ඔහු බුදු වුනාට පසුව යශෝදරා දේවිය හැම ආත්මයකම භාර්යාව කියල කිවුව වෙන්න බැරිද?

මාමා: සිද්ධාර්ථ කුමාරය තමන්ගේ බිරිඳටත් දරුවටත් කළේ වැරද්දක් කියල ඕන වසලයෙකුට කියන්න බාධාවක් නෑ. ඒත් තමන් ආත්ම පරිත්‍යාගයෙන් ගිය ගමන සාර්ථක කර ගත්ත ආදරණිය පියෙක් විදියට උන් වහන්සේ ඒ බිරිඳටත් දරුවාටත් තමන් ලැබූ විමුක්තිය ලබා දුන්නා. බෞද්ධ දෘෂ්ඨි කෝණයෙන් වැදගත් වෙන්නේ එයයි. ඒ දරු පවුල අවුරුදු හයක් යම් වියෝ දුක් ගින්දරක් වින්දද, ඒ ගින්දර වෙනුවෙන් ලැබූ ත්‍යාගය අපරිමිතයි, උත්කෘෂ්ඨයි.

යශෝධරාව හැම ආත්ම භාවයකම බිරිඳ උනා කියලා කියපු තැනක් මටනම් දකින්න ලැබිලා නෑ. ඒක බොරුවක්. එහෙම නොවුන අවස්තා 550 ජාතකෙන්ම පෙන්නන්න පුළුවන්. මගෙන්ම අහන්න එපා, මහන්සි වෙලා හොයා ගන්න. මගේ බෑනාටත් වැඩක් ඔන්න.


බෑනා: අවසානයේ බුදු බව ලැබූ බුදු හාමුදුරුවන් හොද සැමියෙක් පියෙක් විදිහට පුරුෂ පක්ෂය පිළිපදින්න ඕන කරනා දේශනා කිරීම කෙතරම් දුරට සාධාරණීකරණය කරන්න පුලුවන්ද?

මාමා: තමන්ගේ බිරිඳට ලබන්න පුළුවන් සියලු ලෞකික සැපම ලබා දුන්න ආදරණිය සැමියෙක් විදියට සිද්ධාර්තයන්ට හැකියාව සහ අයිතිය තියෙනවා ඒ දෙය අනිත් සැමියන්ට කියලා දෙන්න. ඒකට බුදු වෙන්න ඕනේ නෑ.

බුදු බව ලබා ගත්තට පස්සේ තමන් ලබා ගත් ඒ ලොවුතුරා සැපතත් තම බිරිඳට හා දරුවන්ට අයිති කර දුන් උත්තමයා ලෙස උන් වහන්සේ ඒ ගැන යමක් දේශනා කලානම් ඒ සියල්ල ඉතාම සාධාරණයි.


ඔන්න ඔහොමයි ඒ බෑනාගේ ප්‍රශ්න සහ ජොසෙෆ් මාමගේ උත්තර. මේ ප්‍රශ්නෝත්තර ගැන ඔබටත් අදහසක් ඇත්නම් එය ඉදිරිපත් කිරීමට පැකිලෙන්න එපා.

Thursday, September 20, 2012

මාමයි බෑනයි

දේවතාරාධනාව
පහත දෙබස මට ලැබුනේ ජොසේෆ් නම් නොදුටු මිතුරෙකුගෙනි. මෙහි මාමා යනු ඔහුයි. බෑනා ඕනෑම බෑනෙක් විය හැක. නමුත් ඔහු ක්‍රිස්තු භක්තිකයෙක් බව මෙහි ඇසෙන පැන වලින් ඉඟි කෙරෙයි. මෙය සත්ත්‍ය දෙබසක් හෝ මා මිතුරාගේ ප්‍රබන්ධයක්‌ හෝ විය හැකි මුත් එහි සාකච්ඡා කෙරෙන කරුණු වල වැදගත් කම සළකා කිසිවක් වෙනස් නොකර ලැබුණු අයුරින්ම පළ කරමි.

පස් මහා බැලුම් ගැන ලිපියක් ඉදිරියට ලියවෙන්න හොඳටම ඉඩ ඇති නිසා මේ සාකච්චාව ඒ ලිපියට පෙරවදනක් ලෙස ද සළකමි.

බෑනා: ක්‍රිස්තුස් වහන්සේව වැඩි ප්‍රමාණයක් අදහන රටවල් වල මිනිසුන් අද සුකෝපබෝගී ජීවිත ගත කරනවා, ඒ රටවල් ඉතා සන්වර්දිතයි මිනිසුන් ජීවිත විදිනවා ඒ මිනිසුන්ට ක්‍රිස්තුස් වහන්සේගේ පිහිට ආශීර්වාදය ලැබෙනවා නේද?

මාමා: මෙය සංවිධානාත්මක බොරුවකි. ලෝකයේ ක්‍රිස්තුස් අදහන ජනයා 95% කට වඩා සිටින රටවල් සියල්ලම පාහේ දුප්පත්, එක්කෝ අපරාධ පිලිබඳ නම කියවෙන (කොලොම්බියා, මෙක්සිකෝ) එසේ නැතහොත් නම කිසි සේත් නොකියවෙන (රුමේනියා, නිව්ගිනියා, ඉකුවදෝර්) රටවල් වේ. ඉතා සංවර්ධිත යයි ඔබ සිතන රටවල් වලද ක්‍රිස්තුස් අදහන ජනතාව බහුතරය වුවත් ඔබේ තර්කය මේ වන විට බිඳ වැටී අවසන්ය. ඊට අවසන් ඇනය ගැසීම පිණිස ක්‍රිස්තුස් නොඅදහන ජපානය ප්‍රති-උදාහරණයක් ලෙස දක්වමි. නිගමනය නම් ක්‍රිස්තුස් ඇදහීම හා සංවර්ධනය අතර අනුලෝම හෝ ප්‍රතිලෝම සම්බන්දයක් නැත. වෙනත් වචන වලින් කියතොත් ක්‍රිස්තුස් වහන්සේගේ පිහිට කියා සාධාරණ දෙයක් නැත.


බෑනා: බුදු හාමුදුරුවන් දේශනා කරපු ධර්මය අනුව යනවනම් අපේ රටේ මිනිසුන්ටත් ඊට වඩා ලස්සන ජීවිත ගෙවන්න පුළුවන් කම තියෙන්න ඕනේ නේද? ඒ කියන්නේ බුදුන් දේශනා කරපු ධර්මය ක්‍රියාවට නංවන්න තරම් අමාරුද?

මාමා: මෙය මුලාවකි. බුදු දහම ආශාවන් පසු පස නොයාමටයි උගන්වන්නේ. එහෙත් ලංකාවේ දැන් පවතින්නේ එවැනි සමාජයක් නොවේ, ‘ඔබේ හැඟීම් වලට ඉඩ දෙන්න’ යනුවෙන් සඳහන් පුවරු ඔබ දැක ඇතැයි සිතමි. සාමාන්‍ය සත්ත්ව ස්වභාවය ආශාවන් හඹා යාම මිස ඒවා යේ ආදීනව දැක ඉන් මිදීම නොවේ. ඒ නිසා බුදු දහම ක්‍රියාවට නැංවීම නුපුහුණු කෙනෙකුට ඉතා අමාරුය. මෙය අත්දැකීමෙන් කියමි.


බෑනා: ඇයි හැම පන්සලකම දේවාලයක් තියෙන්නේ?

මාමා: දෙවියන්, යකුන් (කතරගම මහසෙන්, මින්නේරි දෙවියන්, කුරුණෑගල ගලේ බණ්ඩාර, බිසෝ බණ්ඩාර, සකල කලා වල්ලභ) ඇදහිල්ල පුරාණ සිංහල සිරිතකි. අප බෞද්ධ වීමේදී මේ ඇදහිලි සම්පුර්ණයෙන් ඇත හැර දමා නැත. එහෙත් සිංහල බුද්ධාගම ඔබට මේ දෙවියන් ඇදහීම අනිවාර්ය නොකරයි. ඔබ කැමතිනම් ඇදහිය හැක නැතිනම් නිකන් සිටිය හැක. මේ දෙවි වරු කලෙක අප මෙන්ම මිනිසුන් ව සිට දිව්‍යාත්ම ලැබූ අයයි. සර්ව බලධාරී හෝ ලෝකය මැවූ අය හෝ නොවේ. ඒ අය ඒ ඒ ආත්ම භාව වලින් චුත ව මිනිස් හෝ වෙනත් ආත්ම භාව ලැබිය හැක.

එසේම හැම පන්සලකම දේවාල ද නැත. එහෙත් බොහෝ පන්සල් වල දේව රූප ඇත. මා ගැන කියතොත්, ක්‍රිස්තියානි දෙවියන් පයිසෙකට මායිම් නොකරන මා අනිත් දෙවි වරුද ගණන් නොගනිමි. එහෙත් දෙවි වරු ඇත/ නැත කියා වාද නොකරමි.


බෑනා: ඇයි බවුද්දයෝ දේවාල වලට ගිහින් හින්දු දෙවි වරුන්ගෙන් පිහිට ඉල්ලන්නේ. ඇයි පල්ලි වලට යන්නේ? බවුද්දයොත් එහෙනම් බුදු දහම අදහන ගමන් පල්ලි දේවාල ගානේ යන්නේ තමන්ට පිහිට ආශීර්වාදය ඉල්ලගන්න නේද? ඉතින් මාමේ මොකක්ද මේ අපි අදහන අගම ගැන වාද කරලා අපිට ලැබෙන දේ?

මාමා: ඒ ලෝභ, ද්වේශ, මෝහ නිසා.

ළමයෝ මතක තියා ගන්න මේ මිනිස්සු රහත් වෙලා නෑ. ඒ කියන්නේ ලෝභ, ද්වේශ, මෝහ ප්‍රහින කරලා නෑ. ඒ නිසයි ඔය හැම දෙයක් ම කරන්නේ. මෙතැනදී බෞද්ධයෝ වැඩි දෙනෙක් අබෞද්ධයින්ගෙන් වෙනස් වෙන්නේ නෑ. වෙනස් ටික දෙනෙක් සඳහා ඔය චෝදනාව වලංගු වෙන්නේ නෑ.

මේවා ගැන වාද කිරීම කෙසේ වෙතත් සාකච්චා කිරීම නම් හොඳ දෙයක්. ‘කාලින ධම්ම සාකච්චා’ කියලනේ බුදු රජාණන් වහන්සේ මංගල සුත්‍රයේදී දේශනා කළේ. සාකච්චාවෙන් නොදත් දේ දැන ගැනීමත්, දන්නා දේ ස්ථිර කර ගැනීමත්, සැක දුරු වීමත් සිදු වෙනවා. ඊට අමතරව අලුත් මිතුරන් අශ්රයත් ඇති වෙනවා.


බෑනා: ඇයි බුදු කෙනෙක් බුදු වෙන්න කලින් පස් මහා බැලුම් බලන්නේ? (උදා: මව, කුලය) රොඩී පැලක මවකගෙන් ඉපදිලා බුදු බව ලැබුනොත් සමාජයේ පිළිගැනීමක් නැති රොඩී මිනිසුන්ටත් පිළිගැනීමක් ඇති වෙනවා නේද? හරියට ක්‍රිස්තුස් වහන්සේ ගව මඩුවක ඉපදුනා වගේ. ඇයි එහෙම කරන්න බැරි?

මාමා: මේක ටිකක් ලොකු ප්‍රශ්නයක්. ඉතාම කෙටියෙන් කිව්වොත්, හැම බුදු කෙනෙක්ම සඳහා සාධාරණ අනිත් අය සඳහා අසාධාරණ ලක්ෂණ කිහිපයක් තියෙනවා. ඉන් එකක් තමයි උසස් ම කුලයේ ඉපදීම. ඉතින් ඒක එහෙම වෙලා ඉවරයි, බෑනටයි මටයි මැරෙනකම් තර්ක කර කර ඉන්න පුළුවන් ඒක හරි/ වැරදි කියලා. ඒත් කිසි දෙයක් වෙනස් වෙන්නේ නෑ. මෛත්‍රී බෝසතුනුත් ඒ වෙනකොට තියෙන උසස්ම කුලේ උපදියි. ක්‍රිස්තුස් ගව මඩුවක ඉපදුනේ ඉතින් දෙවියන් වහන්සේ ගේ කැමැත්ත නිසානේ. අපි මොනවා හිතුවත් වැඩක් නෑ. එයාට ඕනේ දේ එයා කරන්නේ. ක්‍රිස්තුස් විතරක් නොවේ මුහමඩ් පවා පහතම කුලෙක නේද ඉපදිලා තියෙන්නේ. ඒවා ඔක්කොම ඉතින් දේව මර්සිය තමා !


බෑනා: ඇයි මෙතෙක් බිහිවුන හැම බුදුවරයෙකුම ඉන්දියාවේ විතරක් ඉපදුනේ?

මාමා: බුදු වරු ඉන්දියාවේ විතක් උපදිනවා කියල නියමයක් නෑ, දඹදිව මිස. ඉන්දියාව හා දඹදිව එකිනෙක තුල්‍ය නොවේ.

ඔන්න ඔහොමයි මාමගෙයි බෑනාගෙයි සාකච්චාව ඉවර උනේ. ඊට පස්සේ ඒ දෙන්නා බොහොම සතුටින් සමගියෙන් ඉන්න ඇති.

Wednesday, September 12, 2012

මමමයි එල්ලුවේ

මේ මානසික රෝහලේ කතාවක්.

වේගෙන් ආපු මානසික රෝහලේ අධ්‍යක්ෂක තුමාගේ කාර් එක බ්‍රාස්ස් ගාල බ්‍රේක් ගහල නතර කළා. අධ්‍යක්ෂක තුමා කාරෙකෙන් බැස්සා නෙමේ පැන්නා. දුවගෙන වගේ ගිය එතුමා වහාම කාර්යාලයට ඇතුල් උනා. රෝහලේ නම් කිසිම කලබලයක ලකුණක් වත් නෑ.

වාට්ටුව බාර දොස්තර මහත්තයත් එක්ක ටික වෙලාවක් කතා කරපු අධ්‍යක්ෂක තුමා එක ලෙඩෙක්ගේ ලිපි ගොනුව ගෙන්වාගෙන කියවන්න පටන් ගත්තා. මද සිනාවක් එක්ක දිග සුසුමක් හෙලපු එතුමා ලිපි ගොනුව අයිති ලෙඩාව එවන්න කියලා පණිවිඩයක් යැව්වා.

ඔන්න ලෙඩා එනවා වීරයා වගේ. වෙනදා රවන දොස්තර මහත්තුරු අද මිනිහත් එක්ක හිනා වෙනවා, ගස්සලා යන නර්ස් නෝනලා හොරැහින් බලං ඉන්නවා. ඇයි මේ ...

අධ්‍යක්ෂක තුමා ලිපි ගොනුවත් අතේ තියාගෙනම 'වාඩි වෙන්න' කියලා අතින් සන් කළා. "මේ ලිපි ගොනුවේ හැටියටත්, මුන්නැහැ අද කරපු වීර ක්‍රියාවේ හැටියටත් බලපුවාම දැන්නම් ගෙදර යවන්න පුළුවන්. ඇත්තටම නාන ටැංකියේ ගිලිලා දිවි නසා ගන්න ගිය සිරිසේන එළියට ඇදලා අරං ජිවිතේ බේරා ගත්ත එකනම් වචනයෙන් කියන්න බැරි තරම් වීර ක්‍රියාවක්" කියලා එතුමා කියනකොට වට වෙලා හිටපු කාර්ය මණ්ඩලේ හැමෝම අත්පොලසන් නාදයක් දුන්නේ පුදුම සන්තෝසෙකින්.

"ඒත්" අධ්‍යක්ෂක තුමා හුස්මක් ගන්න කතාව නතර කළා. "සිරිසේන නම් අවාසනාවන්තයෙක්. මිනිහ දැන් ටිකකට ඉස්සෙල්ලා බෙල්ලේ වැල දාගෙන ලු" කියල එතුමා කතාව අවසන් කළා.

"නැහ්... ඌ බෙල්ලේ වැල දා ගත්තේ නෑ" අපේ වීරයා උත්තර දුන්නේ ආඩම්බරෙන්. "හොඳටම තෙමිලා හිටපු නිසා මමමයි සිරාව වේලෙන්න අව්වෙන් එල්ලුවේ"

Friday, August 31, 2012

අධි බිනර පුර පසළොස්වක පෝය

අධි බිනර යනු පෝය ලිතට කෘතීමව ඔබ්බන ලද පෝයකි. පුර හඳ පෑයීම හැරුණු කොට මේ පෝය දිනේ සිදු වූ වැදගත් දෙයක් ගැන විශේෂ සඳහනක් නැත. එසේ වතුදු දිවයින පුරා උවැසි උවැසියෝ වෙනත් පෝ දිනක හා වෙනසක් නොකර පින් දහම් හි නියැලෙති.

පොහොය දින නිර්ණය කෙරෙන්නේ චන්ද්‍ර මාස ක්‍රමය අනුසාරයෙනි. ශුද්ධ චන්ද්‍ර මාස ක්‍රමය පමණක් භාවිතා විනිනම් මෙවැනි 'අධි' පෝයක් තිබිමට ඉඩක් ද නැත. එහෙත් චන්ද්‍ර මාස ක්‍රමය පමණක් භාවිතා වන්නේ සංකීර්ණ ශිෂ්ඨාචාර ගොඩ නොනැගූ යන්තම් ගල් ලෙනෙන් එළියට බට නොදියුණු ගෝත්‍රිකයින් අතර පමණි. පුරාණ සිංහලයෝ හා භාරතීයයෝ චන්ද්‍ර මාස ක්‍රමය හා සමගම සුර්යය මාස ක්‍රමයද නිවැරදිව භාවිතා කෙරිණි.

චන්ද්‍ර මාස ක්‍රමය හා සුර්යය මාස ක්‍රමය

චන්ද්‍රයාගේ සොළොස් කලාව ගැන අප අසා ඇත. සඳ නොපෙනෙන එක් දිනකි; පුර්ණ චන්ද්‍රයා පෙනෙන එක් දිනකි. ඒ දින දෙක අතරතුර කලා දහ හතරකි. සොළොස් කලාව යනු මෙයයි. නැවතද පුර්ණ චන්ද්‍රයා පෙනෙන දින සිට නොපෙනෙන දින දක්වා කලා දහ හතරකි. මෙය කලා චක්‍රය වේ. චන්ද්‍රයා ආසන්න වශයෙන් දින විසි නවයක් හා අඩකින් ස්වකිය කලා චක්‍රය සම්පුර්ණ කරයි. එය චන්ද්‍ර මාසයකි. එවැනි මාස දොළොසක් වසරකි. ඒ අනුව වසරකට දින 354 ඇත.

එහෙත් සුර්යයා රාශි චක්‍රය හරහා ස්වකිය ගමන සම්පුර්ණ කිරීමට දින 365 කට මදක් වැඩි කාලයක් ගනී. රාශි චක්‍රයේ රාශි දොළොසකි. එක් එක් රාශිය පසුබිම් කොටගෙන සුර්යයා පිහිටන විට ඒ ඒ රාශියේ නමින් මාසය (රවිය) නම් කෙරේ. මීන රවිය අවසන් වන විට වසර අවසන් වී මේෂ රවියෙන් ඊළඟ වසර එළඹේ. මේ සිංහල අවුරුද්දයි.

සුර්යය මාස ක්‍රමය අනුව ගත්තද චන්ද්‍ර මාස ක්‍රමය අනුව ගත්ත ද මාස දොළොසක් වසරකි. එහෙත් මාසයකට අයත් වන දින ගණන හා වසරකට ගැනෙන දින ගණන එකිනෙක වෙනස් වේ.


චන්ද්‍ර මාස ක්‍රමය හා සුර්යය මාස ක්‍රමය සංයුක්ත කර ගැනීම

පහසුවෙන් අඩු දින ගණනක් ගණනයට චන්ද්‍රයාගේ කලා නිරීක්ෂණය යෝග්‍ය වේ. මෙය භාවිතා කිරීමට වැඩි උගත් කමක් අවශ්‍ය නොවේ. නමුත් පෘතුවියේ සෘතු විපර්යාස සිදු වන්නේ චන්ද්‍රයාගේ කලාව මත නොවේ. ඒ නිසා දියුණු ගොවිතැනක් භාවිතා කළ සෑම දියුණු ශිෂ්ඨාචාරයකම පාහේ සුර්යය මාස ක්‍රමය භාවිතා විණ. නයිල්, ඉන්දු, ගංගා, මල්වතු ඔය ආදී ගංගා පිටාර ගැලීම, මෝසම් වැස්ස ලැබීම ආදී ස්වභාවික ක්‍රියාවලි සුර්ය වර්ෂය හා සමපාත විය. මේ නිසා වාර්ෂිකව කෙරෙන කාර්යයන්ට සුර්යය මාස ක්‍රමය වඩාත් උචිත බව තේරුම් ගත් අපේ පැරැන්නන් විසින් මේ විකෘතිය හෙවත් අධි මාසය චන්ද්‍ර මාස ක්‍රමයට එක් කරන ලද්දේ චන්ද්‍ර මාස හා සුර්යය මාස ක්‍රමයට ගණන් කළත් වර්ෂය දළ වශයෙන් සමපාත කර තබා ගැනීමටය. රෝමන් වරුන් තමන්ගේ පෙබරවාරි මාසයට සිව් වසරකට වරක් එක් දිනයක් එකතු කිරීම ද මීට සමාන අවස්ථාවකි.

සුර්යය වර්ෂයට සාපේක්ෂව චන්ද්‍ර වසරකට දින 10 ක අඩුවක් පවතින නිසා වසර තුනක් ගිය තැන මාසයක අඩුවක් ඇති වේ. එය පිරවීමට වසර තුනකට පසු එළඹෙන වසර මාස 13 ක වසරක් ලෙස සළකා වැඩිපුර එකතු කෙරුණු මාසය 'අධි' යන විශේෂණය සහිතව හඳුන්වනු ලැබේ. මේ සන්නිකර්ෂණය හේතුවෙන් වසර තුනකට වරක් සුර්යය වර්ෂය හා චන්ද්‍ර වර්ෂය එකිනෙක ගලපාලීම සිදු විය.


අධි මාසයේ බෞද්ධ බලපෑම

බුද්ධ කාලින දඹදිව ජනපද අතර ද මේ ගණනය කිරීම මෙසේම තිබුන මුත් එම 'අධි' මාසය එක් කරන්නේ කුමන මාස දෙකක් අතරට ද යන්න ගැන එකඟතාවක් ඔවුන් එකිනෙකා අතර නොතිබුන බව පෙනේ.

ඒ හේතුවෙන් සමහර ජනපදයෙක භික්ෂුන් එක් පෝය දිනකද තවත් ජනපදයක භික්ෂුන් ඊළඟ පෝය දිනයේද ලෙස වස් වැසීමට පටන් ගත්හ. එසේම වස් සමය තුලට අධි මාසය එළඹුන විට භික්ෂුන් වැඩිපුර මාසයක් වස් විසීම ද සිදු විය. මේ වියවුල නැති කිරීම පිණිස බිම්බිසාර රජුගේ ආරාධනයෙන් බුදු රජාණන් වහන්සේ එවැනි වසරක වස් විසීම ආරම්භ කරන ආකාරය ගැන වෙනම පැහැදිලි කර ශික්ෂා පනවා වදාළහ. ඒ අනුව අධි මාසයක් වස් කාලය තුල යෙදෙන මේ වසරේ භික්ෂුන් වහන්සේලා පෙරවස් සමාදන් වන්නේ ඇසළ නොව නිකිණි අව පෑළවිය (පසළොස්වක දිනට පසු දින) දාය. පසුවස් සමාදන් වීම අධි බිනර අව පෑළවිය දිනය දක්වා කල් යයි. වස් පවාරණය සහ කථින පිංකම් නියමිත පරිදි සාර මසක් ඇවෑමෙන් කෙරේ.

ලංකාවේ අප පෝය දින ගණනය කිරීමට භාවිතා කරන්නේ චන්ද්‍ර වර්ෂයයි. ශ්‍රී බුද්ධ වර්ෂ ලෙස වසර දක්වා දිනය ලියන විට භාවිතා කරන්නේ චන්ද්‍ර වර්ෂය ක්‍රමයයි. සිංහල අවුරුද්ද ගණනය කරන්නේ සුර්යය වර්ෂ ක්‍රමය අනුසාරයෙනි. සුර්යයා මීන රාශියෙන් මේෂ රාශියට සංක්‍රමණය වීම යනු මීන රවිය (මාසය) අවසන් වි මේෂ රවිය (මාසය) ඇරඹුමයි. අප සිංහල අවුරුද්ද ලෙස සමරන්නේ මේෂ රවියේ (මාසයේ) ඇරඹුමයි. ඉංගිරිසි (රෝමන්) අවුරුද්ද ජනේරුවෙන් ඇරඹෙන්නා මෙනි.

අද ලංකාවේ රාජ්‍ය කටයුතු සඳහා භාවිතා වන්නේ රෝමන් වරුන් විසින් සෑදූ දින දර්ශනයයි. ඒ වෙනුවට සිංහල දින දසුන භාවිතා නොකිරීම ඉතා සංකීර්ණ ගණනය කිරීම් සහිත පරිපූර්ණ දින දසුනක් නිර්මාණය කළ පුරාණ සිංහල ආදී මුතුන් මිත්තන්ට කරන අගෞරවයකි.

Friday, August 24, 2012

බිත්තරේ පරිස්සම් කිරීම

පන්තියේ හැමෝම වට වෙලා එක පාර අත් විස්සක් විතර දාගෙන එකෙක්ගේ බත් එක කන එක මම හිතන්නේ දැන් ජාතික පුරුද්දක්. මේ කියන්නේ මිට අවුරුදු පහළොවකට විස්සකට විතර උඩදී ඇත්තටම උනු සිද්ධියක්. ඒ කාලේ දැන් තරම් ළමයි නරක නෑ (හූ හූ හූ !!!), හැමෝම හැමෝගෙම බත් එක කන්න පොර කන්නේ නෑ.
ආයෙත් එළියට ගත්තා බාගයක් ...
ඔන්න අපේ පන්තියේ හිටියා හැමදාම බත් එකට බිත්තරයක් ගේන සිසුවෙක්. බත් එක ලිහපු සැනින් බිත්තරේ අතුරුදහන් වෙන නිසා මිනිහා හොයා ගත්ත මේකට යස උපක්‍රමයක්. ඔන්න බත් මුල ලිහපු ගමන් බිත්තරේ අරං එක පාරටම කටේ දා ගන්නවා. කෙල බෝල බෝල එක්ක එළියට අරං බත් එකෙන් තියනවා. උපක්‍රමේ කොච්චර සාර්ථකද කියනවානම් බත් එකට එන අත් ගාන එක දවසින් බාගෙට බැස්සා. අයියෝ ඒ එන ඉතුරු උනුත් උන් බිත්තරේ තියා ඒ පැත්ත පලාතටවත් යන්නේ නෑ.

හැම දේකටම අවසානයක් තියෙන්න එපැයි. මෙන්න මෙහෙමයි ඒක උනේ.

අපේ වීරයා පුරුදු විදියටම බිත්තරේ බත් එකෙන් තියනකොටම අපේ පන්තියට ආවා එහා පන්තියේ බඩගිනි කාරයෙක්. උන් විවේක කාලේ එන්න කළින් උන්ගේ පන්තියේ කෑම ඔක්කොම ඉවර කරලා. අත දාපු ගමන් ගත්තා බිත්තරේ; දා ගත්තා කටේ; ආයෙත් එළියට ගත්තා බාගයක්; තිබ්බා බත් එකෙන්.

අරුන් ඔක්කොම කටවල් ඇරං බලං ඉන්නවා... ඒත් කතාව එච්චරයි !

Wednesday, August 15, 2012

මගී ප්‍රවාහනයට නව තාක්ෂනය - ii

මෙය පසුගිය ලිපිය හා බැඳෙයි. ඒ ලිපියෙන් අප NFC කියවන යන්ත්‍ර හා NFC හැකියාව සහිත මගී කාඩ් පත් සැපයුම් කරුවන් ගැන සාකච්චා කළෙමු. මේ ලිපියෙන් අප කතා කරන්නේ පසුබිමේ සිටිමින් සේවා සපයන අනෙක් ආයතන ගැනයි.


පෙරගෙවුම් බෙදා හැරීම සහ අළෙවිය

කාඩ් පත තිබුනත් එහි මුදල් නැත්නම් මෙම ක්‍රියාවලිය සම්පුර්ණ නොවේ. ඒ නිසා මගීන්ගෙන් පෙර ගෙවුම් ලබා ගැනීම හා ඒවා කාඩ් පතට එක් කිරීම වෙනම ආයතනයක් විසින් කළ යුතු වේ. මෙය සිදු වන්නේ දිවයින පුරා බෙදාහරින්නන් ජාලයක් සහිත ආයතනයක් මගිනි. ඒ ඒ නියෝජිතයා විසින් බැංකු තැන්පතුවක් තබා තමන් සතු යන්ත්‍රයට ඒ වටිනාකම ඇතුල් කර ගනී. දැන් ඒ මුදලට සමාන වටිනාකමක් මගීන් වෙත අළෙවි කිරීමට ඒ නියෝජිතයාට හැකිය. මගියා අදාළ මුදල ගෙවා ස්වකිය කාඩ් පතට ඒ වටිනාකම ඇතුලත් කර ගත යුතුය.

වාණිජ බැංකු

පෙරගෙවුම් බෙදා හරින නියෝජිතයන් විසින් තැන්පත් කෙරෙන මුදල් බාර ගැනීම බැංකුව සතු කාර්ය භාරයයි. දිනකට රුපියල් කෝටි ගණනක් හුවමාරු වන ජාතික ප්‍රවාහන සේවයේ සියලු මුදල් කළමනාකරණ මේ අනුව බැංකුවේ වගකීමක් බවට පත් වේ. බස් රථ හිමිකරුවන් විසින් දිනපතා එවන ටිකට් පත් වල ගිණුම් විස්තර පිරික්සා අදාළ මුදල් ඒ ඒ බස් රථ හිමිකරුගේ ගිණුමට බැර කිරීමෙන් බැංකුවේ කාර්යභාරය නිමා වේ.

අන්තර්ජාල පහසුකම් සැපයුම්කරු

මුල් ලිපියේ සඳහන් කළ අයුරින් බස් හිමිකරු විසින් දිනපතා ස්වකිය ටිකට් පත් යන්ත්‍රය විසින් කාඩ්පත් හිමි මගීන්ට නිකුත් කළ ටිකට් පත් පිලිබඳ විස්තර බැංකුව වෙත යැවිය යුතු වේ. එය කෙරෙන්නේ GPRS තාක්ෂනය භාවිතා කිරීමෙනි. ටිකට් පත් යන්ත්‍රයේ මිට අදාළ දත්ත පැකට් යැවිය හැකි SIM පතක් අඩංගු වන අතර එය භාවිතයෙන් මේ දත්ත ආරක්‍ෂිත පරිගණක මෘදුකාංග පද්ධතියකට යැවේ.

මෘදුකාංග සැපයුම්කරු

මෘදුකාංග පද්ධතිය කොටස් දෙකකින් සමන්විතය. එකක් බස් රථ හිමියන්ගේ විස්තර, ටිකට් යන්ත්‍ර වල විස්තර, බස් ගාස්තු වගු ආදිය ගබඩා කර ගනී. GPRS තාක්ෂනය හරහා ඊට සම්බන්ද වන යන්ත්‍ර සුදුසු පරිදි යාවත්කාලින කිරීම හා ඒවායේ ගමන් සටහන් ලබා ගැනීම ඒවා පිරික්සා බැංකු පරිගණක පද්ධතිය සමග හුවමාරු කිරීම ආදිය මීට අයත්ය. අනෙක් කොටස NFC කාඩ් පත් වල ජීවචක්‍රය කළමනාකරණ හා සම්බන්දය. මෙම කොටස අතිශයින් රහසිගත හා සුරක්ෂිත පරිගණක මෘදුකාංග පද්ධතියක් වන්නේ කාඩ් පත් භාවිතයෙන් විය හැකි අතපසු වීම් හා වංචාවන් වලක්වා ගැනීම පිණිසය.

නෛතික අංශය

ලංකාවේ බස් රථ සඳහා ටිකට් පත් නිකුත් කිරීම නීතියෙන් අනිවාර්යය. නමුත් මේ නව තාක්ෂණයට සම්බන්ධ නීති රීති ඇති විය යුතුව තිබේ. බස් රථ සඳහා මේ අය ක්‍රමය බලාත්මක කළ යුතුව පවතී. එසේම මෙවැනි තාක්ෂණ සඳහා SLS ප්‍රමිතියක් සකස් කළ යුතුය. එක් එක් සේවා සැපයුම් කරු නීතිමය වශයෙන් වගකීමට බඳවා තබා ගැනීමත් ඔවුන් විසින් සැපිරිය යුතු අත්‍යාවශ්‍ය කොන්දේසි නිර්ණය කිරීමත්, පොදු භාවිතයේදී සිදු විය හැකි වාණිජ හානි සඳහා රක්ෂණ ක්‍රමයක් (දැනට මෙවැනි ක්‍රමයක් ණය කාඩ් පත් සඳහා පවතී) ඇතුලත් කර ගැනීමත් අවශ්‍යය.


දැනට මේ කටයුත්ත ගැන උනන්දුවෙන් කටයුතු කරන්නේ සමස්ත ලංකා බස් හිමියන්ගේ සංගමයයි. ඒ සංගමයට අනුව ලංකාවේ බස් හිමියන්ට හිමි විය යුතු ආදායමෙන් 20% පමණ කොටසක් විවිධ වංචනික ක්‍රියා නිසා අහිමි වෙමින් තිබේ. මේ මුදල් කප්පම් කාරයන්, පොලී කාරයන් හා බස් සේවකයන් විසින් වංචාවෙන් හා බලහත්කාරයෙන් ලබා ගනී. බස් රථ තුලින් මුදල් හුවමාරුව අහෝසි කළ හැකිනම් ඒ මුදල කෙලින්ම හිමි කරු වෙත ලබා ගත හැකි බවත් ඒ වාසිය මගී ජනතාව වෙත ලබා දිය හැකි බවත් සංගමයේ අදහසයි.

එසේම බස් කොන්දොස්තර මහතුන් විසින් මාරු කාසි හිඟය හේතුවක් කර ගනිමින් මගී ජනතාවගෙන් ගසා කන නීත්‍යානුකුල නොවන අදායම එක් කොන්දොස්තර මහතෙකුට දිනකට රුපියල් දහස් ගණනකැයි කියනු ලැබේ. මේ මුදල බස් රථ හිමියාට ද නොලැබේ. බස් සේවක මහතුන්ද නීත්‍යානුකුල නොවන මේ මුදල් යොදවන්නේ සිය පවුලේ සුභ සිද්ධියට වඩා සුරාව, සුදුව, මත්ද්‍රව්‍ය හා වෙනත් අපචාර සඳහාය. යෝජිත ක්‍රමය මගීන් මේ ප්‍රශ්නය 100% ම විසඳේ.

ලංකාවේ මගී ප්‍රවාහනය විධිමත් නැත. මේ ක්ෂේත්‍රය ක්‍රමානුකුලව විගණනය නොකෙරේ. රජය විසින් ලබා දෙන ඉන්ධන හෝ වෙනත් සහනාධාරයක් වුවත් ලබා ගැනීමට මේ අවිධිමත් බව බාධාවකි. යෝජිත ගාස්තු අය ක්‍රමයේ අනිවාර්ය අතුරුඵලයක් ලෙස බස් සේවයට මේ විධිමත් බව ලැබෙනු ඇත. අනෙක් අතින් මේ සංසරණය වන මුදල් නිවැරදිව විගණනය වී නීත්‍යානුකුල බදු මුදල් ලෙස කොටසක් රජයට අය කර ගැනීමේ හැකියාව පවතී. ඒ නිසා ජනතා හිතවාදී රජයක් මෙවැනි දේ ගැන මීට වඩා සැළකිලිමත් විය යුතුය, මීට වඩා සහයෝගය දිය යුතුය.

බස් හිමියන් සමගම බස් රථ සේවක මහතුන් ද ලියාපදිංචි කෙරේ නම් ඔවුන් සඳහාද බැංකු ගිණුම් ආරම්භ කර ඔවුන් ද මේ පද්ධතියට ඇතුලත් කර ගනී නම් ඒ මහතුන්ගේ ප්‍රශ්න වන සේවක අර්ථසාධක හා භාර අරමුදල් ගෙවීම්, නියමිත පරිදි වැටුප් හා සුදුසු පරිදි දිරි දීමනා ගෙවීම්, පවුලේ අය සඳහා වට්ටම් වැනි ආකර්ශනීය සේවාවන් රැසක් මෙමගින් ලබා දිය හැක.

එසේම පුජ්‍ය පක්ෂය, ජ්‍යෙෂ්ඨ පුරවැසියන්, පාසැල් සිසුන්, අබාධිත රණ විරුවන් ආදී විශේෂිත පුරවැසියන් සඳහා විශේෂ කාඩ් පත් හඳුන්වා දිය හැක.


තාක්ෂනය වඩ වඩාත් දියුණු වන විට NFC සහිත ජංගම දුරකථන මේ සඳහා යොදා ගත හැකි වනු ඇත. අනාගතයේ දී ජංගම දුරකථනය භාවිතයෙන් SMS යැවීමෙන් හෝ ණයකාඩ් පතින් ස්වයන්ක්රියවම හෝ අගය එකතු කර ගත හැකි වනු ඇත. ඒ කිසිවක්ම සිදු නොවුනත් මගී ප්‍රවාහනය සඳහා නව තාක්ෂනය භාවිතා කිරීම රටේ දියුණුවේ නව මං සලකුණක් වනු ඇත.

Monday, August 13, 2012

මගී ප්‍රවාහනයට නව තාක්ෂනය

ගිය සතියේ ගුවන් විදුලි පුවත් වල කියැවුණ එක වැදගත් පුවතක් ගැන මගේ අවධානය යොමු විය. ඉන් කියවුනේ බස්රථ සඳහා පෙර ගෙවුම් සේවාව ලබා දීමට කැමති තාක්ෂණික සේවා සපයන ආයතන විසින් තම උනන්දුව රජය වෙත දක්වන "අභිමත ප්‍රකාශ" ඉදිරිපත් කරන ලෙසයි. එක් එක් ආයතන තනි තනිව නොව එකට එක් වී සංයුක්ත ක්‍රියාකාරී සැලැස්මක් ඉදිරිපත් කළ යුතු බව ඉන් වැඩි දුරටත් කියැවිණි. පෙර ගෙවුම් ක්‍රමය පිළිබඳව මා කලින් ලිපියකද (ඉතුරු සල්ලි කෝ) පැහැදිලි කිරීමක් කළ නිසාත් පාඨක මිත්‍රයෙක් ඒ ගැන වැඩි විස්තර ලියන ලෙස ඉල්ලු නිසාත් මේ එයට සුදුසු අවස්ථාව බව සිතේ.
බස් රථ සඳහා පෙර ගෙවුම් සේවාව ලබා දීමට ආයතන කිහිපයක සේවා සැපයීම අත්‍යාවශ්‍යය. එක් ආයතනයක් අනෙකට වඩා වැදගත්යැයි කිව නොහැකි පරිදි මේ එක එක ආයතනය විසින් සැපයෙන සේවා අවියෝජනීය ලෙස එකිනෙක හා බැඳී පවතී. එක සේවාවක් බිඳ වැටුණු වහාම සම්පුර්ණ සේවාවම බිඳ වැටේ. විස්තර කිරීමේ පහසුව තකා ටිකට් පත් නිකුත් කරන යන්ත්‍රයෙන් පටන් ගනිමු.

ටිකට් පත් යන්ත්‍ර

අප දන්නා පරිදි මේ වන විට ලංකාවේ බස් රථ සඳහා ටිකට් පත් යන්ත්‍ර අලෙවි කර සේවා සපයන ප්‍රධාන ආයතන දෙකක් පවතී. ඒ දෙකම සපයන ටිකට් යන්ත්‍ර එකලාව ක්‍රියා කරන, එනම් බාහිර උපකරණ හෝ පද්ධති සමග හෝ කිසියම් අන්තර්ක්රියාවක්, තොරතුරු හුවමාරුවක් කර නොගන්නා යන්ත්‍ර වේ. මේවා බාහිරින් ලබා ගන්නා එකම ආදානය කොන්දොස්තර මහතා විසින් යතුරු පුවරුව හරහා ලබා දෙන ගමනාන්තය හා ටිකට් පත් ගණන පමණි. බස් ගාස්තු සංශෝධනයක් වූ විට මේ යන්ත්‍ර සැපයුම්කරු වෙත ගෙන යාමෙන් තොරව යාවත්කාලින කර ගත නොහැක. නමුත් යෝජිත ටිකට් පත් නිකුත් කරන යන්ත්‍රය පැති දෙකකින් පද්ධති දෙකක් සමග ගනුදෙනු කළ යුතුය.

  1. මගියා සතු පෙර ගෙවුම් මගී කාඩ් පත සමග තොරතුරු හුවමාරුව සඳහා NFC තාක්ෂනය.
  2. සහායක මෘදුකාංග පද්ධතිය සමග තොරතුරු හුවමාරුව සඳහා GPRS තාක්ෂනය.
නව ක්‍රමය යටතේ මේ යන්ත්‍ර NFC තාක්ෂනය සහිත කියවන යන්ත්‍ර මගින් ප්‍රතිස්ථාපනය කළ යුතු වේ. NFC තාක්ෂණයට අමතරව මේ යන්ත්‍ර තුල SIM පතක් සඳහා හා සමහර විට MicroSD පතක් වැනි දත්ත රඳවනයක් සඳහාද ඉඩ හසර තිබිය යුතු වේ. මේ යන්ත්‍ර වල හැඩය, ප්‍රමාණය, බැටරි ආයු කාලය, යතුරු පුවරුවේ යතුරු ගණන හා යතුරු පිහිටුම හා වෙනත් අමතර විශේෂාංග ඒ ඒ යන්ත්‍ර නිෂ්පාදකයා හා මොඩලය අනුව වෙනස් විය හැක. දැනට පෙනී යන ලෙස පෙර කී ආයතන දෙක NFC තාක්ෂනය සහිත ටිකට් යන්ත්‍ර ලංකා වෙළෙඳපොළට හඳුන්වා දිය යුතුය. නැතහොත් ඒ ආයතන වෙනුවට වෙනත් ආයතනයක් ඒ තැන ගත යුතුය.

මෙහිදී සඳහන් කළ යුතු අමතර කරුණක් ඇත. යෝජිත පෙර ගෙවුම් කාඩ් පත් ක්‍රමයේදී දැන් ජංගම දුරකථන වලට පෙර ගෙවුම් වටිනාකම ඇතුලත් කරන සේ වටිනාකම එක කළ හැකි උපකරණයක් මගියා සතුව නැත (NFC තාක්ෂනය සහිත ජංගම දුරකථන තවම සාමාන්‍යකරණය වී නැත). ඒ නිසා පෙරගෙවුම් නියෝජිතයින් විසින්ද මේ යන්ත්‍ර භාවිතා කළ යුතුව පවතී. ලංකාවේ බස් රථ 20000 පමණ (ලංගම සමග) ඇති නිසා අලෙවි කළ හැකි ටිකට් පත් යන්ත්‍ර ගණන එපමණ වුවත් පෙර ගෙවුම් නියෝජිතයන් වෙත අලෙවි කළ හැකි යන්ත්‍ර ප්‍රමාණය විශාලය.

පෙර ගෙවුම් මගී කාඩ් පත

NFC තාක්ෂනය සහිත පෙර ගෙවුම් කාඩ් පත් සැපයීම තවත් ආයතනයක් විසින් කළ යුතුය. මෙය මයික්‍රෝ චිපයක් අඩංගු සැවොම දන්නා හඳුනන ණය කාඩ් පතක් වැනි එම ප්‍රමාණයේම කාඩ් පතකි. එහි බස්/ දුම්රිය වාර ප්‍රවේශ පත්‍ර වල ලෙස මගියා හඳුනා ගන්නා සළකුණු අඩංගු නොවේ. ඒ නිසා මෙය අන්සතු කළ හැක. අප දුටු කාඩ් පතේ හිමිකරුගේ නම මුද්‍රණය කර නොතිබුණ මුත් අවශ්‍යනම් නම, ජාතික හැඳුනුම්පත් අංකය හෝ හිමිකරුගේ ජායාරුපය වැනි හඳුනා ගැනීමේ සලකුණු මුද්‍රණය කිරීම තාක්ෂණික වශයෙන් කළ නොහැකි දෙයක් නොවේ. ඒ නිසා මෙය සොරා ගනී යැයි බිය විය යුතු නැත (මිනිස් ඇසට දැකිය හැකි ලෙස කාඩ් පත මත මුද්‍රණය කිරීමත් කාඩ් කියවනය විසින් කියවිය හැකි සේ චිපය තුල දත්තයක් ලෙස ගබඩා කිරීමත් තාක්ෂණික වශයෙන් වෙනස් ක්‍රියාවලි දෙකකි).

කාඩ් පත් කියවනය විසින් කියැවිය යුතු කාඩ් පත හඳුනා ගැනීමේ විස්තර, එහි අවසන් ගනුදෙනු කිහිපය පිළිබඳ තොරතුරු හා කාඩ් පතේ වර්තමාන වටිනාකම ආදිය කාඩ් පතේ චිපය තුල රඳවා තබා ගැනේ.

ටිකට් පතක් මිලදී ගත් විට ඊට අදාළ ගාස්තුව කාඩ් පතින් අඩු වන අතර එම වටිනාකම ටිකට් යන්ත්‍රය තුල ගබඩා වේ. සිය කාඩ් පතේ ඇති මුදල මගියාට කියවා ගැනීමට ක්‍රමයක් නැති වුවත් ටිකට් පත මුද්‍රණය වන අවස්ථාවේදී කාඩ් පතේ වර්තමාන වටිනාකම බස් ටිකට් පතේ මුද්‍රණය වී පැමිණෙන ලෙස පහසුකම් සලසා තිබීම මගියාට පහසුවකි.

මේ කාඩ් පත් ලංකාවට ගෙන්වීම, බෙදාහැරීම හා ඒවායේ ජීවචක්ර කළමනාකරණය තවත් ආයතනයක් සතු වගකීමකි.

මගී කාඩ්පත් වල පෙර ගෙවුම් බාර ගැනීම, මෙහෙයුම්, බැංකු කටයුතු හා නීතිමය පැත්ත

මේ ගැන ඊළඟ ලිපියෙන් සාකච්චා කරමු...

Tuesday, August 7, 2012

ඉංජිනේරු ශිෂ්‍යයෝ


මොරටු සරසවියේ ශිෂ්‍යයෝ තිදෙනෙක් බර සාකච්චාවක. සාකච්චාවේ මාතෘකාව මිනිස් සිරුර බුද්ධිමත් නිර්මාණයක් නම් ඒ බුද්ධිමතා කොයි වගේ විශේෂඥයෙක්ද.

එකෙක් කියනවා "මිනිස් සිරුර මචං අනිවාර්යෙන්ම මිකැනිකල් පොරක් ගේ වැඩක්. බලපන් මේකේ තියෙන සරල යන්ත්‍ර. ලීවර, කප්පි, අක්ෂ දණ්ඩ මේවා තමයි හැම තැනම පාවිච්චි කරලා තියෙන්නේ".

"වෙන්න බෑ මචං, අපේ ස්නායු පද්ධතිය, මොලය ගත්තහම මේවා සංකීර්ණ විද්‍යුත් පරිපථ. මේ වගේ දෙයක් හදන්න අනිවාර්යයෙන්ම ක්ලාස් ගහපු ඉලෙක්ට්‍රිකල් ඉංජිනේරුවෙක් වෙන්න ඕනේ" දෙවනියා එකඟ නෑ. ඉතින් මුන් දෙන්නා වාදේ.

තුන් වෙනියාට මේවා අහං ඉඳලා එපාම වෙලා. බලන් ඉඳලා ඉඳලා බැරිම තැන ඌත් වාදේ මැදට පැන්නලු:

"කවුරුත් නෙමේ මචං, මේක හදලා තියෙන්නේ මෙහෙන්ම පාස් අවුට් වුන ආකිටෙක් කෙනෙක්. නැත්නම් වෙන මොකාද බං පුනර්ජනන ඒකකය ඇතුලෙන් විෂඅපවහන නලේ දාන්නේ"


Wednesday, August 1, 2012

නිකිණි පුර පසළොස්වක හෙවත් දර මිටි පෝය


ඇසල පුන් පෝ දිනට පසුව එළඹෙන පුන් පෝ දිනය නිකිණි පෝ දිනයයි. ඒ නිසා සාම්ප්‍රදායිකව ඇසල පෝ දිනයේ පෙරවස් විසීමට නොහැකි වූ භික්ෂුන් වහන්සේ කෙනෙක් වෙතොත් ඔහු මේ පොහෝ දිනයේ වස් අධිෂ්ඨාන කර පසුවස් සමාදන් විය යුතුයි. වස් විසු භික්ෂුන් වහන්සේ නමක් විහාර සිමාවෙන් පිටත යාම ඇවතක් වුවත් අවශ්‍යතාවයක් ඇති විට සත් දිනක් දක්වා පිටත වැඩිය හැකි වන ලෙස බුදු රජාණන් වහන්සේ විසින් සත්තාහකරණය අනුදැන වදාළේ ද නිකිණි පෝය දිනකයි.

පසුවස් විසීම හැරුණු කොට ඉතා වැදගත් සිද්ධි මේ පෝ දිනයේ සිදු වී ඇත. ස්මෘති ශක්තිය ඇත්තවුන් කෙරෙන් අග්‍ර, ධර්ම භාණ්ඩාගාරික ආයුෂ්මත් ආනන්ද තෙරුන් වහන්සේ අප්‍රමාන වීර්යයෙන් කෙලෙසුන් නසා සිව් පිලිසිඹියා පත් රහත් භාවයට පැමිණ වදාළේ නිකිණි පුර පසළොස්වක දිනෙක අලුයම් කාලයේදීයි. මගධ රාජ අජාතශ්ත්රයන්ගේ පුර්ණ අනුග්‍රහය හා රාජ සේනාවේ ආරක්ෂාව සහිතව රජගහ නුවර වේහාර පර්වත ප්‍රාන්තයේ සප්තපර්නි ගල් ගුහා ද්වාරය අසල ඉදි වුන මණ්ඩපයක සිව් පිලිසිඹියා පත් මහා රහතන් වහන්සේලා පන්සීය නමකගේ සහභාගිත්වයෙන් ප්‍රථම ධර්ම සංගායනාව ඇරඹුණේ නිකිණි අවපෑළවියදාය (පසළොස්වක දිනට පසු දින). රහතුන් වහන්සේලා එකුන් පන්සීය නමක් අසුන් ගත් පසු පන්සියය සම්පුර්ණ කරමින් ආනන්ද මාහිමියන් වහන්සේ ප්‍රාතිහාර්ය දක්වමින් තමන් වහන්සේට වෙන් කළ අසුන මත ප්‍රාදුර්භූත වූ බව ශාශන ඉතිහාසයේ දැක්වේ. (ප්‍රථම සංගීතිය නිකිණි අවදියවක්දා ආරම්භ කොට සත් මසකින් නිම කරන ලද බව සමහර ග්‍රන්ථ වල සඳහන්ය. එසේනම් ආනන්ද තෙරුන් වහන්සේ අරහත් භාවයට පත් වූයේ නිකිණි පුර පසළොස්වක දින නොව නිකිණි අවපෑළවියදා විය යුතුය.)

මෙම පොහොය දරමිටි පොහොය ලෙස හැඳින්වීමට හේතුව රජරට වල් බිහි වූ සමයේ ධනයෙන් බලයෙන් පිරිහුණු නමුත් ශ්‍රද්ධාවෙන් නොපිරිහුණු සිංහල ගැමි ජනතාව තමන් දිවි දෙවෙනි කොට ශ්‍රී මහා බෝධීන් වහන්සේ රැක ගත් යුගයට දිවේ. වනයෙන් වැසුණු බෝධීන් වහන්සේ සහිත උඩ මලුව වට කොට පහත ගිනි මැල දල්වාගෙන වන සතුන් පලවා හරිමින් නිදි වර්ජිතව ඒ ජනතාව ජීවමාන බුදුරජාණන් වහන්සේ ලෙස සැලකූ ඒ ඇසතු රුක පර සතුරන්ගෙන් රැක ගත්හ. දරමිටි පෙරහැර අදද පැවැත්වේ.

මහනුවර ශ්‍රී දළදා මාලිගාවේ වාර්ෂික පෙරහැර මංගල්‍යය ඇසළ පුන් පෝ දිනත් නිකිණි පුන් පෝ දිනත් අතර මාසය තුල පවත්වනු ලැබේ. මේ හැරුණු කොට සේරුවිල මංගල මහා විහාරයේ වාර්ෂික මහා පිංකම පවත්වන්නේ නිකිණි මාසයේය. කතරගම දේවාලයේ පෙරහැර, සීනිගම දෙවොල් දේවාලයේ ඇසළ මංගල්‍යය හා හලාවත මුන්නේස්වරම් දේවාලයේ පෙරහැර පවත්වන්නේ මේ සමයේය.

Sunday, July 29, 2012

ඉතුරු සල්ලි කෝ

බස් රථයක ගමන් කර නැති කෙනෙක් මේ බ්ලොගය බලන කිහිප දෙනා අතර සිටිය නොහැකිවා සේම නියමිත ගමන් ගාස්තුව ගෙවූ පසු නිවැරදි පරිදි ඉතිරි මුදල නොලැබීම නිසා සිත් තැවුලට පත් වීමද එතරම්ම පොදු අත්දැකීමක් විය යුතුය. මේ කතාව ඒ ගැටළුව නුදුරු අනාගතයේදීම අවසන් වන බවට දිස් වන පෙරමග සලකුණු ගැනයි.

පසුගිය මාසයේ දිනෙක නාරාහේන්පිටදී පැවති පුවත් සාකච්චාවකදී සමස්ථ ලංකා බස් හිමියන්ගේ සම්මේලනයේ සභාපති වරයා විසින් වීඩියෝ පටිගත කිරීමක් ප්‍රදර්ශනය කරන්නට යෙදිණි. තරමක පරිශ්‍රමයකින් පසු එහි වීඩියෝව සොයා ගත හැකි විය. මෙය දැමූ පින්වතාට සෙතක් ම වේවා!




ඊට අනුව මේ යෝජිත නව ක්‍රමයෙන් කෙරෙන්නේ බස් රථ මගීන් සඳහා පෙරගෙවුම් කාඩ් පතක් හඳුන්වා දීමයි. බස් රථ සඳහා මුදල් භාවිතයෙන් සම්පුර්ණයෙන් වෙන් වීම මේ සැලැස්මේ දීර්ඝ කාලින ඉලක්කයයි. මෙහි ක්‍රියාකාරිත්වය පෙර ගෙවුම් දුරකථන සම්බන්ධතාවයකට බොහෝ අතින් සමානය.

දුරකථන සම්බන්ධතාවයක සේම මෙහිද පළමු පියවර වන්නේ මගියා විසින් මෙම කාඩ් පතක් මිලදී ගැනීමයි. සමහර විට මෙම මූලික කාඩ් පත් නොමිලේ නිකුත් කෙරෙනු ඇත. මෙය චිපයක් අඩංගු (ණය කාඩ් පතක් වැනි) ආරක්‍ෂිත කාඩ් පතකි.

දෙවන පියවර මෙම කාඩ් පත් වලට මුදල් ගෙවා අගය එකතු කර ගැනීමයි. මේ සඳහා පෙර ගෙවුම් කවුන්ටර දිවයින පුරා පිහිටවනු ඇත. මේ සඳහා බස් නැවතුම්පොළවල් අසල පිහිටි ඇමතුම් මධ්‍යස්ථාන සහ වෙළෙඳ සල්, සුපිරි වෙළෙඳ හල් හා සමහර විට ණය කාඩ් පත් ද උපයෝගී වනු ඇත. ඒ ක්‍රමය බස් කොන්දොස්තර මහතා ලවාද ක්‍රියාත්මක කර ගැනීමට තාක්ෂණික ගැටළුවක් නැතත් බොහෝ විට එය සිදු නොවනු ඇත්තේ මුලින් කී පරිදි මෙය හඳුන්වා දීමේ මූලික අභිප්‍රාය බස් රථය තුලින් මුදල් හුවමාරුව ඉවත් කිරීම වන නිසාය.

ඔබ සතුව කාඩ් පතක් ඇත්නම්, එහි අවශ්‍ය ප්‍රමාණයට මුදල්ද ඇත්නම් ඔබට දැන් බස් රථයට ගොඩ වී ඔබේ ගමන යා හැක. ටිකට් පත නිකුත් කිරීම පිණිස ඔබ හමුවට පැමිණෙන කොන්දොස්තර මහතාට ඔබේ ගමනාන්තය දැනුම් දී ඔබ සතු කාඩ් පත ටිකට් යන්ත්‍රයට මුහුණ පෑම (මුහුණත ස්පර්ශ කිරීම හෝ ඉතා සමීපයට ලං කිරීම හෝ) පමණක් සෑහේ. ගමනට අදාළ ගාස්තුව ඔබේ කාඩ් පතින් අඩු කර ටිකට් පතක් නිකුත් කෙරෙනු ඇත. මෙම තාක්ෂනය NFC (Near Field Communication) ලෙස හැඳින්වේ. බොහෝ රටවල මෙය දැනටමත් භාවිතා කෙරේ.

ඔබ සතු කාඩ් පතේ ප්‍රමාණවත් මුදලක් නැත්නම් හෝ ඔබට මෙවැනි පෙරගෙවුම් කාඩ් පතක් නොමැතිනම් හෝ මුදල් ගෙවා කාඩ් පතක් ලබා ගැනීමේ හැකියාව පවතී.

ගමනාන්තයේදී බසයෙන් බසින ඔබ ටිකට් පත රැගෙන "හිත සතුටින්" හා "සැහැල්ලුවෙන්" ගෙදර යනු ඇත.

එහෙත්, සුපුරුදු ලෙස සාක්කුවට බැසීමට බලා සිටින පොඩි උන් ...

"තාත්තේ, ඉතුරු සල්ලි කෝ ???"

Monday, July 23, 2012

ඇලඩින් ගේ පුදුම පහන කොල්ලුපිටියේ

මේක ඇලඩින්ගේ පුදුම පහන ගැන කතාවක්. ඇලඩින් මලානේ, ඉතිං මිනිහා මළාට පස්සේ මිනිහගේ අර ලාම්පුව ගැන ආරංචියක් නැති උනා... ඒ ගොඩක් ඉස්සර!

මේ කියන්න යන්නේ අළුත් කතාව.

මේ කතාවට පාත්‍ර වර්ගයා වෙන්නේ Software Engineer කෙනෙක්, Designer කෙනෙක් සහ Manager කෙනෙක්. මේ තුන් දෙනා වැඩ කරන කන්තෝරුව තියෙන්නේ කොල්ලුපිටියේ. ඉතිං ඔතන වැඩ කරනවානම් උදේ 8:30 වෙනකොට එන්න ඕනේ, හවස 7:00 වෙනකම් වැඩ කරන්න ඕනේ. විනාඩි 5 වත් එහා මෙහා බෑ. දවල්ට කෑම පැය... කෑම පැය කියන්නේ කෑම පැය, විනාඩි 30 නෙමෙයි, හරියටම පැයක්. හ්ම්ම්... තව මොනවද... ආ දවසකට තේ දෙකක්!! දෙකක් කියන්නේ තුනක් එහෙම නෙමේ හොඳේ.

කෑම පැය කියන්නේ හරියටම පැයක් කියලා මම කලින් කිව්වනේ, ඉතිං අර කියපු උන් තුන් දෙනා එතන යාළුවො වගේ නිසා කෑමට යන්නේ එකටමයි. පැය බාගයක් යද්දී කාල ඉවර වෙලා රේල් පාර පැනලා වෙරළට යනවා. ගිහිං අර පැය ඉවර වෙනකං මුහුදේ රැළි ගනිනවා, අහසේ වලාකුළු ගනිනවා, රේල් පාරේ කෝච්චි ගනිනවා, කෝච්චියේ පෙට්ටි ගනිනවා, ... ඔහොම තමයි පැය ගෙවන්නේ.

The Three Musketeers
ඔන්න එදත් පුරුදු විදියට මුන් තුන් දෙනා මුහුද අයිනට වෙලා පුරුදු විදියට මව් බිමෙන් පස් කැට, ගල් කැට වරකට එක බැගින් මුහුදට බිලි දෙමින් ඉන්නවාලු. ඔන්න එතකොට තමයි එකෙක් අර කියපු ලාම්පුව දැක්කේ (දැන් කොයි ලාම්පුවද කියන්න එපා. ඒ තමයි ඇලඩින්ගේ ලාම්පුව). මේකේ පාසි බැඳිලා, මුහුද අයිනේ ගලක් යට තියෙනවා දැක්ක එකෙක් මේක එලියට ඇදලා ගත්තලු. ඕක ටිකක් පිරිමදිනකොට සුදු දුමක් දාගෙන ආවලු ... කවුද... පහනේ භූතයා.

භූතයා කියනවලු "හඃ හඃ හඃ ... මම තමයි පහනේ භූතයා; ඔයාලට මම වර තුනක් දෙනවා... කවුද ඉස්සෙල්ලා ඉල්ලන්නේ".

Engineer හිත හොඳ එකා. ඌ කිව්වලු "අවුලක් නෑ මචං, උඹලා ඉස්සෙල්ලා ඉල්ලපන්"; ඒත් අනිත් උන් දෙන්නා ඒකට කැමති නෑලු. ඉතිං පොර කල්පනා කරලා කරලා ඉල්ලුවලු "මට එහෙනම් මිලේනියම් සිටි එකෙන් ගෙයක් දෙන්න, සල්ලි ගැන වද වෙන්නේ නැතුව හොඳ බිරිඳක් එක්ක, ජිවිත කාලෙම සතුටෙන් ඉන්න තමයි මම කැමති. වාහනෙකුත් තිබුනොත් තවත් හොඳයි !" කියලා.

කියන පමාවෙන් ඌ එතනින් අතුරුදහන් උනාලු.

ඊළඟට Designer ගේ වාරේ. ඌත් බැඳලා නෑ. ඌ කිව්වලු "ජිවිත කාලෙම ආතල් එකේ රස්සාව කරගෙන ඉන්න පුළුවන්, වැඩ අඩු, පූල් ටේබල් එකක් තියෙන කන්තෝරුවක රස්සාවකුත් තිබුනානම් මරේ මරු. හැබැයි ඕස්ට්‍රේලියාවෙන්, ලංකාවෙනම් වැඩක් නෑ!!".

ටක් ගානකොට ඌත් එතනින් අතුරුදහන්.

අන්තිමට දැන් Manager ගේ වාරේ. භූතයා නිකං කින්ඩි හිනාවක්‌ දාල අහනවලු, "ලොක්කා, යාලුවෝ දෙන්නානම් ගියා, ඔබ තුමාට හඳට යන්නද කැමති, නැත්නම් හවායි, බැංකොක්, පැරිස්...කොහේ යන්නද කැමති".

මේ වෙනකොට පුපුර පුපුර හිටපු මැනේජරයා ගත් කටටම කියපි...

"කෑම පැය නම් කෑම පැය, කොහේ ගියත් අරුන් දෙන්නා මේ පැය ඉවර වෙනකොට කන්තෝරුවේ ඉන්න ඕනේ !!!"

Monday, July 16, 2012

ආප්ප දන්සැල හෙවත් ලේනුන්ගේ ආප්ප පාටිය

අනාරාධනයෙන් ආ අමුත්තා
අප ජිවත් වන නිවස ඉඩ පහසුකම සහිත ගෙවත්තක් සහිතය. එහි ලේන්නු සහ ගෙවතු ආශ්‍රිත කුරුල්ලෝ බෙහෙවින් ගැවසෙත්. ගෙවත්තේ කෙළවරක පුවක් ගසක් හා මහෝගනී ගසක් උදව් කරගෙන තැනු අට්ටාලයකි. එහි එකී සතුන්ගේ ආහාරය පිණිස බත්, ඉඳි ආප්ප, ආප්ප, පිට්ටු ආදී දෑ දිනපතා උදෑසන තැබීම සිරිතකි. මද්‍යහනය පසු වූ විට ඉවත් කෙරෙන බුද්ධ පුජාව ද එහිම තැබෙන්නේ උන්ගේ ආහාරය පිණිසය. ඒ හේතුවෙන් මෙකී සත්තු දිනය පුරා අප ගෙවත්තේ දැක ගැනීමට ලැබෙති.

අපේ දන්සැලෙන් දිනපතා කෑම ලබන්නෝ ලේන්නු, දෙමලිච්චෝ හා මයිනෝය. ඊට අමතරව සමහර විටෙක පිලිහුඩුවෙක්, කොහෙක්, කෑරලෙක්, කොන්ඩ කුරුල්ලෙක්, හෝ කලාතුරෙකින් කපුටෙක් දැක ගත හැක. ගිරවු ද මෙහි එනු අප කිහිප විටක් දැක ඇත. උහු අටල්ලට නැග හෝ අසල ඇති බිත්තිය මත ලැග හෝ පහසුවෙන් ලත් අහර වළඳති.

දිනය ඉරිදාය. උදේ ආහාරය පිණිස සැකසූ ආප්ප වලින් දෙකක් රාත්‍රී ආහාරයෙන් ඉතිරි කෙරුණු බත් කොටසත් සමග උන්ට දීමි. අටල්ල මත අහර වැඩි වූ විට උන් බිම හලා දමන බැවින් ආප්පයක් බැම්ම මත තැබීමි. අප දහවල් අහරට සැරසෙන විට පෙර නුදුටු අමුත්තෙක් බැම්ම මත ලැග ආප්ප වළදනු ජනේලයෙන් පෙනේ.
මූ කපුටෙක් තරම් විශාලය. බඩපත සුදට හුරුය, අත්තටු දුඹුරු පැහැතිය, හිස ලා පාටය, දෑස් රතුය, හොට තියුණුය. මූ කිසි සේත්ම ආප්ප කෑමට පැමිණි එකෙක් විය නොහැක.

ජනෙල් රෙද්ද මෑත් කර බැලීමි. කුරුළුගොයෙකි. මුන් අහසේ ඉගිලෙනු මිස වසා සිටිනු මින් පෙර දැක නැත. අඩි 15, 20 පමණ නුදුරින් කිසි දිනෙක දැක නැත. බැම්මට තද කර පයින් පාගාගෙන සිටින්නේ ආප්පයක් නොවේ. ආප්ප කෑමට පැමිණි ලේනෙකි. අහෝ ඌ ඒ වන විටත් ජීවිතය හැර ගොස්ය. ලේනුන්ගේ ආප්ප පාටිය කඩාකප්පල් කළ කුරුළුගොයා නිසොල්මනේ ඉඳ ලේනා බරු ගසයි. එක ලේනෙක් පමණක් අතු පතර අතර සිට හුදෙකලා විරෝධතාවයක යෙදේ. ටිං ටිං ටිං ටිං ...

කුමක් කරම්ද, අප ලේනාට ආප්ප දුන් බව සැබැයි, කුරුළුගොයා ඒ උදව්වෙන් ලේනා දඩයම් කර ගත් බවත් සැබැයි. අප ලේනා දඩයම් කර දුන්නා නොවේ. දැන් ලේනාට ජීවිතය දිය නොහැක. කුරුලුගොයා මහන්සියෙන් ලබා ගත් අහර ඌට අහිමි කිරීමත් පලක් නැත.

කුරුළුගොයාගේ ස්වෛරී භාවයට හානි නොකර ජනේලයෙන්ම උගේ ජායාරුප කිහිපයක් ගතිමි ... ජංගම දුරකථනයට කැමරාවක් එක් කිරීමට සිත් පහල වූ ඒ විශිෂ්ඨ නිපැයුම් කරුවාට පිං දුනිමි ... අනේ ඔහු නොසිටියානම් !

Thursday, July 12, 2012

රක්‍ෂනේ

මේක ඇමරිකන් කතාවක්. ඇමරිකන් කාරයෝ විනෝදෙට බිලී පිත්තක් එහෙම අරගෙන මාළු ඉන්න වතුරකට දාගෙන ඉන්නවා. සමහර සල්ලි කාරයෝ බෝට්ටු එහෙමත් අරන් ඕක කරනවා. ඒකට කියන්නේ ෆිෂින්, සිංහලෙන් නම් කියන්නේ මාළු අල්ලනවා කියලා.

ඔන්න ඔය වගේ ඇමරිකන් කාරයෝ තුන් දෙනෙක් එක දවසක් බහාමාස් පැත්තේදී මුණ ගැහුනලු. බහාමාස් කියන්නේ බටහිර ඉන්දීය කොදෙව් වලින් එකක්, නිකං ජැමෙයිකාව වගේ, ඊට පොඩියි. මේ සුද්දෝ තුන් දෙනාත් අපේ අයියලා වගේ තමයි, කඩ්ඩෙන් තමයි කතාව. මුන් තුන් දෙනා සට සට ගාල කඩුව වන වන ආගිය තොරතුරු කතා කරන්න පටන් ගත්තලු.

ටික වෙලාවකින් පළවෙනි සුද්දා කියනවලු, "මට මාර සීන් එක උනේ. මගේ ගේ ගිනි ගත්තනේ, ඔක්කොම නැති උනා. එත් සෙලින්කෝ එකෙන් ඔක්කොම ගෙව්වා. ඒ නිසා ඔන්න මං මෙහේ".

දෙවෙනි සුද්දා කියනවලු, "දෙයියනේ මටත් ඔය වගේම දෙයක් උනේ, මගේ ගෙදර ගෑස් කාන්දුවක් වෙලා පිපිරුනානේ. හොඳ වෙලාවට ගෙදර කට්ටිය එලියට ගිහිං හිටියේ. හම්බ කරපු සබ්බ සකල මනාවම  නැති උනා. මුලින් කල්පනා කරලා ගේ  රක්‍ෂණය කරලා තිබුණ නිසා ගොඩ ගියා. ඉතිං ඒ සල්ලිත් අරං මෙන්න මම මෙහේ. හිඃ හිඃ හිඃ !"

තුන් වෙනි එකාටත් කට වහං ඉන්න හිත දෙන්නෙම නෑ වගේ. ඌත් කියනවනලු, "අයිසේ, මේකනම් පුදුම අහම්බයක්, හැබැයි අපිටනම් ආවේ ලොකු ගංවතුරක්, ජිවිත විතරයි ඉතුරු උනේ. රක්‍ෂනෙන් වන්දි ගෙවපු නිසා ඒ සල්ලිත් එකතු කරගෙන අපිත් මෙහේ ආවා නිවාඩුවට." කියලා.

අරුන් දෙන්න පුදුම වේලා ඇස් ලොකු කරන් මේ හාදයා දිහා බලන් ඉන්නවලු.

"ඉතිං කොහොමද ඕයි තමුසේ ගංවතුරක් ඇති කළේ !!!"

Thursday, July 5, 2012

බ්ලොගයක ඇරඹුම


අද ජූලි 5.

බ්ලොගයක් ලියන්න හිත හිතා හිටියේ ගොඩ කලක ඉඳන්. ලියන්න දේ සැරින් සැරේ හිතට එනවා. ඒත් හැමදාම පටන් ගනිමින් හිටියා මිස පටන් ගැනීමක් නම් උනේ නෑ. මොනවා කරන්නද, මම වෘත්තීය කම්මැලියෙක්.

අද තීරණයක්‌ ගත්තා. මටම කියලා අන්තර්ජාල සම්බන්ධයක්, මොඩමයක් සමග මිලදී ගත්තා. දැන් ඉතින් මාසෙන් මාසෙට බිල ගෙවන්න එපැයි. මාසෙට රුපියල් එක්දාස් පන්සීයකට බදුත් එකතු කරලා ගෙවනකොට කොහොමද සනීපෙ. නිකං තියෙන ඉන්ටනෙට් එකට එච්චර ගානක් නිකංම ගෙවන්නේ මොකටද? ඔන්න මම බ්ලොග් එක පටන් ගත්තා.

දැන් ඉතිං බලමු මේක කොච්චර කාලයක් කරගෙන යයිද කියලා. මේක මමම මටම කර ගන්නා අභියෝගයක් !

Saturday, May 5, 2012

තෘතියාගමන කථා

තවද: අප බුදුහු බුදු වූ අට වන හවුරුද්දෙහි සුනාපරන්තනම් මහ තෙරුන්ගේ ආරාධනාවෙන් පන්සියක් රහතන් හා සමග සක්දෙවූ රජහු මවා දුන් පන්සියක් රුවන් මඩු නැගී වැඩ, සුනාපරන්තදන්වුවෙහි මුහුළු නම් අරම චන්දනශාලාව පිළිගෙන කීප දවසක් එහි දවස් යවා, දේශනාරශ්මින් බොහෝ වූ විනෙය ජන පද්මයෙන් ප්‍රබෝධ කරවා, එයින් නර්මදා නම් ගඟට වැඩ එහි, වසන නර්මදා නම් දිව්‍ය නාගරාජයා විසින් පිළිගන්වන ලද දිව්‍යහාරය සහපිරිවරින් වළදා, ඕහට බණ වදාරා, බොහෝ නයින් සරණසිල් ගන්වා, එම නාරජුගේ ආරාධනාවෙන් ඒ ගංතෙර රළින් මුවා වන තැනඕහට ශ්‍රීපාදයක් ඔබා එයින් සච්චබඬක නම් පර්වතයට වැඩ, එහි පෙර බොහෝ කලක් මිථ්‍යා දෘෂ්ටි ගෙන විසු සච්චබඬක නම් ජටිලයන්ට බණ වදාරා, ඔහු දමා අමාමහ නිවන් දක්වා, ඒහිභික්ෂු භාවයෙන් පැවිදි දී, එම සච්චබඬක නම් මහ තෙරුන්ගේ ම ආරාධනාවෙන් ඒ ගල් මුදුනෙහි ද, ඉටියෙහි එබූ හසක් සේ පාදලක්ෂණ හා සමග ශ්‍රීපාදයක් ඔබා, එයින් මහෝදර නාරජුහු මයිල් මිණි ඇසි නම් නාගරාජයාගේ ආරාධනාවෙන් වෙසඟ මැදි පොහෝ දිනයෙහි ලක් දිවූ වැඩ, කැළණි මහසෑය පිහිටි තැන වැඩ හිඳ, ඔහු විසින් මවන ලද දිව්‍යමණ්ඩපයෙහි අනර්ඝ වූ දිව්‍යාසන නැඟි වැඩහිද, ඔහු විසින්ම දෙන ලද දිව්‍යභෝජනය සහපිරිවරින් වළදා, බණ වදාරා, එම නාරජහුගේ අරාධනාවෙන් කැලණි ගඟ යටද ඕහට පාද ලාංඡනයක් දී නේ සුවහස් නයින් තිසරණ ගන්වා ඔවුන් විසින් කරන ලද අප්‍රමාණ වූ දිව්‍යපුජා ලත් සේක.

එ කෙණෙහි දිව්‍යනාගරාජයන් බුදුන්ට කරන පුජා කෝලාහල යෙන් පැළදිග් බැලු සමනොල කුළ වසන සමන් දෙව් රජ්ජුරුවෝ අප බුදුහු අද ලක්දිවු වැඩි වන්හ, අද මගේ මනදොළ සිඬ වන වැනයි සංතෘෂ්ට වූවාහු ඒ කෙණෙහි දෙවි පිරිස් පිරිවරා පර්වත මුදුනෙහි බුද්ධපුජාවට අතුට තුබූ පියවිලි පටක් බදුවූ කැළණි ගඟ අනුසාරයෙන් ආකාශයෙන් දිව, බුදුන් සහපිරිවරින් වැඳ, දොහොත් මුදුන් දී සිට කරුණා නිධාන වූ තිලෝගුරු බුදුරජාණෙනි! මේ නැගෙනහිරි දිශාභාගයෙහි පස් ගවුවක් උසින් ඉඳු මිණිගල් පර්වතයක් සේ ආකාශයෙහි ගැහැටි ගැහැටි සිටිනා සේ පෙනෙන්නාවූ සමන්තකූට පර්වතය නම් ස්වල්ප වූ පර්වතයක් නො වෙයි, අනන්තාපර්යන්ත වූ බුදුන්ගේ පාද ශ්‍රී ලබන්නා වූ පර්වතයෙක; දැනු දු, නුඔවහන්සේ ද, මාගේ කුළු නමැති ඔටුන්නෙහි තෙල ශ්‍රී පාද නමැති අගමිණිරුවන පලඳවා ලෝවැඩ කළ මැනැවැයි ආරාධනා කළහ.

එ වේලෙහි ස්වාමිදරුවෝ පුර්වදිග් බලා ලංකා නමැති අඞිගනාව තමන් වහන්සේට පෙරමඟ බලා, කර නඟා සිටියාක් වැනි වූ, මුදුන් කුළු නමැති කේශ කලාපෙයකින් හා පෙර මිට දෙවාරයක් වැඩ මට පාද ස්පර්ශ නුදුන් සේකැ යි යන ශෝකයෙන් හඬන කදුළු ධාරා දෙකක් වැනි මහවැලි ගඟ හා කැළණි ගඟ වැනි ගංඟා යුග්මයකින් හා තව ද: පාදවියෝගයෙන් ඛෙද ව ඇය විසින් කඩා ඉස්නා ලද රත්නාභරණ සමුහයන් සේ වනය සිසාරා පිහිටි සියදහස් රත්නාකර සමුහයෙන් හා ශ්‍රීමත් ව දිලිසෙන සමනොලකුළ දැක අද මම ද පෙර බුදුන්ගේ සිරිත් කොට ලඩ්කාඩ්ගනාව සතුටු කරවමියි සිතා දිව්‍යනාග-ගාන්ධර්වාදී පූජා විඳ විඳ පන්සියක් මහ රහතන් හා සමග ආකාශයෙන් වැඩ පර්වත මුදුනෙහි ඝනරන් කඳක් සේ දිලිහි දිලිහි වැඩ සිටි සේක. එ කෙණෙහි පර්වත වෙවුලා මුදුන් කුළ ආකාශයට නැගී බුදුන්ගේ ශ්‍රීපාදය පිළිගෙන අහසින් බැසපෙර සේ ම පිහිටා ගිය. ඉක්බිත්තෙන් ස්වාමිදරුවෝ මුරු-බඹ කැලන් කරන මහ පුජා විඳ විඳ පැළදිග බලා වැඩසිට මේ ශ්‍රී ලංකාද්වීප නමැති තුනුරුවන් භාණ්ඩාරය තමන් වහන්සේට හිමි නියාවට ම හසක් එබුවා සේ, අටතුරා සියක් මඟුල් ලකුණෙන් ශ්‍රීමත් වූ දෙවිබඹුන්ට මුදුන්මල්කඩ වූ, එක් වියන් එක් වියත් නව අඟුලක් පමණ අයම් විතර ඇති වාම ශ්‍රීපාදය සලක්ෂණ කොට ඔබා වදාල සේක.

එ කෙණෙහි බුඬාන්තරයක් මුළුල්ලෙහි ශ්‍රීපාද වියෝගයෙන් ශෝකී වූ ලංකාංගනාව නිශ්ශෝකි ව, එම විට ම පහළ වූ අකාල මේඝජල නමැති අමාදියෙන් ස්නානය කොට, මුළු දිව ව්‍යාප්ත වූ ෂ්ට්වර්ණ බුධධරශ්මි නමැති අනෙකවර්ණ වස්ත්‍රයන් ධරා, දිවමල් වර්ෂා නමැති අංගරාගයෙන් තවරා, රුවන් වර්ෂා නමැති ආභරණ පැලඳ, සමුද්‍රඝෝෂා නමැති තූර්යනාද පතුරුවා, භෘඩ්ගනාද නමැති ගායනා කොට, අකාල කුසුම් නැමති මල් දම් පැළද, මහීනාද නැමති සාධුකාරයෙන් ස්තුති ගී කිය කියා, මේඝනාද නමැති අත්පොලසන් දිදී නටා, සන්තෝෂයෙන් පුජා කලාය.

මෙසේ ස්වාමිදරුවෝ ලංකාඬ්ගනාව සතුටු කරවා සමනොල ශ්‍රීපාදය ඔබා එ ගල් පාවිට වූ භගවත් නම් ලෙන වැඩ හිද සමවත් සුවෙන් දිවාවිහාර කොට එයින් සිරිලක ඇතුළත් කොට, අනුරාධපුර නුවරට වැඩ, දකුණු මහසෑය පිහිටි තැන, මහමෙවුනා උයන්මැද ශ්‍රීමහාබෝධිය පිහිටි තැන, ලෝවාමහාපාය පිහිටි තැන, පිරිත්ලාගෙය පිහිටි තැන, දන්තාදර නම් පොකුණ පිහිටි තැන, ථූපාරාමය පිහිටි තැන, පතස්භුමියෙහි රුවන්මැලි මහසෑය පිහිටි තැන, මිහින්තලයෙහි මහසල සෑ පිහිටි තැන ය යි යන මේ අටමස්ථානය පූර්වබුඬවරයනුදු වැඩහුන් බිම් හෙයින් තමන් වහන්සේද ධ්‍යානසුවයෙන් වැඩ හිඳ, එ තෙනට රැස් වූ දෙවියන්ට බණවදාරා, නො එක් දෙවියන් සසරින් මුදා, එයින් වැඩ රුහුණු දිගානකා පිහිටි තැන ය යි මෙසේ මේ ලක්දිව තුන්වාරයෙන් කැටිව තුදුස් තැනෙක තුදුස් මොහොතක් කල් තුදුස් සමවතෙකින් තුදුස් බුඬකාරක ධර්මයෙන් යෙදුනා වූ අප බුදුහු මෙසේ පාරිභෝගික ධාතු ප්‍රතිෂ්ඨාවෙන් ලක්දිවට අරක් දී දෙවුරම් වෙහෙර ම වැඩි සේක.

මෙසේ තමන් වහන්සේ මොහොතක් කල් වැඩහුන්නාහු වූ තුදුස් තැනට දෙවි මිනිසුන් දැන් දක්වා කරන ලද මහත් වූ උද්දේසික පුජා ඇති හෙයිනුත් මාගේ බුදුහු අර්හත් වන නම් වන සේක.

෴ පූජාවලිය | සම්‍යක් ප්‍රතිපත්ති පූජා කථා ෴

Friday, April 20, 2012

ද්විතියාගමන කථා

තව ද: අප බුදුහු බුදු වූ පස් වන හවුරුදු බග අව පසළොස්වක් දිනෙහි එදා උදය මුළු ලෝ බලා වදාරන සේක් චුලෝදර මහෝදර නම් දෙමයිල් නාරජුන්ගේ සීමාන්තරයෙහි පැනනැඟි මිණිපලඟක් නිසා කරන යුඬයෙහි නස්නා බොහෝ නයින් දැක, ඔවුන් කෙරෙහි උපන් මහාකරුණාවෙන් පුර්වභක්තියෙහි දෙවුරම් වෙහෙරින් නික්ම, දෙවුරම් දොරටුව සමීපයෙහි පිහිටි කිරිපලු රුක අරක් ගත් සමිඬි සුමන නම් දිව්‍යරාජයා විසින් උදුරා සිරසට කරන ලද එම කිරිපලු රුක් නමැති ඉදුමිණි නිල් සේසත් ධරා නිල් මේ කුළක් යට ගමන් ගත් පුර්ණ චන්ද්‍රයගේ ලීලා පරදවමින්, ආකාශයෙන් ම මණිනාග දිවයිනට වැඩ ඝොර වූ යුද්ධයට පටන් ගත් නාගසේනාවට පෙනි අහස පලග් බැද වැඩහිඳ, නො එක් පෙළහර දක්වා සාමග්‍රිතාවට නිසි වූ බණ වදාරා, දේශනා නමැති අමෘත වර්ෂායෙන් නයින්ගේ කෝපාග්නි සන් හිඳුවා සමගි වූ දෙමයිල් නාරජුන් විසින් පිළිගන්වන ලද මිණිපලඟ මතුයෙහි වැඩහිද, ඔවුන් විසින් ම පිළිගන්වන ලද දිව්‍යභෝජන වළදා, අනුමෙවෙනි බණ වදාරා, අසු කෙළක් නයින් ශරණශිලයෙහි පිහිටුවා මතු ම දුටුවා සේ වදුව - පුදව යි කිරිපලු රුක හා සමග මිණිපලඟ නයින්ට ම පාවාදී මෙසේ දෙවන ධාතු ප්‍රතිෂ්ඨාවෙන් ලක්දිවට අරක් දී දෙවුරම් වෙහෙර ම වැඩි සේක.

මෙසේ තමන් වහන්සේ මොහොතක් කල් වැඩහුන් ආසන යට පවා ශාසනාන්තය දක්වා දිව්‍යනාගරාජයන් විසින් කරන ලද පුජා මහිම ඇති හෙයිනුත් මාගේ බුදුහු අර්හත් නම් වන සේක.

෴ පූජාවලිය | සම්‍යක් ප්‍රතිපත්ති පූජා කථා ෴

Sunday, January 29, 2012

ප්‍රථමාගමන කථා

තවද: සතර වනු ව බුදු වූ අප මහා ගෞතම බුදුරජාණන් වහන්සේ බුදු වූ නව වන මස උරුවේලා නම් දනව්වෙහි වැඩහිඳ මතු මාගේ ශාසනය මා අයාමෙහි නිර්මල කොට කොයි පිහිටා දෝ හෝයි බලා වදාරා මේ ශ්‍රී ලඞ්කාද්වීපය දැක ඒ දැන් යක්ෂයන්ට ම නිවාස වෙයි, දැන් ම මම ගොස් ඒ යක්ෂයන් ප්‍රලය කොට ශාසන ප්‍රතිෂ්ඨාවට ආධාර වන සේ අරක්ගන්මියි සිතා වදාරා දුරුතු මැදි පොහෝ දිනයෙහි ලක්දිවු වැඩ ශ්‍රී ලඞ්කාද්වීප නමැති ඒ පද්මයෙහි කර්ණිකාවක් බඳුවූ මණිභෙද නම් දනව්වෙහි ලඞ්කාඞ්ගනාව පලන් මුක්තාහාරයක් බඳු වූ මහා වාලුකා නම් ගඞ්ගාව සමීපයෙහි දිග තුන් යොදුන්, පුළුල යොදුන් පමණ ඇති මහා නාගවන නම් උද්‍යානයෙහි කඳවුරු බැඳ අතුරු නො දී සතුරුව හුන් මහා යක්ෂ කඳවුරට වැඩ ආකාශයෙහි සිට අහස පොළොව ගුගුරුවා යක්ෂයන් තැති ගන්වා පෙනී අපටත් තිලින් වැද හිඳිනා තරම් අවකාශයක් දෙවයි වදාළ සේක. එ වේලෙහි යක්ෂයෝ මේ උයන කුඩා හෙයින් සියුම් වෙස් මවා ගෙන ගැහැටි ගැහැටි වසම්හ, භවත්නි! තොපට කෙසේ අවකාශයක් දෙමෝ දැයි කීහ. එ වේලෙහි බුදුහු සියලඟ දුමවා දුම්කඳු හරනට පටන් ගත් සේක. එ වේලෙහි යක්ෂයෝ දුමින් පීඩා විඳ මොහු මහා ඍඬිවන්ත කෙනෙක, දැන්දක් දිලිහී ගියෝ නම් අප හැම දවා අළුමිටක් කරවා පියති, බිමක් අරුම්හයි මන්ත්‍රණය කොට ඔවුනොවුන් ඇඟ වැතිර සම්කඩකට බිම් හැර මහතාණෙනි! මේ අවකාශයෙහි වැඩහිඳුව, අපට අභය දානය දෙවයි යාච්ඤා කළාහ. ඉක්බිත්තෙන් බුදුහු සඟල සිවුර සතරපටින් අතුට පුර්වදිග් බලා වැඩහිඳ තෙජොකසින සමාපත්තියට සමවැද සතරදිගින් ගිනිකඳු සතරක් මවා යක්ෂයන් කරා මෙහෙයූ සේක. එ කෙණෙහි ගිනි ගුගුරා දිවත් දිවත් යක්ෂයෝ ගිනි භයින් වෙවුලා ආදි සම්කඩකට බිම් දීගත නුහුණුවෝ තුන් යොදුන් උද්‍යාන භූමිය බුදුන්ට ම අවකාශ කොට පිටතට දිවනදෑ, ගිනි ගුගුරා දිවන හෙයින් ලඞ්කාද්වීපය මුළුල්ලෙහි නො එක් පර්වත වන දුර්ගවලට වැද ගිය ගිය තැන්හි ම ගිනිකඳු ම දිවන හෙයින්, මේ සා මහත් ලඞ්කාද්වීපයෙහි අල්ලක් සා අභයස්ථානයකුත් නො ලදින් සියලු යක්ෂයෝ ම මුහුදු බත් වන්නට පටන් ගත්හ. එ වේලෙහි ස්වාමිදරුවෝ යක්ෂයන් කෙරෙහි අනුකම්පා ඇති ව යග්ගිරි දිවයින අධිෂ්ඨාන කොට ගෙන්වා යක්ෂයන් ඊට නංවා නිදුක් කොට දුරු කළ සේක.

ඉක්බිත්තෙන් සමනොළ සමන් දෙවි රජ්ජුරුවන් ආදී වූ ලක්දිව ඒ ඒ පර්වතවල, වෘක්ෂවල අරක් ගෙන වසන දිව්‍යසේනාව අවුත් බුදුන් පිරිවරා වැඳ නො එක් පූජා භාණ්ඩ ගෙන සිටියහ. එ කෙණෙහි බුදුහු බණ වදාරා ශතතහශ්‍ර දෙවියන් සසරින් මුදා වදාළ සේක. එ වේලෙහි සෝවාන් වූ සමන් දෙවි රජ්ජුරුවෝ බුදුන් වැඳ සිට ස්වාමීනි! නුඹවහන්සේගේ බුද්ධෝත්පාදය මුළුල්ලෙහි මේ ලක්දිව යක්ෂවාස නො වන පරිද්දෙනුත්, අප වැඳ පුදා ගන්නා පරිද්දෙනුත්, පාරිභෝගික ධාතුවක් දේවා වදාළ මැනවැ යි ආරාධනා කළහ. එ වේලෙහි ස්වාමිදරුවෝ සුරක්ත වූ ශ්‍රීහස්තයෙන් ශිරොධාතුව පිරිමැද කේශධාතු මිටක් දී වදාළ සේක. සමන්දෙවි රජ්ජුරුවෝ රුවන්කරඬුයෙකින් කේශධාතු පිළිගෙන බුදුන් වැඩහුන්නාවූ ස්ථානයෙහි රුවන් රැසක් පිටට වඩා සත් රියන් උස ඉඳුනිල්මිණි කරඬුයෙකින් වසා, අප්‍රමාණ වූ දිව්‍යගන්ධ කුසුමාදියෙන් පුජා කළහ. මෙසේ බුදුහු පළමුවන ධාතු ප්‍රතිෂ්ඨාව කොට ලක්දිව සිසාරා තුන්යලක් ප්‍රදක්ෂිණා කිරීමෙන් අරක් දී වේළුවනාරාමයට වැඩි සේක. පසු ව සරභූ නම් මහතෙර කෙනකුන් වහන්සේ බුදුන්ගේ ශ්‍රීවාධාතුව වඩා මේඝවර්ණ වූ පාෂාණයෙන් දොළොස් රියන් උස ඒ වසා සල දාගබක් මවා මහත් වූ පුජා කළ සේක. පසු ව චූලාභය නම් රජෙක් ඒ මතුයෙහි තිස්රියන් මහසෑයක් බඳවා භෝග පමණින් පුජා කළේය. පසු ව දුටුගැමුණු රජ ඒ වසා අසූරියන් උස මහසෑයක් බඳවා ඝනරන් පතින් වසා ධන පමණින් පුජා කළේ ය. එසේ හෙයින් කීයේ මැ නෝ මහාවංශයෙහි:
නෙකෙසං පාණිකොටීනං - ධම්මාභිසමයො අහු,
සරණේසු ච සිලේසු - ඨිතා ආසුං අසංඛියා.

සොතාපත්තිථලං පත්වා - සෙලෙ සුමනකූටකේ,
මහා සුමන දේවින්දො - පූජීයං යාවි පූඡියං.

සිරං පරාමසිත්වාන - නීලාමලසිරොරුහො,
පාණිමත්තෙ අදා කෙසෙ - තස්ස පාණිහිතො ජිනො.

සො තං සුවණ්ණචඬ්ගොට - වරෙනාදාය සත්ථුනො,
නිසින්නට්ඨාන රචිතෙ - නානාරතන සඤ්චයෙ.

උච්චතො සත්තරතනෙ - ඨපෙත්වානෙ සිරොරුහෙ,
තං ඉන්දනිල ථූපෙන - පිදහෙසි නමස්සි ච.

එවමච්චායිකං කම්මං - කරොන්තා ච ගුණාකරා,
කරොන්ති පුඤ්ඤං සප්පඤ්ඤා - සංසාර භය භිරුකා-යි
මෙසේ තමන් වහන්සේගේ ඉසින් හළ කෙස් පමණකට පවා මේ සා මහත් පුජා ලත් හෙයිනුත්, එසේ වූ පුජා විඳීමට සුදුසු හෙයිනුත් මාගේ බුදුහු අර්හත් නම් වන සේක.

෴ පූජාවලිය | සම්‍යක් ප්‍රතිපත්ති පූජා කථා ෴
ශ්‍රී ලංකාවේ සත් වන විධායක ජනාධිපති නන්දසේන ගෝඨාභය රාජපක්‍ෂ මහතා අද (ඉල් අව සතවක දා) උදෑසන සර්වඥයන් වහන්සේගේ ද්‍රෝණයක් ශාරීරික ධාතූන් වහන්සේලා වැඩ සිටින අනුරාධපුර රුවන්වැලි මහා සෑ රදුන් අභියස සම්බුද්ධ පා පහසින් පවිත්‍ර වූ ජය භූමියේ සිට ජනාධිපතිධුරයේ ප්‍රතිඥා දීමෙන් අනතුරුව ජාතිය අමතා කළ ප්‍රකාශය.


එතුමාට දෙතිස් කතාවේ උණුසුම් සුභ පැතුම් !
තෙරුවන් සරණින් සියළුම දෙවි රැකවරණින් සියලු කටයුතු සාර්ථක වේවා !